പുത്തൻ വിസയുമായി യുഎഇ; സുവർണജൂബിലി ആഘോഷത്തോടനുബന്ധിച്ച് ഈ മാസം ആരംഭിക്കുന്ന 50പദ്ധതികളിലെ ആദ്യഘട്ടം പ്രഖ്യാപിച്ചുകൊണ്ട് അധികൃതർ, ഗ്രീൻ, ഫ്രീലാൻസ് എന്നീ പേരുകളിൽ പുതിയ വിസ സേവനങ്ങൾ ഏർപ്പെടുത്തി, പ്രവാസികൾക്ക് ഇത് വമ്പൻ അവസരം
കൊറോണ നൽകിയ പ്രതിസന്ധികൾ മറികടന്ന് അൻപത് വർഷത്തിന്റെ നിറവിലേക്ക് യുഎഇ കടക്കുകയാണ്. ഇതിന്റെ ഭാഗമായുള്ള ഒരുക്കങ്ങൾ തകൃതിയായി തന്നെ നടക്കുന്നുണ്ട്. കൂടുതൽ ഇളവുകൾ നൽകി പ്രവാസികളും എത്തിത്തുടങ്ങി. എക്സ്പോയ്ക്ക് പുറമെ ടിട്വൻറിയും കൂടുതൽ മാറ്റ് നൽകുകയാണ്. അങ്ങനെ ആഘോഷരാവുകളിലേക്കാണ് യുഎഇ മടങ്ങുന്നത്. എന്നാൽ പ്രവാസികളെ തേടി എത്തുന്നത് അതിനേക്കാൾ സന്തോഷം നൽകുന്ന മറ്റൊരു വാർത്തയാണ്....
രാജ്യത്തിന്റെ സുവർണജൂബിലി ആഘോഷത്തോടനുബന്ധിച്ച് ഈ മാസം ആരംഭിക്കുന്ന 50പദ്ധതികളിലെ ആദ്യഘട്ടം പ്രഖ്യാപിച്ചുകൊണ്ട് അധികൃതർ രംഗത്ത് എത്തിയിരിക്കുകയാണ്. ഗ്രീൻ, ഫ്രീലാൻസ് എന്നീ പേരുകളിൽ പുതിയ വിസ സേവനങ്ങൾ ഏർപ്പെടുത്തിയതാണ് ഏറ്റവും പ്രധാനപ്പെട്ട പ്രഖ്യാപനം എന്നത്. യു.എ.ഇ വിദേശ വ്യാപാര വകുപ്പ് സഹമന്ത്രി ഡോ. ഥാനി അൽ സയൂദിയാണ് പുതിയ വിസ സംവിധാനം മാധ്യമങ്ങൾക്ക് മുന്നിൽ വെളിപ്പെടുത്തിയത്.
വിദ്യാർഥികൾ, നിക്ഷേപകർ, ബിസിനസുകാർ, പ്രത്യേക വൈദഗ്ധ്യമുള്ളവർ എന്നിവരുൾപ്പെടെ ഉന്നത നേട്ടങ്ങൾ കരസ്ഥമാക്കിയവർക്കാണ് ഗ്രീൻ വിസ അനുവദിക്കുക്കാൻ തീരുമാനിച്ചിരിക്കുന്നത്. ഇത് ലഭിക്കുന്നവർക്ക് രക്ഷിതാക്കളെയും 25വയസുവരെ മക്കളെയും സ്പോൺസർ ചെയ്യാൻ സാധിക്കുന്നതാണ്. കലാവധി കഴിഞ്ഞാൽ വിസ പുതുക്കുന്നതിന് 90മുതൽ 180ദിവസം വരെ ഗ്രേസ് പിരിയിഡും ലഭിക്കുന്നതായിരിക്കും.
കൂടാതെ പതിവ് താമസ വിസകളിൽ നിന്ന് വ്യത്യസ്തമായ ആനുകൂല്യങ്ങളും പദവികളും ഗ്രീൻ വിസക്കാർക്ക് ലഭിക്കുന്നതാണ്. ഏതെങ്കിലും കമ്പനിയുടെ ഭാഗമല്ലാതെ, സ്വന്തം നിലക്ക് നിലനിൽക്കാൻ ഇത് സഹായിക്കുകയും ചെയ്യും. കൂടുതൽ ഗ്രേസ് പിരിയിഡ് ലഭിക്കുന്നതിനാൽ വിസ കാലാവധി കഴിഞ്ഞാലും ആറുമാസം വരെ രാജ്യത്ത് തങ്ങാനാകും. സാധാരണ വിസ കാലാവധി കഴിഞ്ഞാൽ 30ദിവസമാണ് ഗ്രേസ് പിരിയിഡ് ഉള്ളത്. വർക്ക് പെർമിറ്റിൽ നിന്ന് റസിഡൻസ് പെർമിറ്റിനെ വേർതിരിക്കുന്ന പുതിയ റസിഡൻസ് സംവിധാനമെന്ന നിലയിൽ ഗ്രീൻ വിസ കൂടുതൽ പേരെ ആകർഷിക്കുന്നതായിരിക്കും.
അതോടൊപ്പം തന്നെ സ്വതന്ത്ര ബിസിനസുകാർക്കും സ്വയം തൊഴിൽ ചെയ്യുന്നവർക്കും ലഭിക്കുന്ന വിസയാണ് ഫ്രീലാൻസ് വിസ എന്നത്. വിവാഹമോചിതരായ സ്ത്രീകൾക്കും ജോലി ചെയ്യാൻ ആഗ്രഹിക്കുന്ന 15 വയസ് പിന്നിട്ട വിദ്യാർത്ഥികൾക്കും ഈ വിസ നൽകുന്നതാണ്. നിലവിൽ മൂന്ന് ലയറുകളിലായി ഗോൾഡൻ, റെസിഡൻസി, ടൂറിസ്റ്റ് വിസകളാണ് രാജ്യത്ത് അനുവദിച്ചുവരുന്നത്. പ്രതിഭകളെ രാജ്യത്ത് തുടരാൻ പ്രേരിപ്പിക്കുന്നതിനാണ് കൂടുതൽ ഇളവുകൾ ലഭിക്കുന്ന പുതിയ വിസ സേവനങ്ങൾ പ്രഖ്യാപിച്ചിരിക്കുന്നത്.
https://www.facebook.com/Malayalivartha