കൊറോണ വ്യാപനം മൂലം നമ്മുടെ ജീവിത രീതികളിൽ ഒരുപാട് മാറ്റങ്ങൾ വന്നുചേർന്നു. സാമൂഹിക അകലം പാലിക്കുന്നതുതൊട്ട് കയ്യിൽ സദാസമയവും സാനിറ്റൈസർ കൊണ്ടുനടക്കേണ്ട അവസ്ഥ. നമ്മുടെ സുരക്ഷയ്ക്ക് നാം അതൊക്കെ ചെയ്യേണ്ടത് തന്നെയാണ്. എന്നാൽ നീണ്ട വരിയിൽ കാത്ത് നിൽക്കാതെ അവശ്യ സാധനങ്ങൾ എടുത്ത് വന്ന വഴിയേ തന്നെ മടങ്ങാൻ ഒരു സ്റ്റോർ ഉണ്ടായാലോ?

നിർമിത ബുദ്ധികൊണ്ട് പൂർണമായും പ്രവർത്തിക്കുന്ന സിറ്റി പ്ലസ് സ്റ്റോർ മാൾ ഓഫ് എമിറേറ്റ്സിൽ ആരംഭിച്ചിരിക്കുകയാണ്. കാരിഫോർ ആരംഭിച്ച സ്റ്റോറിന്റെ ഉദ്ഘാടനം യുഎഇ നിർമിത ബുദ്ധി സഹമന്ത്രി ഒമർ ബിൻ സുൽത്താൻ അൽ ഒലാമ നിർവഹിക്കുകയുണ്ടായി. മാജിദ് അൽ ഫുത്തെം സിഇഒ അലൈന ബെജ്ജാനിയും മറ്റ് ഉദ്യോഗസ്ഥരും സന്നിഹിതരായിരുന്നു. മേഖലയിലെ ഇത്തരത്തിലുള്ള ആദ്യ സ്റ്റോറാണിത്.

മൊബൈൽ ഫോമിലെ ആപ് ഓൺ ആക്കിയ ശേഷം സ്റ്റോറിൽ പ്രവേശിച്ച് ആവശ്യമുള്ള സാധനങ്ങൾ ബാസ്ക്കറ്റിൽ ഇട്ട് മടങ്ങാവുന്നതാണ്. നിങ്ങൾ എടുക്കുന്ന ഓരോ വസ്തുക്കളും ആപ്പിലെ ഷോപ്പിങ് ബാസ്കറ്റിൽ റജിസ്റ്ററാകുന്നതായിരിക്കും. പണവും അതിൽ നിന്ന് ഈടാക്കുകയും ചെയ്യും. സ്റ്റോർ കീപ്പറോ, കാഷ് കൗണ്ടറോ ഒന്നുമില്ലാത്ത സംവിധാനത്തിൽ നീണ്ട ക്യൂവും ഉണ്ടാകുന്നതല്ല.

കൂടാതെ ആരുമായും സമ്പർക്കമില്ലാതെ സാധനങ്ങൾ വാങ്ങാൻ സാധിക്കും. 1300 സാധനങ്ങൾ സ്റ്റോറിലുണ്ട്. 75 ചതുരശ്ര മീറ്റർ വിസ്തീർണമുള്ള സ്റ്റോറിൽ 97 ക്യാമറകളും ഘടിപ്പിച്ചിട്ടുണ്ട്. ഒരോ ചെറിയ സാധനങ്ങളും ഇതിൽ ട്രാക്ക് ചെയ്യപ്പെടുന്നതായിരിക്കും. 99% കൃത്യത ഇക്കാര്യത്തിലുണ്ട്.

അതേസമയം ഉപയോക്താക്കളുടെ ചലനങ്ങളും ക്യാമറ നിരീക്ഷിക്കും. ആളുകൾക്ക് വേഗം വന്ന് സാധനങ്ങൾ എടുത്തുപോകാനുള്ള സൗകര്യമാണ് ഇതിന്റെ ഏറ്റവും വലിയ പ്രത്യേകതയെന്നും ഉപഭോക്താക്കളുടെ സ്വാഭാവ രീതികളും അഭിരുചികളും പഠിച്ച ശേഷം ഭാവിയിൽ കൂടുതൽ പരിഷ്കാരങ്ങൾ വരുത്തുമെന്നും അധികൃതർ വ്യക്തമാക്കി.