യുഎഇ കടുത്ത ജാഗ്രതയിലേക്ക് കടക്കുകയാണ്. ഇനിവരും ദിവസങ്ങളിൽ മൂടൽമഞ്ഞ്​ ശക്തമാകുമെന്ന്​ മുന്നറിയിപ്പ് നൽകി അധികൃതർ​. കാലാവസ്ഥാമാറ്റം കണക്കിലെടുത്ത്​ വാഹനം ഓടിക്കുന്നവർ അതീവ ജാഗ്രത പുലർത്തണമെന്ന്​ പൊലിസ്​ അറിയിക്കുകയുണ്ടായി. നിയന്ത്രണങ്ങൾ മറികടന്നാൽ ശക്തമായ നടപടി ഉണ്ടാകുമെന്നും അധികൃതർ മുന്നറിയിപ്പ്​ നൽകിയിരിക്കുകയാണ്. മൂടൽമഞ്ഞ് മൂലം ഉണ്ടാക്കുന്ന അപകടമൊഴിവാക്കാനുള്ള മുൻകരുതലിന്റെ ഭാഗമായി മൂടൽമഞ്ഞുള്ളപ്പോൾ ട്രക്കുകളും ബസുകളും ഉൾപ്പെടെയുള്ള ഭാരവാഹനങ്ങളുടെ ഗതാഗതം നിരോധിച്ചതായി അബുദാബി പൊലീസ് അറിയിച്ചു.

അതോടൊപ്പം തന്നെ ദൂരക്കാഴ്ച ഗണ്യമായി കുറയുന്നതിനാൽ അബൂദബി, ദുബൈ എമിറേറ്റുകളിൽ കഴിഞ്ഞ ദിവസം രാത്രി യെല്ലോ അലർട്ട് പ്രഖ്യാപിക്കുകയുണ്ടായി. നിയമലംഘനം നടത്തുന്ന വാഹനങ്ങൾക്ക് 500 ദിർഹം ഫൈൻ ഈടാക്കുകയും ചെയ്യും. ഡ്രൈവറുടെ ലൈസൻസിൽ നാല് ബ്ലാക് പോയിന്റുകളും ഉൾപ്പെടുത്തുമെന്നും റോഡ്‌സ് ആൻഡ് ട്രാൻസ്‌പോർട്ട് അതോറിറ്റി വ്യക്തമാക്കി. തൊഴിലാളികളെ കൊണ്ടുപോകുന്ന ബസുകളും മറ്റും ജാഗ്രത പാലിക്കണമെന്ന്​ അബൂദബി പൊലിസ്​ നിർദേശിച്ചു.

അതിർത്തി പ്രദേശങ്ങളിലും മറ്റും മൂടൽമഞ്ഞ്​ കൂടുതൽ ശക്തമാകുമെന്നാണ്​ കാലാവസ്ഥാ കേന്ദ്രം മുന്നറിയിപ്പ് നൽകുന്നത്. കൂടാതെ ദിവസങ്ങളായി യു.എ.ഇയിൽ അന്തരീക്ഷ ഈർപ്പം കൂടുതലാണ്. രാജ്യത്തുടനീളം താപനില ഗണ്യമായി കുറയുമെന്നാണ്​ കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.

അതേസമയം അബുദാബിയിലെ വിവിധ മേഖലകളിലും മൂടൽമഞ്ഞ് ദൂരക്കാഴ്ച കുറച്ചു. രാവിലെ 9 വരെ നീണ്ടു നിന്ന മൂടൽമഞ്ഞ് വാഹനഗതാഗതത്തെ സാരമായി ബാധിച്ചു. ഇന്നും മഞ്ഞിന് സാധ്യതയുണ്ടെന്നാണ് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഒമാൻ അതിർത്തിയോടു ചേർന്ന ഹത്ത മേഖലയിൽ നേരിയ മഴ ലഭിച്ചു. ഫുജൈറ മലനിരകൾ മേഘാവൃതമായതിനാൽ തന്നെ മഴയ്ക്കു സാധ്യതയുണ്ട്. എന്നാൽ മറ്റ് എമിറേറ്റുകളിൽ കടുത്ത ചൂടനുഭവപ്പെട്ടു. ദിവസങ്ങളായി അന്തരീക്ഷ ഈർപ്പം കൂടുതലാണ്. വിവിധ മേഖലകളിൽ ഇന്നലെ 47 ഡിഗ്രി സെൽഷ്യസ് ആയിരുന്നു കൂടിയ താപനില.