ഇനിമുതൽ വെജിറ്റേറിയൻ മാത്രം കഴിക്കുന്നവർക്കും ഇനി ചിക്കൻ കഴിക്കാൻ പുത്തൻ വിദ്യ. ചെടികളിൽ ഉൽപാദിപ്പിച്ച കോഴിയിറച്ചി ഗൾഫിൽ പരിചയപ്പെടുത്തിയിരിക്കുകയാണ് സിങ്കപ്പൂരിലെ ഒരു സ്ഥാപനം. കൂടാതെ സൗജന്യമായി തന്നെ ഇതിന്‍റെ രുചി അറിയാനും സൗകര്യം ഏർപ്പെടുത്തിയിട്ടുണ്ട്. ദുബൈയിൽ ഈമാസം 16 മുതൽ 18 വരെ ദിവസവും നൂറുപേർക്ക് വെജിറ്റേറിയൻ ചിക്കൻ കൊണ്ട് നിർമിച്ച ബർഗർ സൗജന്യമായി വിതരണം ചെയ്യുമെന്നും കമ്പനി അറിയിച്ചു.

അതോടൊപ്പം തന്നെ ടിൻഡിൽ എന്നാണ് ഈ വെജിറ്റേറിയൻ കോഴിയിയ്ക്ക് പേര് നൽകിയിരിക്കുന്നത്. വിളിക്കുന്നത് ചിക്കൻ, കോഴിയിറച്ചി എന്നൊക്കെയാണെങ്കിലും ഇതിന് കോഴി എന്നല്ല ഒരു പക്ഷിയുമായും ബന്ധമില്ല എന്നാണ് അധികൃതർ പറയുന്നയത്. പൂർണമായും ചെടികളിൽ വിളയുന്ന വസ്തുക്കൾ ഉപയോഗിച്ചാണ് ചിക്കന്‍റെ രുചിയുള്ള ഇതിന്‍റെ നിർമാണമെന്ന് നെക്സ്റ്റ് ജെൻ ഫുഡ് കമ്പനിയുടെ സ്ഥാപകരിൽ ഒരാളും സി ഇ ഒയുമായ ആൻഡ്രേ മെനസിസ് വ്യക്തമാക്കിയത്.

ദുബൈ ജുമൈറ ബീച്ച് ഹോട്ടലിൽ നടന്ന ചടങ്ങിലാണ് ടിൻഡിൽ എന്ന വെജിറ്റേറിയൻ കോഴിയിറച്ചി ആദ്യമായി ദുബൈയിൽ പുറത്തിറക്കിയത്. ക്ഷണിക്കപ്പെട്ട അതിഥികൾക്കും മാധ്യമപ്രവർത്തകർക്കും ഈ വെജിറ്റേറിയൻ കോഴിയിറച്ചികൊണ്ട് പാകം ചെയ്ത വിഭവങ്ങൾ പരീക്ഷിക്കാനും അവസരം ഒരുക്കിയിരുന്നു. ചിക്കൻ വിഭവങ്ങളുടെ രൂപത്തിലും ഭാവത്തിലും രുചികളിലും നിരവധി വിഭവങ്ങളൊരുക്കാൻ കഴിയുമെന്നാണ് വിദഗ്ധരായ ഷെഫുമാർ വ്യക്തമാക്കുന്നത്.

അതേസമയം ഈമാസം 16 മുതൽ യു എ ഇയിലെ ദുബൈ, അബൂദബി, ഫുജൈറ എന്നിവിടങ്ങളിലെ എട്ട് റെസ്റ്റോറന്റുകളുടെ ഇരുപതോളം ശാഖകളിൽ ടിൻഡിൽ ചിക്കൻ കൊണ്ട് നിർമിച്ച വിഭവങ്ങൾ ലഭ്യമാകുന്നതാണ്.

ബുർജ് ഖലീഫയിലെ അറ്റ്മോസ്ഫിയനർ, അക്കിറ ബാക്ക് ദുബൈ, ഡി ഐ എഫ്സിയിലെ ബിബി സോഷ്യൽ ഡൈനിങ്ങ്, ഡി ഐ എഫ് സിയിലെയും ജുമൈറ പാർക്കിലെയും ബൈറ്റ് മീ ബർഗർ, ഗെറ്റ് പ്ലക്ക്ഡ് റെസ്റ്റോറന്റുകൾ, ജുമൈറ ബീച്ച് ഹോട്ടലിലെ ഫിക്ക, ദുബൈ മറീനയിലെ സീറോ ഗ്രാവിറ്റി, ദുബൈയിലെയും അബൂദബിയിലെയും ലാ ബ്രിയോഷേ, ഫുജൈറ അൽ അഖ ബീച്ചിലെ ലേ മേറിഡിയൻ എന്നിവിടങ്ങളിലാണ് വിഭവങ്ങൾ ലഭ്യമാകുക.