ഒക്ടോബർ യുഎഇയ്ക്ക് ഏറെ നിർണായകമായ ഒരു മാസമാണ്. അധികൃതരെപോലെ തന്നെ പ്രവാസികളും ഏറെ ആകാംക്ഷയോടെയാണ് കാത്തിരിക്കുന്നത്. ഈ കൊറോണക്കാലത്തും ലോകത്തെ ഒരു കുടക്കീഴിലാക്കി 126 രാജ്യങ്ങൾ പങ്കെടുക്കുന്ന ദുബായ് എക്സ്പോയും ടിട്വൻറി മത്സരങ്ങളും എല്ലാം ആരംഭിക്കാൻ ഇനി കുറച്ചുനാളുകൾ മാത്രമാണ് ഉള്ളത്. യാത്രക്കാരുടെ കുത്തൊഴുക്ക് പ്രതീക്ഷിക്കുന്നതിനാൽ തന്നെ വ്യത്യസ്‍തമായ ഒട്ടനവധി പാക്കേജുകളാണ് നല്കുവരുന്നത്. അത്തരത്തിൽ ഏറെ അശവസം നൽകുന്ന ഒരു റിപ്പോർട്ട് പുറത്ത് വന്നിരിക്കുകയാണ്...

യുഎഇയിൽ ഒന്ന് ചുറ്റിനടക്കണമെന്ന് ആഗ്രഹിക്കാത്തവർ വളരെ വിരളമാണ്. അവർക്ക് ഒരു പ്രത്യേക വിസ നൽകുകയാണ് യുഎഇ. മറ്റേതെങ്കിലും രാജ്യത്തേക്ക് യാത്ര ചെയ്യുന്ന വഴിയില്‍ യുഎഇയില്‍ ഇറങ്ങി ഒന്ന് കറങ്ങണമെന്ന് ആഗ്രഹമുള്ളവര്‍ക്ക് സന്തോഷ വാര്‍ത്തയുമായി ദുബായ് ജനറല്‍ ഡയരക്ടറേറ്റ് ഓഫ് റെസിഡന്‍സി ആന്റ് ഫോറിന്‍ അഫയേഴ്‌സ് രംഗത്ത് എത്തിയിരിക്കുകയാണ്. യാത്രയ്ക്കാര്‍ക്കായുള്ള 96 മണിക്കൂര്‍ ട്രാന്‍സിറ്റ് വിസയുമായാണ് അധികൃതര്‍ ഇപ്പോൾ രംഗത്തെത്തിയിരിക്കുന്നത്. യുഎഇയിലെ പ്രധാന വിനോദ സഞ്ചാര കേന്ദ്രങ്ങളില്‍ സന്ദര്‍ശനം നടത്തുന്നതിനും എന്തെങ്കിലും ബിസിനസ് മീറ്റിംഗുകളില്‍ പങ്കെടുക്കുന്നതിനും മറ്റ് ഹ്രസ്വ സന്ദര്‍ശനങ്ങള്‍ക്കും ഏറെ ഉപകാരപ്രദമാണ് ട്രാന്‍സിറ്റ് വിസകള്‍ ഒരുക്കിയിട്ടുള്ളത്.

എന്നാൽ യുഎഇയിലേക്ക് ഓണ്‍ അറൈവല്‍ വിസ സൗകര്യം ഉള്ള രാജ്യങ്ങളില്‍ നിന്നുള്ളവരും യുഎഇയിലേക്ക് വിസ വേണ്ടതില്ലാത്ത രാജ്യങ്ങളില്‍ നിന്നുള്ളവരും ഒഴികെയുള്ള യാത്രക്കാര്‍ക്കാണ് ട്രാന്‍സിറ്റ് വിസ ഏറെ പ്രയോജനം ചെയ്യുക. ഇവര്‍ക്ക് എളുപ്പത്തില്‍ യുഎഇയില്‍ സന്ദര്‍ശനം നടത്താന്‍ ഈ ട്രാന്‍സിറ്റ് വിസ ഉപകരിക്കുന്നതാണ്. അല്ലാത്ത പക്ഷം മുന്‍കൂട്ടി ടൂറിസ്റ്റ് വിസയോ വിസിറ്റ് വിസയോ എടുത്ത ശേഷം മാത്രമേ ഇവര്‍ക്ക് പ്രവേശനം അനുവദിക്കുകയുള്ളു. ഈ വിസകളെ അപേക്ഷിച്ച് വളരെ ലളിതമാണ് ട്രാന്‍സിറ്റ് വിസ എടുക്കുന്നതിനുള്ള നടപടിക്രമങ്ങള്‍ എന്നത്.

അതോടൊപ്പം തന്നെ ട്രാന്‍സിറ്റ് വിസ ലഭിക്കുന്നതിന് ആകെ വേണ്ടത് ഒറിജിനല്‍ പാസ്‌പോര്‍ട്ട്, തുടര്‍ യാത്രയ്ക്കുള്ള വിമാന ടിക്കറ്റ്, യുഎഇയിലെ ഒരു ഹോട്ടല്‍ റിസര്‍വേഷന്‍ എന്നിവയാണ്. തുടര്‍ യാത്രയ്ക്കുള്ള വിമാനം ട്രാന്‍സിറ്റ് വിസയ്ക്ക് അപേക്ഷിക്കുന്നതിന്റെ എട്ട് മണിക്കൂറിനും 96 മണിക്കൂറിനുമിടയില്‍ യുഎഇയില്‍ നിന്ന് യാത്ര പുറപ്പെടുന്നതായിരിക്കണമെന്ന് നിബന്ധന നൽകിയിട്ടുണ്ട്. അതിനു പുറമെ, വിമാനം പുറപ്പെട്ട സ്ഥലത്തേക്ക് തന്നെ തിരിച്ചു പോകുന്നതാവരുത് എന്നതാണ് മറ്റൊരു നിബന്ധന ഏർപ്പെടുത്തിയിരിക്കുന്നത്.

കൂടാതെ യുഎഇ വഴി സര്‍വീസ് നടത്തുന്ന വിമാന കമ്പനിയെയാണ് ട്രാന്‍സിറ്റ് വിസയ്ക്കായി യാത്രക്കാര്‍ സമീപിക്കേണ്ടത്. ഇവിടെ 96 മണിക്കൂര്‍ നേരത്തേക്കുള്ള ട്രാന്‍സിറ്റ് വിസയ്ക്ക് അപേക്ഷ നല്‍കണം. യാത്ര തുടങ്ങുന്നതിനു മുമ്പ് തന്നെ ഇതിനുള്ള കാര്യങ്ങള്‍ ചെയ്തിരിക്കണം. ഇക്കാര്യത്തില്‍ ട്രാവല്‍ ഏജന്‍സികള്‍ക്കും നിങ്ങളെ സഹായിക്കാൻ സാധിക്കുന്നതാണ്. അപേക്ഷ സ്വീകരിക്കപ്പെട്ടാല്‍ മൊബൈല്‍ നമ്പറില്‍ അതിന്റെ സന്ദേശം ലഭിക്കുകയും ചെയ്യും. യുഎഇയിലെത്തിയ ശേഷം വിമാനത്താവളത്തിലെ ഇമിഗ്രേഷന്‍ കൗണ്ടറിലെ പാസ്‌പോര്‍ട്ട് ഓഫീസറെ കണ്ട് ബാക്കി നടപടിക്രമങ്ങള്‍ എളുപ്പത്തില്‍ പൂര്‍ത്തായാക്കാനും സാധിക്കുന്നതാണ.