ഖത്തറില്‍ 80 ശതമാനം പേരും കൊവിഡ് പ്രതിരോധ വാക്‌സിന്റെ രണ്ട് ഡോസും സ്വീകരിച്ചതായി പൊതുജനാരോഗ്യ മന്ത്രാലയം റിപ്പോർട്ട് പുറത്തുവിട്ടു. ഇതുവരെ രാജ്യത്ത് 4,653,019 വാക്‌സിന്‍ ഡോസുകളാണ് വിതരണം ചെയ്തിട്ടുള്ളത്. ഇത് ഏറെ ആശ്വാസം നൽകുന്ന വാർത്ത കൂടിയാകുന്നു. അതിവേഗത്തിലാണ് ഏവർക്കും വാക്‌സിൻ ലഭ്യമാക്കി വരുന്നത്.

അതേസമയം കഴിഞ്ഞ 24 മണിക്കൂറില്‍ 5,605 ഡോസ് വാക്‌സിന്‍ വിതരണം ചെയ്തു. 2020 ഡിസംബര്‍ 23 നാണ് ഖത്തറില്‍ കൊവിഡ് വാക്‌സിനേഷന്‍ പദ്ധതി ആരംഭിച്ചത്. 2021 മെയ് 16 മുതല്‍ 12 വയസ്സ് മുതല്‍ 15 വയസ്സ് വരെയുള്ള കുട്ടികള്‍ക്ക് ഫൈസര്‍ വാക്‌സിന്‍ നല്‍കി തുടങ്ങിയിരുന്നു. കൂടാതെ ബൂസ്റ്റര്‍ ഡോസും ഖത്തറില്‍ നല്‍കി തുടങ്ങിയിരിക്കുകയാണ്. ഖത്തറില്‍ പുതിയതായി സ്ഥിരീകരിക്കുന്ന കൊവിഡ് കേസുകളിലും കുറവ് ഉണ്ടായിട്ടുണ്ട്.

കൂടാതെ ഖത്തറില്‍ ശനിയാഴ്ച 82 പേര്‍ക്കാണ് കൊവിഡ് പോസിറ്റിവ് സ്ഥിരീകരിച്ചത്. 164 പേര്‍ കൂടി കഴിഞ്ഞ ദിവസം രോഗമുക്തി നേടിയിട്ടുണ്ട്. ആകെ 2,33,116 പേരാണ് രാജ്യത്ത് സുഖം പ്രാപിച്ചത് . 604 പേരാണ് ഖത്തറില്‍ ആകെ കൊവിഡ് ബാധിച്ച്‌ മരണത്തിന് കീഴടങ്ങിയത് .