കൂടുതൽ നിബന്ധനകൾ പുറത്തിറക്കി യുഎഇ. ഇപ്പോഴിതാ 12 വയസ്സില്‍ താഴെയുള്ള കുട്ടികളോടൊപ്പം വാഹനത്തില്‍ സഞ്ചരിക്കുമ്പോഴോ അടഞ്ഞ സ്ഥലത്തോ പുകവലിക്കുന്നത് നിയമലംഘനമെന്ന് ചൂണ്ടിക്കാട്ടി ഫെഡറല്‍ പബ്ലിക് പ്രോസിക്യൂട്ടര്‍ ഓഫിസ് രംഗത്ത് എത്തിയിരിക്കുകയാണ്. നിയമലംഘനം നടത്തുന്നവര്‍ക്കെതിരെ 10,000 ദിര്‍ഹം വരെ പിഴ ചുമത്തുന്നതാണ്. ആദ്യ തവണ 5,000 ദിര്‍ഹവും രണ്ടാം തവണ 10,000 ദിര്‍ഹവുമാണ് ചുമത്തുക. കുട്ടികളുടെ സുരക്ഷ ലക്ഷ്യമിട്ടുള്ള 'വദീമ 'നിയമത്തിന്റെ ഭാഗമായാണിത് നൽകുന്നത്.

അതോടൊപ്പം തന്നെ 18 വയസ്സില്‍ താഴെയുള്ള കുട്ടികള്‍ക്ക് പുകയിലയോ പുകയില ഉല്‍പന്നങ്ങളോ വില്‍ക്കാന്‍ പാടില്ല. പുകയില ഉല്‍പന്നങ്ങള്‍ വില്‍ക്കുമ്പോള്‍ കുട്ടികളുടെ പ്രായം സംബന്ധിച്ച രേഖ വില്‍പനക്കാര്‍ ചോദിക്കണമെന്നാണു നിയമം അനുശാസിക്കുന്നത്. കുട്ടികളുള്ള വാഹനങ്ങളില്‍ മുതിര്‍ന്നവര്‍ പുകവലിക്കുന്നതു കണ്ടാല്‍ പട്രോളിങ്ങിലുള്ള പൊലീസ് ഉദ്യോഗസ്ഥര്‍ക്കു നടപടിയെടുക്കാവുന്നതാണ്.

അതായത് ജീവിക്കാനുള്ള കുട്ടികളുടെ അവകാശം, നിലനില്‍പ്, വികസനം എന്നിവ സുഗമമാക്കുന്നതിന് ആവശ്യമായ എല്ലാ അവസരങ്ങളും നല്‍കണം. ലഹരി വസ്തുക്കള്‍ കുട്ടികള്‍ക്ക് കൈമാറുന്നതും വദീമ നിയമം 12 അനുച്ഛേദപ്രകാരം ഗുരുതര കുറ്റമാണ് എന്നും അധികൃതർ ചൂണ്ടിക്കാട്ടി. പ്രതികള്‍ക്കെതിരെ കര്‍ശന നടപടികള്‍ സ്വീകരിക്കുന്നതായിരിക്കും.