ഇനി വരുന്ന ഒരൊറ്റ ദിനവും യുഎഇയ്ക്ക് നിർണായകമാണ്. കൊറോണയിൽ പകച്ചു നിന്ന ലോകത്തിന് പുതുപ്രതീക്ഷ പകർന്ന് അവർ കൈകോർക്കുകയാണ്. ദുബായ് എക്സ്പോ 2020യോടനുബന്ധിച്ച് കൂടുതൽ ഇളവുകൾ നൽകി സഞ്ചാരികക്കായി കാത്തിരിക്കുകയാണ് യുഎഇ. അങ്ങനെ പ്രവാസികൾക്ക് ഏവർക്കും സന്തോഷം നൽകി ഇളവുകൾക്കൊപ്പം തന്നെ കൂടുതൽ വിസകൾ നൽകുകയാണ് യുഎഇ.

അങ്ങനെ നീണ്ട കാത്തിരിപ്പിന് ശേഷം പ്രവാസികളെ തേടി സന്തോഷ വാർത്ത എത്തുകയാണ്. യുഎഇ അഞ്ചു വർഷത്തെ മൾട്ടിപ്പിൾ എൻട്രി ടൂറിസ്റ്റ് വിസകൾക്കുള്ള അപേക്ഷ ക്ഷണിച്ചുതുടങ്ങിയിരിക്കുകയാണ്. 650 ദിർഹമാണ് ഫീസ് ഈടാക്കുന്നത്. ഫെഡറൽ അതോറിറ്റി ഫോർ ഐഡന്റിറ്റി ആൻഡ് സിറ്റിസൺഷിപ്പ് (ഐസിഎ) എല്ലാ രാജ്യക്കാർക്കും ഈ വിസ നൽകുമെന്ന് അധികൃതർ അറിയിച്ചു. അഞ്ചു വർഷത്തിനിടെ എത്ര തവണ വേണമെങ്കിലും യുഎഇയിൽ വന്നു പോകാൻ അനുമതിയും നൽകുന്നതാണ്.

അതോടൊപ്പം തന്നെ ഓരോ സന്ദർശനത്തിലും 90 ദിവസം രാജ്യത്ത് തുടരാനും കഴിയും, ഇത് 90 ദിവസം കൂടി നീട്ടാനും അധികൃതർ അവസരം നൽകിയിട്ടുണ്ട്. താത്പര്യമുള്ളവർ സ്വന്തമായിഐസിഎ വെബ് സൈറ്റില്‍ അപേക്ഷ സമർപ്പിക്കേണ്ടതാണ്. ട്രാവൽ ഏജൻസികൾക്ക് ഇതിനുള്ള അനുമതി ഇതുവരെ നൽകിയിട്ടില്ല.

കൂടാതെ ബാങ്ക് സ്റ്റേറ്റ്മെന്റുകൾ അപേക്ഷയോടൊപ്പം അപ് ലോഡ് ചെയ്യണം. ദുബായ് വീസയ്ക്ക് ജിഡിആർഎഫ്എ വഴിയും അബുദാബി, ഷാർജ, അജ്മാൻ, ഉമ്മുൽ ഖുവൈൻ, റാസ്ൽഖൈമ, ഫുജൈറ, അൽ ഐൻ, അൽ ദഫ്ര (പടിഞ്ഞാറൻ മേഖല) വീസയ്ക്ക് എസിഎ വെബ്സൈറ്റിലൂടെയുമാണ് അപേക്ഷിക്കേണ്ടത്. www.ica.gov.ae എന്ന വെബ്‌സൈറ്റിലൂടെയാണ് അപേക്ഷ സമർപ്പിക്കേണ്ടത്.

അതേസമയം ദുബായ് എക്‌സ്‌പോയില്‍ പങ്കെടുക്കാന്‍ ആറു ദിവസം ശമ്പളത്തോടു കൂടി അവധി ലഭിച്ചതിന്റെ ആഹ്ലാദത്തിലാണ് ദുബായിലെ സര്‍ക്കാര്‍ ജീവനക്കാര്‍ ഏവരും. ദുബായ് കിരീടാവകാശി ശെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമിന്റെ നിര്‍ദേശപ്രകാരമാണ് ജീവനക്കാര്‍ക്ക് അവധി മനൽകിയിരിക്കുന്നത്. ഒക്ടോബര്‍ ഒന്നിന് ആരംഭിച്ച് ആറുമാസം നീളുന്ന എക്സ്പോയില്‍ പങ്കെടുക്കാന്‍ 2022 മാര്‍ച്ച് 31 വരെ എപ്പോള്‍ വേണമെങ്കിലും ജീവനക്കാര്‍ക്ക് അവധി എടുക്കാവുന്നതാണ്.

കുടുംബസമേതം ജീവനക്കാര്‍ക്ക് എക്‌സ്‌പോയില്‍ പങ്കെടുക്കാന്‍ സൗകര്യമൊരുക്കുയെന്ന ലക്ഷ്യത്തോടെയാണ് അവധി പ്രഖ്യാപനം നടത്തിയിരിക്കുന്നത്. ഷെയ്ഖ് ഹമദാന്‍ സൈക്കിളില്‍ എക്‌സ്‌പോയുടെ ഉദ്ഘാടന വേദിയായ അല്‍വാസ പ്ലാസ സന്ദര്‍ശിച്ച ശേഷമാണ് ജീവനക്കാര്‍ക്ക് ഏറെ സന്തോഷം നല്‍കുന്ന പ്രഖ്യാപനം നടത്തിയിരിക്കുന്നത്. ഇത്തരത്തിൽ അവധി ലഭിച്ചതിന്റെ സന്തോഷത്തിലാണ് പ്രവാസികൾ ഉൾപ്പടെയുള്ള ജീവനക്കാർ.