ദുബായ് രാജ്യാന്തര വിമാനത്താവളത്തിലൂടെ എക്സ്പോ 2020യ്‌ക്ക് എത്തുന്ന കുടുംബങ്ങളെ സ്വാഗതം ചെയ്യാൻ പ്രത്യേക എമിഗ്രേഷൻ കൗണ്ടറുകൾ ഒരുക്കിയിരിക്കുകയാണ് ജിഡിആർഎഫ്എ ദുബായ്. എക്സ്പോ മുദ്രകളായ ലത്തീഫയും റാഷിദും ചേർന്ന് കുടുംബങ്ങളെ സ്വീകരിക്കുന്ന പശ്ചാത്തലമൊരുക്കിയാണ് കൗണ്ടറുകൾ സജ്ജമാക്കിയിട്ടുള്ളത്. കഴിഞ്ഞ ദിവസം വിമാനത്താവളം ടെർമിനൽ മൂന്നിലാണ് ഇത്തരത്തിലുള്ള പവലിയനുകൾ ഒരുക്കി സന്ദർശകരെ സ്വീകരിച്ചു തുടങ്ങിയത്.

അതോടൊപ്പം തന്നെ ലത്തീഫയുടെയും റാഷിദിന്റെയും ചിത്രങ്ങൾ ആലേഖനം ചെയ്ത പ്രത്യേക കൗണ്ടറുകൾ യാത്രക്കാർക്ക് ഏറെ സന്തോഷം പകരുമെന്ന് ജിഡിആർഎഫ്എ ദുബായ് തലവൻ ലഫ്. ജനറൽ മുഹമ്മദ്‌ അഹ്‌മദ്‌ അൽ മറി മാധ്യമങ്ങളോട് പറഞ്ഞു. മെഗാ ഇവന്റിലേക്കുള്ള ദശലക്ഷക്കണക്കിന് യാത്രക്കാരെയും സന്ദർശകരെയും മികച്ച രീതിയിൽ സ്വാഗതം ചെയ്യാനുള്ള വകുപ്പിന്റെ സന്നദ്ധതയുടെ ഭാഗമാണ് ഈ സംരംഭം ഒരുക്കിയിരിക്കുന്നത്. കുട്ടികളോടൊപ്പം എത്തുന്ന കുടുംബങ്ങൾക്കുള്ളതാണ് ഈ കൗണ്ടർ. ദുബായിലെത്തുന്നത് മുതൽ ആഹ്ലാളാദകരമായ അനുഭവം പകരാൻ ഈ ഉദ്യമം സഹായിക്കുമെന്ന് അൽ മർറി ചൂണ്ടിക്കാട്ടി.

എക്സ്പോ പൊടിപൊടിക്കാൻ പോകുന്ന ഈ വേളയിൽ ദുബായ് സന്ദർശകർക്കിടയിൽ സന്തോഷം പകരുന്നതിനുള്ള നടപടിക്രമങ്ങൾ കൂടുതൽ സുഗമമാക്കുക എന്നതാണ് വകുപ്പിന്റെ ലക്ഷ്യമെന്നും പൊതുജനങ്ങളെ സേവിക്കാനുള്ള യുഎഇ നേതൃത്വത്തിന്റെ വിവേകപൂർവ്വമായ കാഴ്ചപ്പാട് കൈവരിക്കുന്നതിനാണ് തന്റെ വകുപ്പ് പ്രവർത്തിക്കുന്നത് എന്നും അദ്ദേഹം വ്യക്തമാക്കി.

ഈ ചരിത്ര നിമിഷത്തിന് ഭാഗമായതിൽ ഏറെ അഭിമാനിക്കുന്നു. വിമാനത്താവളത്തിൽ ഊഷ്മള സ്വീകരണം ലഭിച്ച സന്ദർശകർ സന്തോഷം പ്രകടിപ്പിച്ചുവെന്നും അദ്ദേഹം കൂട്ടിച്ചേർത്തു.