കൊവിഡിന്റെ വരവോടു കൂടി സാധാരണക്കാരായ ജനങ്ങൾ നിത്യവും മാസ്‌ക് ഉപയോഗിക്കാൻ തുടങ്ങിയിരിക്കുകയാണ്. ഏവരുടെയും നിത്യ ജീവതത്തിന്റെ ഭാഗമായി മാറിയ മാസ്‌ക്കുകൾക്ക് ഭയങ്കര ഡിമാൻഡാണ്. കൊറോണ വൈറസ് പ്രതിരോധത്തിൽ മാസ്ക് ധരിക്കുന്നതിന്റെ പ്രാധാന്യം വളരെ വലുതാണ്. എന്നാല്‍ അതില്‍പോലും ആഢംബരം കാണിക്കുകയാണ്. ലക്ഷങ്ങൾ ചിലവാക്കി സ്വർണ മാസ്കുകൾ നിർമിച്ചവരുടെ വാർത്തകൾ കഴിഞ്ഞ ദിവസങ്ങളിൽ പുറത്തുവന്നിരുന്നു. എന്നാൽ ലക്ഷങ്ങളാൽ കോടികൾ വിലമതിക്കുന്ന മാസ്‌ക്കുകളും ഇപ്പോൾ വിപണിയിൽ ഉണ്ട്.

പതിനൊന്ന് കോടിയിലേറെ രൂപ വില വരുന്ന ലോകത്തിലെ ഏറ്റവും വിലകൂടിയ മാസ്ക്കാണ് സൗദിയിൽ ഉള്ളത്. വെള്ളയും കറുപ്പും നിറത്തിലുള്ള 3,608 ഡയമണ്ടുകളും സ്വർണവും ഉപയോഗിച്ച് നിർമ്മിച്ചതാണ് ഈ മാസ്ക്. റിയാദിൽ നടക്കുന്ന റിയാദ് സീസണിലെ പ്രധാന വേദികളിൽ ഒന്നായ റിയാദ് ഫ്രണ്ടിലെ ജ്വല്ലറി സലൂൺ പ്രദർശന മേളയിലാണ് ഈ മാസ്ക് പ്രദർശനത്തിന് വച്ചിരിക്കുന്നത്. അമേരിക്കയിലെ ലൊസാഞ്ചലസിൽ കഴിയുന്ന സമ്പന്നന്റെ ഉടമസ്ഥതയിലാണ് ഇപ്പോൾ ഈ മാസ്ക്.

അതേസമയം ഈ മാസ്ക്കിന്റെ പ്രത്യേകതയും ഏവരെയും ആകര്ഷിച്ചിരിക്കുകയാണ്. മൂന്ന് പാളികളിൽ തീർത്ത മാസ്കിന്റെ ആദ്യ പാളി പൂർണമായും അപൂർവയിനം വജ്രം ഉപയോഗിച്ചാണ് നിർമിച്ചിട്ടുള്ളതാണ്. രണ്ടാം പാളി എൻ 99 മാസ്കും മൂന്നാം പാളി ഫിൽട്ടറുമാണ് ഉള്ളത്. ആരോഗ്യ സുരക്ഷ ഉറപ്പാക്കുന്നതിന് അമേരിക്കൻ ഫുഡ് ആൻഡ് ഡ്രഗ് അതോറിറ്റിയുടെ അംഗീകാരവും നേടിയിട്ടുണ്ട് ഈ സൂപ്പർ മാസ്ക്.

അമേരിക്കൻ വജ്രാഭരണ ബ്രാൻഡായ ‘ഇവൽ’ ജ്വല്ലറിയാണ് കോടികളുടെ ഈ മാസ്ക് നിർമ്മിച്ചിരിക്കുന്നത്. കമ്പനിയുടെ സ്ഥാപകനും ഉടമസ്ഥനുമായ ഇസാഖ് ലെവിയാണ് ഈ മാസ്ക് ഡിസൈൻ ചെയ്തിരിക്കുന്നത്. വജ്ര, സ്വർണ പണി രംഗത്തെ 41 കലാകാരന്മാർ ഒൻപത് മാസം സമയമെടുത്താണ് മാസ്ക് നിർമിച്ചിരിക്കുന്നതാ തന്നെ.