ഒരു ചെറിയ തമാശ വീഡിയോ... അതിന് പിന്നാലെ ഒരു മാസം തടവും നാടുകടത്തലും! യുഎഇയിൽ പ്രവാസി യുവതിക്ക് ലഭിച്ച ശിക്ഷ ഇപ്പോൾ സോഷ്യൽ മീഡിയ ഉപയോക്താക്കൾക്കിടയിൽ വലിയ മുന്നറിയിപ്പാവുകയാണ്.

ദുബായിലാണ് സംഭവം. കുടുംബത്തിലെ ഒരു ചടങ്ങിനിടെ ബന്ധുവായ അഞ്ച് വയസ്സുകാരിയുടെ വീഡിയോയാണ് യുവതി മൊബൈലിൽ പകർത്തിയത്. ഭക്ഷണത്തിന്റെ പേര് പറയുന്നതിനിടെ കുട്ടി അത് തെറ്റായി ഉച്ചരിക്കുന്നതും ഇതുകേട്ട് ചുറ്റുമുള്ളവർ ചിരിക്കുന്നതുമായിരുന്നു വീഡിയോയിലെ രംഗം. ഈ ദൃശ്യങ്ങൾ യുവതി തന്റെ പൊതുവായ സ്നാപ്ചാറ്റ് അക്കൗണ്ടിൽ പങ്കുവച്ചു. പിന്നാലെ 11,000ത്തിലധികം പേർ വീഡിയോ കാണുകയും മറ്റ് സോഷ്യൽ മീഡിയ പ്ലാറ്റ്‌ഫോമുകളിലേക്കും ദൃശ്യങ്ങൾ വ്യാപിക്കുകയും ചെയ്തു.

എന്നാൽ മകളുടെ വീഡിയോ ശ്രദ്ധയിൽപ്പെട്ട പിതാവ് ഇതിനെതിരെ രംഗത്തെത്തി. തന്റെ അനുമതിയില്ലാതെ കുട്ടിയുടെ ദൃശ്യങ്ങൾ പരസ്യപ്പെടുത്തിയെന്നും കുട്ടിയുടെ സ്വകാര്യതയെയും മാനസിക ക്ഷേമത്തെയും ബാധിക്കുമെന്നും ചൂണ്ടിക്കാട്ടി അധികൃതർക്ക് പരാതി നൽകി. തുടർന്നാണ് യുവതിക്കെതിരെ നിയമനടപടി ഉണ്ടായത്.

യുഎഇയിലെ സൈബർ കുറ്റകൃത്യങ്ങൾ തടയുന്നതിനുള്ള 2021ലെ നിയമവും കുട്ടികളുടെ അവകാശങ്ങൾ സംരക്ഷിക്കുന്ന വദീമ നിയമവും പ്രകാരമാണ് കേസ്. കോടതി യുവതിക്ക് ഒരു മാസത്തെ തടവുശിക്ഷയും തുടർന്ന് രാജ്യത്തുനിന്ന് നാടുകടത്താനും ഉത്തരവിട്ടു.

കുടുംബത്തിലെ തമാശയോ നിഷ്കളങ്കമായൊരു വീഡിയോയോ ആണെന്ന് കരുതി കുട്ടികളുടെ ദൃശ്യങ്ങൾ സമൂഹമാധ്യമങ്ങളിൽ പങ്കുവയ്ക്കുമ്പോൾ ശ്രദ്ധിക്കണം. മാതാപിതാക്കളുടെ അനുമതിയില്ലാതെ കുട്ടികളുടെ ചിത്രങ്ങളും വീഡിയോകളും പരസ്യപ്പെടുത്തുന്നത് യുഎഇയിൽ ഗുരുതരമായ നിയമപ്രശ്നങ്ങൾക്ക് വഴിവയ്ക്കുമെന്ന മുന്നറിയിപ്പാണ് ഈ സംഭവം നൽകുന്നത്.