തീവ്രവാദം തടയാന് രാജ്യന്തര തലത്തില് ശ്രമങ്ങള് ശക്തിപ്പെടുത്തണമെന്ന് ബഹ്റൈന്
പ്രധാനമന്ത്രി ഖലീഫ ബിന് സല്മാന് അല് ഖലീഫയുടെ അധ്യക്ഷതയില് ചേര്ന്ന മന്ത്രിസഭാ യോഗത്തിലാണ് തീവ്രവാദ പ്രവര്ത്തനങ്ങള് ചെറുക്കാന് രാജ്യാന്തര തലത്തില് ശ്രമങ്ങള് ശക്തിപ്പെടുത്തണമെന്ന് അദ്ദേഹം അഭിപ്രായപ്പെട്ടത്. ഇത്തരം സംഭവങ്ങള് ആവര്ത്തിക്കാതിരിക്കാന് ആവശ്യമായ സുരക്ഷാ മുന്കരുതലുകള് സ്വീകരിക്കാന് ഈജിപ്തിനു പൂര്ണ പിന്തുണ പ്രഖ്യാപിച്ചു. അറബ് ലീഗ് ഏര്പ്പെടുത്തിയ 'ഡെവലപ്മെന്റ് ആക്ഷന് അവാര്ഡ്' ലഭിച്ച പ്രധാനമന്ത്രിയെ മന്ത്രിസഭ അഭിനന്ദിച്ചു. ബഹ്റൈന്റെ സാമ്പത്തിക, നിക്ഷേപ, വ്യവസായ മേഖലകളിലെ മുന്നേറ്റത്തിനു പ്രധാനമന്ത്രിയുടെ നയസമീപനങ്ങള് കാരണമായിട്ടുണ്ടെന്ന് ഉപപ്രധാനമന്ത്രി ഷെയ്ഖ് മുഹമ്മദ് ബിന് മുബാറക് അല് ഖലീഫ പറഞ്ഞു.
രാജാവ് ഹമദ് ബിന് ഈസ അല് ഖലീഫയുടെ നേതൃത്വത്തില് രാജ്യം കൂടുതല് മുന്നേറ്റം കൈവരിക്കട്ടെയെന്നും ആശംസിച്ചു. രാജ്യത്തു നിക്ഷേപം നടത്താനുദ്ദേശിക്കുന്നവര്ക്ക് ആവശ്യമായ സൗകര്യങ്ങള് ഉറപ്പാക്കുന്നതു സംബന്ധിച്ചു മന്ത്രിസഭ ചര്ച്ച ചെയ്തു. ഈ മേഖലയിലെ വിവിധ സംവിധാനങ്ങള് വിലയിരുത്താനും ആവശ്യമായ പരിഷ്കരണങ്ങള് വരുത്താനും പ്രധാനമന്ത്രി നിര്ദേശിച്ചു. സിവില്വ്യാപാര തര്ക്കങ്ങളില് കാലതാമസമില്ലാതെ വിധിയുണ്ടാകുന്ന തരത്തില് നിയമം പരിഷ്കരിക്കുന്നതിനെക്കുറിച്ചു മന്ത്രിസഭ ചര്ച്ച ചെയ്തു.
ഇതിന്റെ അടിസ്ഥാനത്തില് കോടതി വ്യവഹാരങ്ങളിലും തെളിവുകള് പരിശോധിക്കുമ്പോഴും ആധുനിക സാങ്കേതികവിദ്യകള് ഉപയോഗപ്പെടുത്താന് നിര്ദേശിച്ചു. റോഡ് ഗതാഗത മേഖലയില് പരിഷ്കരണം കൊണ്ടുവരുന്നതിനെക്കുറിച്ച് സഭ ചര്ച്ച ചെയ്തു. വ്യക്തികള്ക്കും കമ്പനികള്ക്കും കാള് ടാക്സി സര്വീസ് നടത്തുന്നതിന് അംഗീകാരം നല്കാന് തീരുമാനമായി. ഇതുമായി ബന്ധപ്പെട്ട ലൈസന്സ് നല്കുന്നതിനാവശ്യമായ നിയമങ്ങളില് പരിഷ്കരണം നിര്ദേശിക്കുന്നതിനു നിയമകാര്യ മന്ത്രാലയ സമിതിയെ ചുമതലപ്പെടുത്തി. മന്ത്രിസഭാ യോഗ തീരുമാനങ്ങള് സെക്രട്ടറി ഡോ. യാസിര് ബിന് ഈസ അന്നാസിര് വിശദീകരിച്ചു.
https://www.facebook.com/Malayalivartha
