സസ്‌പെൻഷനിൽ ആണെങ്കിലും മുൻ മുഖ്യമന്ത്രിക്ക് തനിക്ക് വേണ്ടി കുറച്ചു ചെറുപ്പക്കാരുടെ തല തല്ലിപൊട്ടിച്ച ഗൺമാൻമാരോടുള്ള സ്നേഹത്തിനും പരിഗണയ്ക്കും ഒരു കുറവുമില്ല. പ്രതിപക്ഷ നേതാവ് പിണറായി വിജയൻ തിരുവനന്തപുരത്തായിരിക്കെ, അദ്ദേഹത്തിന്റെ ഔദ്യോഗിക അകമ്പടി വാഹനത്തിൽ മുൻ ഗൺമാൻ അനിൽകുമാർ പത്തനാപുരത്തേക്ക് യാത്ര ചെയ്ത സംഭവമാണ് ഗുരുതര വീഴ്ചയെന്ന് ഇന്റലിജൻസ് റിപ്പോർട്ട് ഇപ്പോൾ പുറത്തു വന്നിരിക്കുന്നത് . ഡിജിപി വിശദമായ അന്വേഷണത്തിന് ഉത്തരവിട്ടിരിക്കുകയാണ്. കഴിഞ്ഞ ഞായറാഴ്ച എറണാകുളത്ത് പിണറായി വിജയന് പരിപാടി നിശ്ചയിച്ചിരുന്നു.

എന്നാൽ ട്രെയിനിൽ വന്നോളാമെന്ന് അദ്ദേഹം അറിയിച്ചതിനെ തുടർന്ന് ഔദ്യോഗിക കാറുമായി ഡ്രൈവർ നേരത്തെ എറണാകുളത്തേക്ക് പോയിരുന്നു. പിന്നീട് പരിപാടി റദ്ദാക്കിയതോടെ പിണറായി എറണാകുളം യാത്ര റദ്ദാക്കുകയാണുണ്ടായത്. തുടർന്ന് താൻ ഒറ്റയ്ക്ക് തിരികെ വരുമ്പോൾ മുൻ ഗൺമാറായ അനിൽകുമാറിന് കാറിൽ ലിഫ്റ്റ് നൽകുകയായിരുന്നുവെന്നാണ് ഡ്രൈവറും പൊലീസുകാരനുമായ സിനോജിന്റെ വിശദീകരണം.എന്നാൽ ഈ വിശദീകരണം വിചിത്രമാണെന്നാണ് ഇന്റലിജൻസ് വിഭാഗത്തിന്റെ വിലയിരുത്തൽ. അനിൽകുമാർ മാത്രമല്ല, നവകേരള യാത്രയ്ക്കിടെ യൂത്ത് കോൺഗ്രസ് - കെ.എസ്.യു പ്രവർത്തകരെ മർദ്ദിച്ച കേസിലെ പ്രതിയും സസ്പെൻഷനിലുമായ

മറ്റൊരു ഗൺമാൻ സന്ദീപും ഈ കാറിലുണ്ടായിരുന്നു എന്ന് ഇന്റലിജൻസ് കണ്ടെത്തിയിട്ടുണ്ട്.അതായത് ഇപ്പോഴത്തെ ഡ്രൈവറും പോലീസുമായ സിനോജ് പറയുന്നത് കേട്ടാൽ തോന്നും വരുന്ന വഴിയിൽ ഈ രണ്ടു ഗണ്മാൻമാരെയും കണ്ടു അപ്രതീക്ഷിതമായ കൂടി കാഴ്ചയായിരുന്നു . അതുകൊണ്ട് അവരോടും കൂടെ വണ്ടിയിൽ കയറിക്കൊള്ളാൻ പറഞ്ഞു..അങ്ങനെയാണ് അവർ കയറിയത് എന്നത് പോലെയാണ് സംസാരം കേട്ടാൽ തോന്നുക. പിണറായി മുഖ്യമന്ത്രിയായിരിക്കെ നവകേരള യാത്രയ്ക്കിടെ യൂത്ത് കോണ്‍ഗ്രസ്, കെഎസ്യു പ്രവര്‍ത്തകരെ സുരക്ഷാസംഘം മര്‍ദിച്ച സംഭവവുമായി ബന്ധപ്പെട്ട 'രക്ഷാപ്രവര്‍ത്തനം' കേസിലെ പ്രതിയാണ് അനില്‍കുമാര്‍. ഈ കേസില്‍ നിലവില്‍ സസ്പെന്‍ഷനിലാണ്.

പ്രതിപക്ഷ നേതാവായ പിണറായിക്ക് സര്‍ക്കാര്‍ അനുവദിച്ച മൂന്ന് വാഹനങ്ങളില്‍ ഒന്നാണ് അനില്‍കുമാര്‍ ഉപയോഗിച്ചതെന്നാണ് വിവരം. തിങ്കളാഴ്ച എം.സി റോഡിലൂടെ പത്തനാപുരത്തെത്തിയ വാഹനം അവിടെയൊരു ജ്യൂസ് കടയ്ക്കു സമീപം നിര്‍ത്തിയപ്പോഴാണ് നാട്ടുകാര്‍ ശ്രദ്ധിച്ചത്. തുടര്‍ന്ന് പൊലീസിനെ വിവരം അറിയിക്കുകയായിരുന്നു.പ്രതിപക്ഷ നേതാവിന്റെ ഔദ്യോഗിക വാഹനം അദ്ദേഹത്തിന്റെ ആവശ്യത്തിനല്ലാതെ ഉപയോഗിച്ചത് ചട്ടലംഘനമാണെന്നാണ് ഇന്റലിജന്‍സ് റിപ്പോര്‍ട്ടിലുള്ളത്.

അനില്‍കുമാര്‍ നിലവില്‍ പിണറായിയുടെ സ്റ്റാഫിലില്ലെന്നും റിപ്പോര്‍ട്ടില്‍ ചൂണ്ടിക്കാട്ടുന്നു.പ്രതിപക്ഷ നേതാവ് പിണറായി വിജയന്റെ സുരക്ഷയ്ക്കായി അനുവദിച്ച ഔദ്യോഗിക എസ്കോർട്ട് ഇന്നോവ കാർ എടുത്തുമാറ്റി അനിൽകുമാറും മറ്റ് രണ്ടുപേരും പത്തനാപുരം, ഏനാത്ത് ഭാഗങ്ങളിൽ സന്ദർശനം നടത്തിയെന്നായിരുന്നു ഇന്റലിജൻസിന്റെ പ്രാഥമിക റിപ്പോർട്ടില്‍ വ്യക്തമാക്കിയിരുന്നത്. പൊലീസിൽ നിന്ന് ജൂൺ മാസം മുതൽ സസ്പെൻഷനിൽ കഴിയുന്ന അനിൽകുമാറിന് ഔദ്യോഗിക വാഹനമോ സ്റ്റാഫ് ആനുകൂല്യങ്ങളോ ഉപയോഗിക്കാൻ നിയമപരമായ അവകാശവുമില്ലെന്നിരിക്കെയാണ് ഈ ഗുരുതര ചട്ടലംഘനം നടത്തിയതെന്നും കണ്ടെത്തിയിരുന്നു.

പത്തനാപുരത്ത് കരിക്കിൻ ജ്യൂസ് കുടിക്കാൻ വാഹനം നിർത്തിയപ്പോഴാണ് നാട്ടുകാർ ഇത് ശ്രദ്ധിക്കുകയും പൊലീസിൽ വിവരം അറിയിക്കുകയും ചെയ്തത്. പോലീസ് ആസ്ഥാനത്ത രജിസ്റ്റര്‍ ചെയ്താണ് ഈ വാഹനം.