27-ാമത് അബുദാബി രാജ്യാന്തര പുസ്തകമേളയ്ക്ക് പ്രൗഢഗംഭീരമായ തുടക്കം
അബുദാബി നാഷണല്‍ എക്‌സിബിഷന്‍ സെന്ററില്‍ ടൂറിസം സാംസ്‌കാരിക അഥോറിറ്റിയുടെ ആഭിമുഖ്യത്തില്‍ നടക്കുന്ന 27-ാമത് അബുദാബി രാജ്യാന്തര പുസ്തകമേളയ്ക്ക് പ്രൗഢഗംഭീരമായ തുടക്കം. 'വായന ഭാവി നിര്‍ണയിക്കും' എന്നതാണ് ഇതിലെ പ്രമേയം. മേള യുഎഇ വൈസ് പ്രസിഡന്റും ആഭ്യന്തര മന്ത്രിയുമായ ഷെയ്ഖ് സൈഫ് ബിന്‍ സായിദ് അല്‍ നഹ്യാന്‍ ഉദ്ഘാടനം ചെയ്തു. ഉദ്ഘാടനത്തിനുശേഷം വിവിധ പവലിയനുകളും അദ്ദേഹം സന്ദര്‍ശിച്ചു. മുപ്പതിലധികം ഭാഷകളിലായി അഞ്ചു ലക്ഷത്തിലധികം പുസ്തകങ്ങളാണ് ഇത്തവണത്തെ പുസ്തകമേളയില്‍ പ്രദര്‍ശിപ്പിച്ചിരിക്കുന്നത്. 800ലധികം ചര്‍ച്ചാവേദികള്‍, സെമിനാറുകള്‍ എന്നിവ ഉള്‍പ്പെടെ വൈവിധ്യമാര്‍ന്ന പ്രവര്‍ത്തനങ്ങള്‍ ഇത്തവണത്തെ പുസ്തകമേളയിലേക്ക് വരുംദിവസങ്ങളില്‍ വിദ്യാര്‍ഥികളെയും പൊതുജനങ്ങളെയും ആകര്‍ഷിക്കും.
വൈവിധ്യമാര്‍ന്ന സാംസ്‌കാരിക പരിപാടികള്‍ക്കു പുറമെ ഇലക്ട്രോണിക് പ്രസിദ്ധീകരണങ്ങള്‍, ഡിജിറ്റല്‍ ഉള്ളടക്കം, ഇലക്ട്രോണിക് ആപ്ലിക്കേഷനുകളും പ്രസിദ്ധീകരണ ലോകത്തിലെ ഏറ്റവും പുതിയ സാങ്കേതികവിദ്യകളും പ്രദര്‍ശന നഗരിയിലെത്തുന്നവരെ ആകര്‍ഷിക്കുന്നു. ചൈനയാണ് ഇത്തവണ പുസ്തക മേളയിലെ അതിഥി രാജ്യം. തത്വചിന്തകന്‍ ഷെയ്ഖ് മുഹ്യുദ്ദീന്‍ ഇബ്‌നു അറബിയാണ് മേളയിലെ പ്രധാന വ്യക്തിത്വം. ഇബ്‌നു അറബിയുടെ അറബ് സംഗീതം, ബൗദ്ധികമായ തീസിസുകള്‍, കവി അരങ്ങ് എന്നിവയും പുസ്‌തോല്‍സവ നഗരിയിലെത്തുന്നവര്‍ക്ക് ആസ്വദിക്കാനാവുന്നു. അബുദാബി ടൂറിസം സാംസ്‌കാരിക അതോറിറ്റിയുടെ ഏറ്റവും പ്രധാന വാര്‍ഷിക പദ്ധതികളില്‍ ഒന്നാണ് ലോക പ്രസിദ്ധീകരണ മേഖലയില്‍ നിന്നുള്ള ഏറ്റവും പുതിയതും വിപുലവുമായ ഗ്രസ്ഥശേഖരങ്ങള്‍ പ്രദര്‍ശിപ്പിക്കുന്ന അബുദാബി രാജ്യാന്തര പുസ്തകമേള.
പുസ്തകമേളയിലെത്തുന്നവര്‍ക്ക് വായനയും എഴുത്തും സെമിനാറുകളും ആസ്വദിക്കാന്‍ പ്രത്യേക അവസരവും ഒരുക്കിയിട്ടുണ്ട്. വിദ്യാര്‍ഥികളിലും യുവാക്കളിലും വായനാ താല്‍പര്യവും പ്രതിബദ്ധതയും വര്‍ധിപ്പിക്കാന്‍ സഹായകമാണിതെന്ന് സംഘാടകര്‍ പറഞ്ഞു. മിഡില്‍ ഈസ്റ്റ്, യൂറോപ്പ്, ഏഷ്യ, വടക്കേ ആഫ്രിക്ക, വടക്കേ അമേരിക്ക എന്നിവിടങ്ങളില്‍ നിന്നുള്ള ഒട്ടേറെ പ്രമുഖ നോവലിസ്റ്റുകള്‍, രചയിതാക്കള്‍, ഗ്രാഫിക് ഡിസൈനര്‍മാര്‍, ലേഖനം എഴുതുന്നവര്‍, സാമൂഹിക സാംസ്‌കാരിക നായകര്‍ എന്നിവര്‍ രാജ്യാന്തര പുസ്തക മേളയില്‍ പങ്കെടുക്കുന്നുണ്ട്. അടുത്തമാസം രണ്ടു വരെ രാവിലെ 9 മണി മുതല്‍ രാത്രി പത്തുവരെയാണ് മേള നടക്കുക. എന്നാല്‍ നാളെ (വെള്ളിയാഴ്ച) വൈകീട്ട് 4 മണി മുതല്‍ രാത്രി 10 മണിവരെയായിരിക്കും കിരീടാവകാശിയും യുഎഇ സായുധസേന ഡെപ്യൂട്ടി സുപ്രീം കമാന്‍ഡറുമായ ജനറല്‍ ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്റെ രക്ഷകര്‍തൃത്വത്തില്‍ മേള.
https://www.facebook.com/Malayalivartha
