സ്മാര്‍ട് ട്രാവലര്‍ സിസ്റ്റം ഹമദ് രാജ്യാന്തര വിമാനത്താവളത്തില്‍ സജ്ജമാക്കുമെന്ന് എയര്‍പോര്‍ട്ട് സുരക്ഷാവിഭാഗം അറിയിച്ചു
ഹമദ് രാജ്യാന്തര വിമാനത്താവളത്തില്‍ ഉദ്യോഗസ്ഥരുടെ സഹായമില്ലാതെ എല്ലാ യാത്രാനടപടികളും സ്വയം പൂര്‍ത്തിയാക്കാന്‍ കഴിയുന്ന സ്മാര്‍ട് ട്രാവലര്‍ സിസ്റ്റം ഹമദ് രാജ്യാന്തര വിമാനത്താവളത്തില്‍ വൈകാതെ സജ്ജമാക്കുമെന്ന് എയര്‍പോര്‍ട്ട് സുരക്ഷാവിഭാഗം ഡയറക്ടര്‍ ബ്രിഗേഡിയര്‍ ഇസ്സ അരാര്‍ അല്‍ റുമൈഹി പറഞ്ഞു. ഓണ്‍ലൈന്‍ ചെക്ക് ഇന്‍ സംവിധാനത്തിലൂടെ സീറ്റ് തിരഞ്ഞെടുക്കാനും ബാഗ് ടാഗ് പ്രിന്റ് ചെയ്യാനുമടക്കമുള്ള സൗകര്യങ്ങള്‍ നിലവിലുണ്ട്. സ്മാര്‍ട് ട്രാവലര്‍ സിസ്റ്റത്തിലൂടെ ബാഗിന്റെ ഭാരം നോക്കുക, ബോര്‍ഡിങ് പാസ് പ്രിന്റ് ചെയ്യുക, സുരക്ഷാ ഗേറ്റ് കടക്കുക, ഇഗേറ്റിലൂടെ ഇമിഗ്രേഷന്‍ നടപടികള്‍ പൂര്‍ത്തിയാക്കുക തുടങ്ങി യാത്രയുമായി ബന്ധപ്പെട്ട എല്ലാ കാര്യങ്ങളും മറ്റൊരാളുടെ സഹായമില്ലാതെ നിര്‍വഹിക്കാന്‍ കഴിയുന്ന സംവിധാനമാണിത്. ഇതിനുള്ള പ്രവര്‍ത്തനങ്ങള്‍ നടന്നുവരികയാണെന്നും വൈകാതെ സംവിധാനം പ്രാബല്യത്തില്‍ വരുമെന്നും അല്‍ റുമൈഹി പറഞ്ഞു.
സുരക്ഷാ ജീവനക്കാരുടെ സാന്നിധ്യമറിയാതെ തന്നെ സുരക്ഷാ നടപടികള്‍ പൂര്‍ത്തിയാക്കാന്‍ ഇതിലൂടെ കഴിയും. ഇതിനോടകം ആയിരത്തിലേറെ സുരക്ഷാ ജീവനക്കാര്‍ക്കു വിമാനത്താവളത്തിലെ സുരക്ഷ സംബന്ധിച്ചു പരിശീലനം നല്‍കി കഴിഞ്ഞു. കൂടുതല്‍ ഖത്തരി പൗരന്മാരെ സുരക്ഷാ വിഭാഗം ജോലികളിലേക്ക് ആകര്‍ഷിക്കാനുള്ള നടപടികളും നടന്നുവരുന്നു. ഏറ്റവും പുതിയ സാങ്കേതിക ഉപകരണങ്ങള്‍ ഉപയോഗിക്കുന്നതിലൂടെ യാത്രക്കാരെ തടഞ്ഞു നിര്‍ത്താതെ തന്നെ സുരക്ഷാ പരിശോധന നടത്താനുള്ള സംവിധാനം ഹമദില്‍ നിലവിലുണ്ട്. യാത്രക്കാരുടെ സുഗമയാത്ര തടസ്സപ്പെടുത്താതെയാണ് അവരുടെ ലഗേജ് ഉള്‍പ്പെടെ പരിശോധനയ്ക്കു വിധേയമാക്കുക. ക്യാമറയിലൂടെ ഒരോ യാത്രക്കാരനെയും നിരീക്ഷിച്ചു സുരക്ഷിതത്വം ഉറപ്പുവരുത്താനാകും. ഇതിനുള്ള പരിശീലനം ജീവനക്കാര്‍ക്കു ലഭിച്ചിട്ടുണ്ട്.
ഇമിഗ്രേഷന്‍ ഉദ്യോഗസ്ഥരുടെ സഹായമില്ലാതെ ഇമിഗ്രേഷന്‍ നടപടികള്‍ പൂര്‍ത്തിയാക്കുന്ന ഇ-ഗേറ്റ് സംവിധാനം ഈ വര്‍ഷം ആദ്യ മൂന്നുമാസത്തില്‍ 8.5 ലക്ഷം പേര്‍ ഉപയോഗിച്ചതായി വിമാനത്താവളത്തിലെ പാസ്‌പോര്‍ട്ട് വിഭാഗം ഡയറക്ടര്‍ കേണല്‍ മുഹമ്മദ് റാഷിദ് അല്‍ മസ്രൂയി പറഞ്ഞു. ചില സമയങ്ങളില്‍ ഇഗേറ്റിനു ചില സാങ്കേതിക പ്രശ്‌നങ്ങളുണ്ടാകുന്നതു ശ്രദ്ധയില്‍പെട്ടിട്ടുണ്ട്. ഇത് ഐടി വിഭാഗത്തിന്റെ സഹകരണത്തോടെ പരിഹരിക്കുമെന്നും അദ്ദേഹം പറഞ്ഞു. എന്‍ട്രി, എക്‌സിറ്റ് വിഭാഗങ്ങളില്‍ ഇലക്ട്രോണിക് സംവിധാനങ്ങള്‍ സ്ഥാപിച്ച് യാത്രക്കാര്‍ക്കു കൂടുതല്‍ സൗകര്യം ഒരുക്കുകയാണു ലക്ഷ്യം.
ട്രാവല്‍ രേഖകള്‍ പരിശോധിക്കുന്നതിനായി വകുപ്പിന് ഏറ്റവും നവീനമായ സാങ്കേതിക സംവിധാനങ്ങളുണ്ട്. വ്യാജ രേഖകള്‍ കണ്ടെത്താന്‍ കഴിയുന്ന നൂതന ഉപകരണങ്ങളാണ് ഉപയോഗിക്കുന്നത്. എല്ലാത്തരം പാസ്‌പോര്‍ട്ടുകളും ഫോമുകളും അപ്പോഴപ്പോള്‍ അപ്‌ഡേറ്റ് ചെയ്തു ഡാറ്റാബേസ് നവീകരിക്കുന്നുമുണ്ട്. രാജ്യാന്തര വ്യോമയാന സര്‍വീസുകള്‍ സുരക്ഷിതമാക്കുന്നതില്‍ ഖത്തറിനു ലോകരാജ്യങ്ങളുടെ മുന്‍പന്തിയില്‍ എത്താന്‍ കഴിഞ്ഞതു വലിയ നേട്ടമാണെന്ന് ഖത്തര്‍ ഏവിയേഷന്‍ അതോറിറ്റി ചെയര്‍മാന്‍ അബ്ദുല്ല ബിന്‍ നാസര്‍ തുര്‍ക്കി അല്‍ സുബായി പറഞ്ഞു. ഐസിഎഒ (ഇന്റര്‍നാഷനല്‍ സിവില്‍ ഏവിയേഷന്‍ ഓര്‍ഗനൈസേഷന്‍) സേഫ്റ്റി ഓഡിറ്റ് റിപ്പോര്‍ട്ടിലാണ് ഇക്കാര്യം വ്യക്തമാക്കുന്നത്.
വിമാനത്താവളങ്ങളില്‍ നിയമവിധേയമല്ലാത്ത ഇടപെടലുകള്‍ തടയുന്നതിനുള്ള സൗകര്യങ്ങളും (അനക്‌സ്9) ഹമദ് രാജ്യാന്തര വിമാനത്താവളത്തില്‍ പൂര്‍ണമായി ഏര്‍പ്പെടുത്തിയതിലൂടെ ഖത്തര്‍ 100% സ്‌കോര്‍ നേടി. അനക്‌സ്17ലെ മാര്‍ഗനിര്‍ദേശങ്ങള്‍ നടപ്പാക്കുന്നതില്‍ 99.1% ആണ് ഖത്തറിന്റെ സ്‌കോര്‍. സുരക്ഷാ മാനേജ്‌മെന്റില്‍ 96.76% ആണ് ഖത്തറിന്റെ സ്‌കോര്‍. സുരക്ഷാ വിഭാഗത്തിന്റെയും വിമാനത്താവളത്തിലെ മറ്റു വിഭാഗങ്ങളുടെയും കൂട്ടായ പരിശ്രമത്തിന്റെ ഫലമായാണ് ഹമദ് വിമാനത്താവളത്തെ ഏറ്റവും സുരക്ഷിതമായി തിരഞ്ഞെടുത്തതെന്ന് എച്ച്‌ഐഎ ചീഫ് ഓപ്പറേറ്റിങ് ഓഫിസര്‍ ബാദര്‍ മുഹമ്മദ് അല്‍ മീര്‍ പറഞ്ഞു.
https://www.facebook.com/Malayalivartha
