പഴങ്ങളും പച്ചക്കറികളും കൂടുതല് പരിശോധനയ്ക്ക് വിധേയമാക്കുമെന്ന് ആരോഗ്യമന്ത്രാലയം
ലബനന്, ഒമാന്, ഈജിപ്ത്, ജോര്ദാന് എന്നീ രാജ്യങ്ങളില് നിന്നുള്ള പഴങ്ങളും പച്ചക്കറികളുമാണ് കൂടുതല് പരിശോധനയ്ക്കു വിധേയമാക്കുന്നത്. അമിതമായ അളവില് കീടനാശിനി ഉപയോഗിക്കുന്നു എന്ന പരാതിയെ തുടര്ന്നാണിത്. ഈ രാജ്യങ്ങളില് നിന്നുള്ള പഴം, പച്ചക്കറി ഇറക്കുമതി യുഎഇ നിരോധിച്ചിരുന്നു. ഇറക്കുമതി നിരോധിക്കുന്നില്ലെങ്കിലും പകരം കൂടുതല് പരിശോധനയ്ക്കു വിധേയമാക്കി ഭക്ഷ്യസുരക്ഷ ഉറപ്പാക്കുകയാണു ലക്ഷ്യം. ഇതുസംബന്ധിച്ച് ആരോഗ്യമന്ത്രാലയം തുറമുഖത്തെ അധികൃതര്ക്കു സര്ക്കുലര് അയച്ചു. പരിശോധന കഴി!ഞ്ഞ ശേഷം മാത്രം ഉല്പന്നങ്ങള് പുറത്തുവിട്ടാല് മതിയെന്നാണു നിര്ദേശം.
ഈജിപ്തില് നിന്നുള്ള വിവിധയിനം മുളക്, ജോര്ദാനില് നിന്നുള്ള മുളക്, കാബേജ്, കോളിഫ്ളവര്, ലെറ്റൂസ്, സ്ക്വാഷ്, ബീന്സ്, എഗ്പ്ളാന്റ്, ലബനനില് നിന്നുള്ള ആപ്പിള്, ഒമാനില് നിന്നുള്ള സ്വീറ്റ് മെലണ്, കാരറ്റ്, റോക്കറ്റ് സലാഡ് തുടങ്ങിയവയാണു പരിശോധന പട്ടികയിലുള്ളതെന്നു ദ് പെനിന്സുല റിപ്പോര്ട്ട് ചെയ്തു. ഇറക്കുമതി ചെയ്യുന്ന ഭക്ഷ്യസാധനങ്ങളുടെ ഗുണനിലവാരം ഉറപ്പാക്കാനുള്ള പൂര്ണനടപടികള് സ്വീകരിക്കുന്നുണ്ടെന്ന് ആരോഗ്യമന്ത്രാലയം കഴിഞ്ഞ ദിവസം അറിയിച്ചിരുന്നു.
നഗരസഭ പരിസ്ഥിതി മന്ത്രാലയം ഉള്പ്പെടെ ജോയിന്റ് ഫുഡ് കണ്ട്രോള് കമ്മിറ്റിയിലെ എല്ലാ സ്ഥാപനങ്ങളുടെയും സഹകരണത്തോടെയാണ് ഇതു നടപ്പാക്കുന്നത്. കഴിഞ്ഞ മൂന്നു മാസം 510 പഴം, പച്ചക്കറി സാംപിളുകള് കീടനാശിനി പരിശോധനയ്ക്കു വിധേയമാക്കിയെന്നും കീടനാശിനി സാന്നിധ്യം കണ്ടെത്തിയ 67 ഉല്പന്നങ്ങളുടെ വിപണനം നിരോധിച്ചെന്നും മന്ത്രാലയം അറിയിച്ചു. ഏറ്റവും ആധുനിക ഉപകരണങ്ങള് ഉപയോഗിച്ചാണു പരിശോധനയെന്നും കീടനാശിനിയുടെ നേരിയ സാന്നിധ്യം പോലും കണ്ടെത്താനാകുമെന്നും മന്ത്രാലയം അവകാശപ്പെട്ടു.
പരിശോധന കര്ശനമാക്കുന്നതോടെ പഴം, പച്ചക്കറികളുടെ നേരിയ കുറവ് വിപണിയില് പ്രതിഫലിച്ചേക്കുമെന്നാണു വ്യാപാരികളുടെ ആശങ്ക. ഇതു നേരിയ വിലക്കയറ്റത്തിനും വഴിവച്ചേക്കും. ജോര്ദാനില് നിന്നുള്ള ലെറ്റൂസാണു ഖത്തര് വിപണിയില് കൂടുതല്. അതിനാല് ഇവയുടെ പരിശോധന ലെറ്റൂസിന്റെ വിതരണത്തെ ബാധിച്ചേക്കും. യുഎഇ വഴി ഒട്ടേറെ ഭക്ഷ്യസാധനങ്ങള് ഖത്തറിലേക്ക് ഇറക്കുമതി ചെയ്യുന്നുണ്ട്. അവിടെ നിരോധനം വന്നതോടെ ഈ ഉല്പന്നങ്ങളുടെ ഇറക്കുമതിയെയും ബാധിച്ചേക്കും.
https://www.facebook.com/Malayalivartha
