കുവൈത്തില്‍ പ്രവാസികള്‍ക്ക് ബന്ധുക്കളെ കൊണ്ടുവരുന്നതിനുള്ള വിലക്ക് പിന്‍വലിച്ചേക്കും...
പ്രവാസികള്‍ക്ക് ആശ്വാസമായി കുവൈത്ത് മന്ത്രാലയം. കുവൈത്തില്‍ ബന്ധുക്കളെ ആശ്രിത വിസയില്‍ കൊണ്ടുവരുന്നതിനുള്ള വിലക്ക് ഉടന്‍ പിന്‍വലിച്ചേക്കും. മാതാപിതാക്കള്‍, സഹോദരങ്ങള്‍ തുടങ്ങിയ അടുത്ത ബന്ധുക്കള്‍ക്ക് ഉപാധികളോടെ ആശ്രിത വിസ അനുവദിക്കാനാണ് തീരുമാനം. ഇത് സംബന്ധിച്ച ഔദ്യോഗിക തീരുമാനം അടുത്തയാഴ്ച ഉണ്ടാവുമെന്നാണ് റിപ്പോര്‍ട്ടുകള്‍.
കടുത്ത നിബന്ധനകള്‍ക്ക് വിധേയമായിട്ടായിരിക്കും മാതാപിതാക്കള്‍, സഹോദരങ്ങള്‍ എന്നിവര്‍ക്ക് വേണ്ടി ആശ്രിത വിസ അനുവദിക്കുക ഒരാള്‍ക്ക് 300 ദീനാര്‍ വീതം പ്രതിവര്‍ഷം ആരോഗ്യ ഇന്‍ഷുറന്‍സ് അടക്കണം എന്നതാണ് പ്രധാന നിബന്ധന. ആദ്യവര്‍ഷം ഇഖാമ അടിക്കുന്നതിനു കൊടുക്കേണ്ട 200 ദീനാറിന് പുറമെയാണിത്. ഇന്‍ഷുറന്‍സ് കമ്പനി വഴിയായിരിക്കും ഈ തുക ഈടാക്കുക.
ഇന്‍ഷുറന്‍സ് കമ്പനിയുമായി കരാറിലെത്തുന്നതോടെ വിദേശികള്‍ക്ക് ഭാര്യയും മക്കളുമല്ലാത്തവരെ ആശ്രിത വിസയില്‍ കൊണ്ടുവരാനുള്ള അവസരം വീണ്ടും തുറക്കപ്പെടും. ആഭ്യന്തരമന്ത്രാലയത്തിലെ പാസ്‌പോര്‍ട്ട്പൗരത്വകാര്യ അണ്ടര്‍ സെക്രട്ടറി മേജര്‍ ജനറല്‍ മാസിന്‍ അല്‍ ജര്‍റാഹിനിന്റെ അധ്യക്ഷതയില്‍ ഉന്നതതല യോഗത്തിലാണ് തീരുമാനം.
കുവൈത്തിലെ സൗജന്യ ആരോഗ്യ സേവനം ലക്ഷ്യം വെച്ച് വിദേശികള്‍ പ്രായമേറിയ മാതാപിതാക്കളെ കുടുംബവിസയില്‍ കൊണ്ടുവരുന്നതായും ഇത് രാജ്യത്തിന് സാമ്പത്തിക ബാധ്യത വരുത്തുന്നതായി വിലയിരുത്തി ആയിരുന്നു അധികൃതര്‍ കുടുംബവിസയില്‍ നിയന്ത്രണം ഏര്‍പ്പെടുത്തിയത്. മാതാപിതാക്കളെയും സഹോദരങ്ങളെയും കൊണ്ടുവരാനുള്ള അനുമതി റദ്ദാക്കിയ നടപടിക്കെതിരെ വിമര്‍ശം വ്യാപകമായതോടെയാണ് ആഭ്യന്തര മന്ത്രാലയം തീരുമാനം പുനഃപരിശോധിച്ചത്.
https://www.facebook.com/Malayalivartha
