13ഡിമാന്ഡുകള് അംഗീകരിച്ചാല് ഖത്തറുമായുള്ള ബന്ധം പഴയപടിയാക്കാമെന്ന് അറബി രാജ്യങ്ങള്
ഖത്തറിന്റെ ഉടമസ്ഥതയിലുള്ള അല്-ജസീറ ടിവി ചാനല് അടച്ചുപൂട്ടുക, ഇറാനുമായുള്ള നയതന്ത്രബന്ധം കുറയ്ക്കുക എന്നിവയുള്പ്പെടെ 13 ഡിമാന്ഡുകള് അംഗീകരിച്ചാല് ഖത്തറുമായുള്ള ബന്ധം പഴയപടിയാക്കാമെന്നു നാല് അറബി രാജ്യങ്ങള് വ്യക്തമാക്കി. സൗദി അറേബ്യ, യുഎഇ, ഈജിപ്ത്, ബഹറിന് എന്നീ രാജ്യങ്ങളാണ് ഖത്തര് പ്രശ്നം പരിഹരിക്കുന്നതിനുള്ള ഡിമാന്ഡുകള് മുന്നോട്ടുവച്ചത്.
ഖത്തര് ഭീകരര്ക്കു ധനസഹായം നല്കുന്നുവെന്ന് ആരോപിച്ച് ഈ നാലുരാജ്യങ്ങള് ഉള്പ്പെടെ ഏതാനും രാജ്യങ്ങള് ഖത്തറുമായുള്ള നയതന്ത്രബന്ധം വിച്ഛേദിക്കുകയും വ്യോമ, നാവിക ഗതാഗതം തടയുകയും ചെയ്തിരുന്നു. ഇപ്പോള് മുന്നോട്ടുവച്ചിട്ടുള്ള ഡിമാന്ഡുകള് പത്തു ദിവസത്തിനകം അംഗീകരിച്ചു നടപ്പാക്കണമെന്ന് ആവശ്യപ്പെട്ടിട്ടുള്ളതിനാല് ഇത് ഫലത്തില് ഖത്തറിനുള്ള അന്ത്യശാസനമാണ്.
ഖത്തറിലുള്ള തുര്ക്കിയുടെ സൈനികത്താവളം അടയ്ക്കുക, മുസ്ലിം ബ്രദര്ഹുഡ്. ഐഎസ്, അല്ക്വയ്ദ, ഹിസ്ബുള്ള, ജബാത് ഫത്തേ അല്ഷാം തുടങ്ങിയ ഭീകര പ്രസ്ഥാനങ്ങള്ക്കുള്ള സഹായം നിര്ത്തുക തുടങ്ങിയവയാണ് മറ്റ് ആവശ്യങ്ങള്. ഈ നാലുരാജ്യങ്ങളുടെയും ആഭ്യന്തര, വിദേശകാര്യങ്ങളില് ഖത്തര് ഇടപെടരുത്. നാലു രാജ്യങ്ങളിലെയും പൗരന്മാര്ക്ക് ഖത്തറില് പൗരത്വം നല്കുന്നതും നിര്ത്തലാക്കണം. ഖത്തറിന്റെ നയം മൂലം ഈ നാലു രാജ്യങ്ങള്ക്കുമുണ്ടായ നഷ്ടം നികത്തണമെന്നതാണ് മറ്റൊരു ഡിമാന്ഡ്.
ഖത്തര് പ്രതിസന്ധി പരിഹരിക്കുന്നതിനു മധ്യസ്ഥത വഹിക്കുന്ന കുവൈറ്റ് മുഖേനയാണ് ഡിമാന്ഡുകള് ഖത്തറിനു കൈമാറിയത്. പത്തുദിവസത്തിനകം ഡിമാന്ഡുകള് അംഗീകരിച്ചെന്നു ഖത്തര് അറിയിച്ചാല് ഇവ നടപ്പാക്കുന്നതു നിരീക്ഷിക്കാനായി പ്രത്യേക സംവിധാനം ഏര്പ്പെടുത്തും. ആദ്യവര്ഷം എല്ലാ മാസവും പിന്നത്തെ വര്ഷം മൂന്നുമാസത്തിലൊരിക്കലും തുടര്ന്നുള്ള പത്തുവര്ഷക്കാലം വര്ഷത്തിലൊരിക്കലും നിരീക്ഷണറിപ്പോര്ട്ട് തയാറാക്കും.
ഡിമാന്ഡുകള് അംഗീകരിക്കാന് ഖത്തര് തയാറാവുമോ എന്ന കാര്യത്തില് നിരീക്ഷകര് സംശയം പ്രകടിപ്പിച്ചു. ഖത്തറിലെ സൈനികത്താവളം അടച്ചുപൂട്ടില്ലെന്നു തുര്ക്കി പ്രതിരോധമന്ത്രി ഫില്ക്രി ഇസികി പറഞ്ഞു. അങ്ങനെ ചെയ്യാന് നിര്ദേശിക്കുന്നത് അങ്കാറയും ദോഹയും തമ്മിലുള്ള ബന്ധത്തിലുള്ള ഇടപെടലാവും. അല്-ജസീറ ചാനല് അടച്ചുപൂട്ടാന് നിര്ബന്ധിക്കുന്നത് ജനങ്ങളുടെ അറിയാനുള്ള അവകാശത്തിന്മേലുള്ള കടന്നുകയറ്റമാണെന്നു ചാനല് അഭിപ്രായപ്പെട്ടു. ഇതിനെതിരേ പ്രതികരിക്കാന് മാധ്യമങ്ങള് രംഗത്തുവരണമെന്നും ചാനല് ആവശ്യപ്പെട്ടു.
https://www.facebook.com/Malayalivartha
