ഖത്തറിലേക്ക് പശുക്കളുമായ് ആദ്യ സംഘം പറന്നിറങ്ങി
ചരിതതിലാദ്യമായി ഖത്തറില് പാല് ചുരത്താന് പശുക്കളുമായി ആദ്യ സംഘം പറന്നിറങ്ങി. ജര്മനിയില്നിന്നു വാങ്ങിയ 165 പശുക്കളടങ്ങിയ ആദ്യസംഘം ബുഡാപെസ്റ്റ് വഴിയാണ് വിമാത്തില് ദോഹയിലെത്തിയത്. പ്രമുഖ ഡെയറി ഫാമായ ബലദ്നയാണു ഹോള്സ്റ്റെയ്ന് ഇനത്തില്പെട്ട 4000 പശുക്കളെ വിമാനമാര്ഗം ഖത്തറിലെത്തിക്കുന്നത്.
ലോക ചരിത്രത്തില് തന്നെ ആദ്യമായാണ് ഇത്രയേറെ പശുക്കളെ വിമാനമാര്ഗം ഒരു രാജ്യത്തെത്തിക്കുന്നതെന്ന് കരുതുന്നു. ദോഹ വിമാനത്താവളത്തില് ചൊവ്വാഴ്ച രാത്രിയെത്തിച്ച പശുക്കളെ ട്രക്കുകളില് അല്ഖോറിലെ ഉമ അല് ഹവയ മേഖലയിലുള്ള ബലദ്ന ഫാമിലേക്കു മാറ്റി. ഇവിടെ പശുക്കളെ പാര്പ്പിക്കാനായി ശീതീകരണ സംവിധാനമുള്ള പ്രത്യേക ഫാമാണു തയാറാക്കിയിട്ടുള്ളത്. ഓരോ മൂന്നു ദിവസത്തിലും ഇനി പശുക്കളുടെ സംഘം വിമാന മാര്ഗം ദോഹയിലെത്തുമെന്നു കമ്പനി ഉടമസ്ഥരായ പവര് ഇന്റര്നാഷനല് ഹോള്ഡിങ് വക്താവ് പറഞ്ഞു.
ജര്മനിക്കു പുറമെ, ഓസ്ട്രേലിയ, യുഎസ് എന്നിവിടങ്ങളില്നിന്നു വാങ്ങുന്ന പശുക്കളെ പൂര്ണമായും ഒരു മാസത്തിനുള്ളില് ദോഹയിലെത്തിക്കാമെന്നാണു കണക്കു കൂട്ടുന്നത്. നിലവില് എത്തിയ പശുക്കളില് നിന്നുള്ള പാല് ഒരാഴ്ചയ്ക്കുള്ളില് ബലദ്ന വിപണിയിലെത്തിക്കും. ക്ഷീര സ്വയംപര്യാപ്തതയിലേക്കു ഖത്തറിനെ നയിക്കുകയെന്ന ലക്ഷ്യത്തോടെ പവര് ഇന്റര്നാഷനല് ഹോള്ഡിങ് ചെയര്മാന് മൗത്താസ് അല് ഖയാത്തിന്റെ ആശയമാണ് വിദേശത്തെ പശുക്കളെ ഇറക്കുമതി ചെയ്യുന്നത്. ഉപരോധത്തിനു മുന്പു വരെ സൗദി അറേബ്യയില് നിന്നുള്ള ഫ്രെഷ് പാലിനെയാണു ഖത്തര് പ്രധാനമായും ആശ്രയിച്ചിരുന്നത്.
എന്നാല്, ഉപരോധത്തെ തുടര്ന്ന് സൗദിയില് നിന്നുള്ള പാല് വരവ് നിലച്ചു. ഇപ്പോള് തുര്ക്കിയില്നിന്നു വിമാനമാര്ഗമാണു ഫ്രെഷ് പാല് ഇറക്കുമതി ചെയ്യുന്നത്. ഈ സാഹചര്യത്തിലാണു കൂടുതല് പാല് ചുരത്തുന്ന ഹോള്സ്റ്റെയ്ന് പശുക്കളെ ഇറക്കുമതി ചെയ്യാന് അല് ഖയാത്ത് തീരുമാനിച്ചത്. കപ്പല് മാര്ഗം എത്തിക്കാന് സമയമെടുക്കുമെന്നതിനാല് വിമാന മാര്ഗമെത്തിക്കാന് തീരുമാനിക്കുകയായിരുന്നു. 590 കിലോ വീതം ഭാരമുള്ള ഹോള്സ്റ്റെയ്ന് പശുക്കളെ ഇറക്കുമതി ചെയ്യാന് ഖത്തര് എയര്വേയ്സിന്റെ 60 ചരക്കു വിമാനങ്ങള് വേണം. കപ്പലിലെത്തിക്കുന്നതിന്റെ അഞ്ചിരട്ടിത്തുകയും മുടക്കണം.
ദോഹയില്നിന്നു 50 കിലോമീറ്റര് വടക്കുമാറിയുള്ള ഫാം ഹൗസില് 70 ഫുട്ബോള് മൈതാനങ്ങളുടെ വിസ്തൃതിയിലാണു പശുവളര്ത്തല് കേന്ദ്രം ആരംഭിക്കുക. ഹോള്സ്റ്റെയ്ന് പശുക്കള് പ്രസവിച്ച് 305 ദിവസത്തേക്ക് പാല് ചുരത്തും. ഇത്രയും ദിവസംകൊണ്ട് കറന്നെടുക്കാനാവുന്നത് 18,000 ലീറ്റര്. അതായത് ഒരു ദിവസം ഇവ ചുരത്തുന്നത് 59 ലീറ്റര് പാലാണ്. 3.82% ആണ് കൊഴുപ്പ്. പ്രോട്ടീന്റെ അളവ് 3.21 ശതമാനവും. തന്റെ സംരംഭത്തിലൂടെ ഖത്തറിന്റെ പ്രതിദിന പാല് ആവശ്യത്തിന്റെ 30% നികത്താനാകുമെന്നാണ് അല് ഖയാത്ത് പ്രതീക്ഷിക്കുന്നത്.
https://www.facebook.com/Malayalivartha
