ഭക്ഷ്യയോഗ്യമല്ലാത്ത ഭക്ഷണ വില്പ്പന: കര്ശനശിക്ഷാനടപടികളുമായി സുല്ത്താന്
കര്ശന ശിക്ഷാവ്യവസ്ഥകള് ഉള്പ്പെടുത്തി ഒമാനി ശിക്ഷാനിയമം പരിഷ്കരിച്ച് സുല്ത്താന്റെ ഉത്തരവ് പുറത്തിറങ്ങി. മന്ത്രിസഭ കൗണ്സില് അടക്കമുള്ളവയുടെ അംഗീകാരത്തിന് ശേഷമാണ് പരിഷ്കരിച്ച ശിക്ഷാനിയമം സംബന്ധിച്ച ഉത്തരവ് സുല്ത്താന് പുറപ്പെടുവിച്ചത്. പുതിയ നിയമം ഇന്ന് മുതല് പ്രാബല്യത്തില് വരും. ഭക്ഷ്യയോഗ്യമല്ലാത്ത ഭക്ഷണം വില്പന നടത്തുന്ന വ്യക്തികളും സ്ഥാപനങ്ങളും പുതിയ നിയമപ്രകാരം പത്തുവര്ഷം വരെ തടവ് അനുഭവിക്കേണ്ടിവരും. പതിനായിരം റിയാല് പിഴയും വ്യവസ്ഥ ചെയ്യുന്നു.
കേടായ ഭക്ഷണം കഴിച്ച് ആരെങ്കിലും മരിച്ചാല് ശിക്ഷ 15 വര്ഷമായി ഉയരും. ആരെയെങ്കിലും തടഞ്ഞുവെക്കുകയോ നിയമത്തിന് വിരുദ്ധമായ ഏതെങ്കിലും രീതിയില് വ്യക്തിയുടെ അവകാശങ്ങള് ഹനിക്കുകയോ ചെയ്തതായി തെളിയുന്ന കേസുകളില് മൂന്നുമാസം മുതല് മൂന്നുവര്ഷം വരെ തടവ് ലഭിക്കും.
തട്ടിക്കൊണ്ടുപോകല് കേസുകളില് കുറ്റക്കാരെന്ന് തെളിയുന്നവര്ക്കാകട്ടെ ഏഴുവര്ഷം വരെ തടവ് ലഭിക്കും.
രാജ്യത്തിന്റെ അഭിമാനത്തെ ഹനിക്കുന്നതോ സാമ്പത്തിക മേഖലയുടെ ആത്മവിശ്വാസത്തെ മുറിപ്പെടുത്തുന്നതോ ആയ തെറ്റായ വാര്ത്തകളോ ഊഹാപോഹങ്ങളോ ബോധപൂര്വം പ്രചരിപ്പിക്കുന്നവര്ക്ക് മൂന്നുമാസം മുതല് മൂന്നുവര്ഷം വരെ തടവ് അനുഭവിക്കേണ്ടിവരും. ഒമാനില് താമസിക്കുന്നവര് രാജ്യത്തിന് പുറത്ത് ഇത്തരം പ്രവര്ത്തനങ്ങള് നടത്തുന്നതും ശിക്ഷാര്ഹമാണ്.
ഔദ്യോഗിക ജോലിക്കിടെ സര്ക്കാര് ഉദ്യോഗസ്ഥരെ കൊലപ്പെടുത്തുന്നവര്ക്ക് വധശിക്ഷയാകും ലഭിക്കുക. കൊല്ലപ്പെട്ടവരുടെ രക്തബന്ധുക്കള് മാപ്പുനല്കിയാല് ഇത് തടവുശിക്ഷയായി ചുരുങ്ങും. ഇസ്ലാമിനെയോ ഖുര്ആനെയോ പ്രവാചകന്മാരെയോ അല്ലെങ്കില് മറ്റുമതങ്ങളെയോ നിന്ദിക്കുകയോ അപമാനിക്കുകയോ ചെയ്യുന്നവര്ക്ക് മൂന്നുമുതല് പത്തുവര്ഷം വരെ തടവുശിക്ഷയാണ് വ്യവസ്ഥ ചെയ്യുന്നത്. സര്ക്കാര്, സ്വകാര്യ ഫണ്ടുകളില് തിരിമറി നടത്തുന്ന സര്ക്കാര് ജീവനക്കാര്ക്ക് മൂന്നുമുതല് അഞ്ചുവര്ഷം വരെ തടവ് ലഭിക്കും. ഇവരെ സര്വിസില്നിന്ന് പിരിച്ചുവിടുന്നതടക്കം നടപടികള്ക്കും പുതിയ ശിക്ഷാനിയമം നിര്ദേശിക്കുന്നു. ആംബുലന്സിന്റെയോ പൊതുസുരക്ഷാ വാഹനങ്ങളുടെയോ സുഗമമായ ഗതാഗതം ബോധപൂര്വം തടസ്സപ്പെടുത്തുന്നവര്ക്കും തടവ് ശിക്ഷ ലഭിക്കും.
രാജ്യത്തിന് പുറത്ത് വിധ്വംസക പ്രവര്ത്തനങ്ങള് നടത്തുകയോ ഭീകരസംഘടനകളില് ചേരുകയോ ചെയ്യുന്ന സ്വദേശികള്ക്ക് മൂന്നുമുതല് 15 വര്ഷം വരെ തടവാണ് വ്യവസ്ഥ ചെയ്യുന്നത്. ശത്രുക്കള്ക്ക് രാജ്യത്തിന് അകത്തേക്ക് കടക്കാന് സൗകര്യമൊരുക്കുകയോ വിവരങ്ങള് കൈമാറുകയോ ചെയ്യുന്നവര്ക്ക് കുറ്റം തെളിഞ്ഞാല് വധശിക്ഷ ലഭിക്കും.
https://www.facebook.com/Malayalivartha
