തൊഴിൽ മന്ത്രാലയം നൽകുന്ന വിസകൾ അനധികൃതമായി വിൽക്കുന്നവർ സൂക്ഷിച്ചോളൂ. വില്പന നടത്തുന്ന ഓരോ വിസയ്ക്കും 50,000 റിയാൽ പിഴ അടയേക്കേണ്ടി വരും. തൊഴില്‍ മന്ത്രാലയമാണ് ഇക്കാര്യമറിയിച്ചത്. വിദേശ തൊഴിലാളികളെ റിക്രൂട്ട് ചെയ്യാൻ തൊഴിൽ മന്ത്രാലയം നൽകുന്ന വിസകൾ അനധികൃതമായി വില്പ്പന നടത്തുന്നവർക്ക് വിസ ഒന്നിന് 50,000 റിയാൽ വീതം പിഴ ചുമത്തുമെന്ന് തൊഴിൽ മന്ത്രാലയം അറിയിച്ചു. വിസ കച്ചവടത്തിന് ഇടനിലക്കാരായി പ്രവർത്തിക്കുന്നവർക്കും ഇതുതന്നെയാണ് ശിക്ഷ. വിദേശ തൊഴിലാളികളുടെ പാസ്‌പോർട്ട്, ഇഖാമ, മെഡിക്കൽ ഇൻഷുറൻസ് കാർഡ് തുടങ്ങിയവ തൊഴിലാളിയുടെ അനുവാദമില്ലാതെ സൂക്ഷിക്കുന്ന തൊഴിലുടമയില്‍ നിന്ന് ഓരോ തൊഴിലാളിക്കും 2000 റിയാൽ വീതമാണ് പിഴ ഈടാക്കുന്നത്.

ആശ്രിത വിസയിലുള്ളവരെ ജോലിക്കു വെയ്ക്കുന്ന സ്ഥാപനത്തിന് 25,000 റിയാലാണ് പിഴ. അതുപോലെതന്നെ തൊഴിൽ മന്ത്രാലയത്തിന്റെ അനുവാദമില്ലാതെ, ആശ്രിത വിസയിലുള്ളവരെ ജോലിക്കു വെയ്ക്കൽ, വ്യാജ വിവരങ്ങൾ നൽകി തൊഴിൽ മന്ത്രാലയ സേവനങ്ങൾ പ്രയോജനപ്പെടുത്തൽ തുടങ്ങിയ നിയമ ലംഘനങ്ങൾക്കു 25, 000 റിയാലാണ് പിഴ. സ്വദേശി വനിതകൾക്കായി പരിമിതപ്പെടുത്തിയ തൊഴിലുകളിൽ പുരുഷന്മാരെ നിയമിക്കുന്ന സ്ഥാപനങ്ങൾക്ക് 10,000 റിയാലാണ് പിഴ.