വിസ റദ്ദാക്കി നാട്ടിലേക്ക് മടങ്ങാനിരിക്കവേ യുവാവ് ഹൃദയാഘാതം മൂലം മരണപ്പെട്ടതായി റിപ്പോർട്ടുകൾ. തൃക്കരിപ്പൂര്‍ എളമ്പച്ചി മൈതാനിയിലെ റഫീഖ് (34) ആണ് ബുധനാഴ്​ച വൈകുന്നേരം അബുദാബി ശൈഖ് ഖലീഫ ആശുപത്രിയില്‍ വച്ച് മരിച്ചത്.

15 വര്‍ഷത്തോളമായി എമിറേറ്റ്സ് ട്രാന്‍സ്പോര്‍ട്ട് കമ്പനി ജീവനക്കാരനായി പ്രവര്‍ത്തിച്ച്‌​ വരികയായിരുന്ന റഫീഖിന് മൂന്ന് ദിവസമായി ശാരീരിക അസ്വസ്ഥത അനുഭവപ്പെട്ടിരുന്നെങ്കിലും കാര്യമാക്കിയിരുന്നില്ല. എന്നാൽ ബുധനാഴ്​ച ഉച്ചക്ക്​ ശേഷം ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

കമ്പനിയില്‍ നിന്ന് രാജിവെച്ച റഫീഖ് നാട്ടിലേക്കുള്ള സാധനങ്ങളെല്ലാം വാങ്ങിവെച്ച്‌​ വിസ റദ്ദാക്കിയ പാസ്​​പോർട്ട്​ കമ്പനിയില്‍ നിന്ന് കിട്ടുന്നത്​ കാത്തിരിക്കുകയായിരുന്നു.

പരേതരായ പിലാത്തറ ഇബ്രാഹിം-ഉമ്മുകുല്‍സു ദാമ്പതികളുടെ മകനാണ് റഫീഖ്. ഭാര്യ റാഹില. നാല് വയസ്സുള്ള ഹൈഹാഷ് ഏക മകനാണ്. സഹോദരങ്ങള്‍: റഹൂഫ്, റഹ്മത്ത് (ഇരുവരും അബൂദാബി) റൈഹാനത്ത്, സുമയ്യത്ത്.