അഫ്ഗാനിസ്ഥാനില്‍ മൂന്ന് സ്ഥലങ്ങളിലായി നടന്ന താലിബാന്‍ ആക്രമണങ്ങളില്‍ 22 സുരക്ഷാ ഉദ്യോഗസ്ഥരടക്കം 25 പേര്‍ കൊല്ലപ്പെട്ടു. എട്ട് സുരക്ഷാ ഉദ്യോഗസ്ഥര്‍ക്ക് ഗുരുതരമായി പരിക്കേറ്റു. ലഖ്മാന്‍ താഴ്‌വരയിലെ സാര്‍ഇപുല്‍ പ്രവിശ്യയില്‍ സുരക്ഷാ ഉദ്യോഗസ്ഥരുടെ വാഹനവ്യൂഹത്തിനു നേരെയാണ് ആക്രമണമുണ്ടായത്. വാഹനവ്യൂഹം ഒരു മലയോരത്തേക്ക് പ്രവേശിച്ചപ്പോഴാണ് തീവ്രവാദികളുടെ ഒളിയാക്രമണം ഉണ്ടായത്.
കാബൂളില്‍ തിങ്കളാഴ്ച രാവിലെ നാറ്റോയുടെ സേനയുടെ വാഹന വ്യൂഹത്തിനു നേരെയുണ്ടായ കാര്‍ബോംബ് ആക്രമണത്തില്‍ ഒരു സാധാരണ പൗരന്‍ കൊല്ലപ്പെട്ടു. മൂന്ന് വിദേശികള്‍ക്ക് ആക്രമണത്തില്‍ പരിക്കേറ്റു. ഇവരുടെ വിവരങ്ങള്‍ പുറത്തുവിട്ടിട്ടില്ല. സ്‌ഫോടക വസ്തുക്കള്‍ നിറച്ച കാര്‍ വാഹനവ്യൂഹത്തിനു നേരെ ഇടിച്ചുകയറ്റി ചാവേര്‍ സ്‌ഫോടനം നടത്തുകയായിരുന്നു.
കിഴക്കന്‍ നന്‍ഗര്‍ഹര്‍ പ്രവിശ്യയിലെ ഒരു ക്‌ളിനിക്കിനു മുന്നിലാണ് മൂന്നാമത്തെ ആക്രമണം നടന്നത്. ചാവേര്‍ സ്‌ഫോടനമാണ് ഇവിടെയും നടന്നത്. സ്‌ഫോടനത്തില്‍ രണ്ട് പേര്‍ മരിക്കുകയും ഏഴ് പേര്‍ക്ക് പരിക്കേല്‍ക്കുകയും ചെയ്തു.
ഡിസംബറില്‍ നാറ്റോസേന പൂര്‍ണമായും പിന്‍മാറാന്‍ തയ്യാറെടുക്കുന്ന അവസരത്തിലാണ് സഖ്യസേനാംഗങ്ങളെ ലക്ഷ്യമിട്ട് ആക്രമണങ്ങള്‍ നടന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha