പ്രമുഖ ഇ-കൊമേഴ്‌സ് വെബ്‌സൈറ്റായ ആമസോണിൽ തൊഴിലാളി സമരം ശക്തമാകുന്നതായി റിപ്പോർട്ടുകൾ. മെച്ചപ്പെട്ട തൊഴില്‍ സാഹചര്യം വേണമെന്നാവശ്യപ്പെട്ട് ജര്‍മനിയിലെയും സ്‌പെയിനിലെയും ആമസോണ്‍ ജീവനക്കാരാണ് സമരത്തിന് മുന്നിട്ടിറങ്ങിയത്. അതേസമയം ക്രിസ്‌തുമസിനോടനുബന്ധിച്ച്‌ വ്യാപാരത്തില്‍ ഇളവുകള്‍ തുടങ്ങിയ ദിവസം തന്നെയാണ് തൊഴിലാളികൾ പണിമുടക്കി സമരം നടത്തുന്നതെന്നത് ശ്രദ്ദേയമാണ്.

തൊണ്ണൂറ് ശതമാനത്തോളം തൊഴിലാളികള്‍ പണിമുടക്കിയുള്ള സമരത്തില്‍ പങ്കെടുത്തതായി തൊഴിലാളി യൂണിയനുകള്‍ അവകാശപ്പെട്ടു. കടുത്ത ജോലി ഭാരമാണ് കമ്പനി തങ്ങള്‍ക്ക് മേല്‍ അടിച്ചേല്‍പ്പിക്കുന്നതെന്ന് തൊഴിലാളികള്‍ പറഞ്ഞു.

എന്നാൽ തൊഴിലാളികളുടെ സമരം ഒരു തരത്തിലും കമ്പനിയുടെ പ്രവര്‍ത്തനത്തെ ബാധിച്ചിട്ടില്ലെന്നും 620 തൊഴിലാളികള്‍ മാത്രമാണ് സമരത്തില്‍ പങ്കെടുത്തതെന്നും ആമസോണ്‍ വ്യക്തമാക്കി.