ബോളിവുഡ് താരം മമത കുല്‍ക്കര്‍ണിയെയും ഭര്‍ത്താവ് വിക്കി ഗോസ്വാമിയെയും മയക്കുമരുന്നു കേസില്‍ കുടുക്കിയത് അധോലോക നായകന്‍ ദാവൂദ് ഇബ്രാഹിമെന്ന് റിപ്പോര്‍ട്ട്. 
കഴിഞ്ഞ ദിവസമാണ് മയക്കുമരുന്ന് കേസില്‍ മമതാ കുല്‍ക്കര്‍ണിയും ഭര്‍ത്താവ് വിക്കി ഗോസ്വാമിയും കെനിയയിലെ നെയ്‌റോബിയില്‍ പിടിയിലായത്. ഇവരെ പിടികൂടാന്‍ കെനിയന്‍ പൊലീസിന് സഹായം നല്‍കിയത് ദാവൂദ് ഇബ്രാഹിമും അദ്ദേഹത്തിന്റെ സംഘാംഗങ്ങളുമാണെന്ന് മുംബൈ പൊലീസിലെ ഒരു ഉദ്യോഗസ്ഥനാണ് വെളിപ്പെടുത്തിയത്. 
മമതയെ കെനിയന്‍ പൊലീസ് ചോദ്യം ചെയ്ത ശേഷം വിട്ടയച്ചെങ്കിലും ഭര്‍ത്താവ് വിക്കി ഗോസ്വാമി അറസ്റ്റിലാണ്.
മയക്കുമരുന്ന് കടത്തില്‍ ഈ സംഘത്തെ ദാവൂദിന്റെ ഡി കമ്പനി കെനിയന്‍ പൊലീസിന് ഒറ്റു കൊടുക്കുകയായിരുന്നു. കെനിയന്‍ പൊലീസ് ഈ വിവരം അമേരിക്കന്‍ ഏജന്‍സിയായ ഡ്രഗ് എന്‍ഫോഴ്‌സ്‌മെന്റ് യൂണിറ്റിനെ അറിയിച്ചു. തുടര്‍ന്ന് സംയുക്തമായി നടത്തിയ റെയ്ഡില്‍ മമതയെയും സംഘത്തെയും കുടുക്കുകയുമായിരുന്നു. 
മയക്കുമരുന്ന് കേസില്‍ ദുബൈയില്‍ ജയില്‍ ശിക്ഷ അനുഭവിച്ചുകൊണ്ടിരിക്കുന്ന കാലത്താണ് വിക്കി ഗോസ്വാമിയെ മമത വിവാഹം ചെയ്തത്. 25 വര്‍ഷത്തെ ജയില്‍ ശിക്ഷയാണ് വിക്കിക്ക് വിധിച്ചിരുന്നതെങ്കിലും നല്ലനടപ്പ് പരിഗണിച്ച് ഇത് 15 വര്‍ഷമായി കുറച്ചു. കഴിഞ്ഞ വര്‍ഷം നവംബറിലാണ് വിക്കി ജയില്‍ മോചിതനായത്. ഇതിനു ശേഷം ഇരുവരും നെയ്‌റോബിയിലേക്ക് താമസം മാറ്റുകയായിരുന്നു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha