അമേരിക്കയിലെ ന്യുയോർക്ക് ഓഫീസുകളിൽ പടർന്നു പിടിച്ച സൈബർ ആക്രമണം അമേരിക്കയിലെ പ്രമുഖ പത്രങ്ങളായ ലോസ് ആഞ്ചലസ് ടൈസ്, ദി ഷിക്കാഗോ ട്രൈബ്യൂണ്‍, ദ ബാള്‍ട്ടിമോര്‍ സണ്‍ എന്നീ പത്രങ്ങളുടെ അച്ചടി, വിതരണം എന്നിവ മുടക്കി.

രാജ്യത്തിന് പുറത്ത് നിന്നും തുടങ്ങിയ ആക്രമണം പിന്നീട് അമേരിക്കയിലേക്ക് വ്യാപിക്കുകയായിരുന്നു. ഇത് മിക്ക പത്രങ്ങളുടെയും വിതരണം വൈകാന്‍ ഇടയാക്കിയെന്നും വിദേശ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു. വെള്ളിയാഴ്‌ചയാണ് ഓഫീസുകളിലെ കംപ്യൂട്ടറുകളില്‍ മാല്‍വെയര്‍ സാന്നിധ്യം ശ്രദ്ധിക്കപ്പെട്ടത്. എന്നാല്‍ ശനിയാഴ്‌ചയോടെ ഇത് പടരുകയായിരുന്നു.

പത്രം അച്ചടിച്ച്‌ വിതരണം ചെയ്യുന്ന ഓഫീസിലെ ബാക്ക് ഓഫീസ് സിസ്‌റ്റത്തിലാണ് വൈറസ് ആക്രമണം ഉണ്ടായതെന്ന് ട്രൈബ്യൂണ്‍ പബ്ലിഷിംഗ് വക്താവ് അറിയിച്ചു. എന്നാല്‍ ഉപഭോക്താക്കളുടെ വിവരങ്ങളും മറ്റും സുരക്ഷിതമാണ്. മറ്റ് കാര്യങ്ങള്‍ ഇപ്പോള്‍ പറയാനാകില്ലെന്നും അവര്‍ കൂട്ടിച്ചേര്‍ത്തു. അതേസമയം, വിഷയത്തില്‍ അന്വേഷണം ആരംഭിച്ച എഫ്.ബി.ഐ സംഘം വിവിധ ഓഫീസുകളിലെത്തി തെളിവുകള്‍ ശേഖരിച്ചിട്ടുണ്ട്. ആക്രമണത്തിന് പിന്നിലെ ലക്ഷ്യമെന്താണെന്ന് ഇതുവരെ വ്യക്തമായിട്ടില്ല.