നാടുവിട്ടു സൗദിയിൽ നിന്ന് ഓസ്ട്രേലിയയിലേക്കുള്ള യാത്രാമധ്യേ തായ്‌ലൻഡിലെത്തിയ സൗദി യുവതി റഹഫ് മുഹമ്മദ് അൽ ഖുനൂനി (18) ന് സംരക്ഷണമൊരുക്കി ഐക്യരാഷ്ട്ര സംഘടന. വീട്ടുകാരുടെ ശാരീരിക, മാനസിക പീഡനങ്ങളെത്തുടർന്ന് നാടുവിട്ടതാണെന്നും താൻ തിരികെ പോയാൽ അവർ എന്നെ കൊന്നു കളയുമെന്നാണ് യുവതി സമൂഹ മാധ്യമങ്ങളിലൂടെ വെളിപ്പെടുത്തിയത്.

ഈ പശ്ചാത്തലത്തിലാണ് യുവതിക്ക് സംരക്ഷണമൊരുക്കി യുഎൻ രംഗത്തെത്തിയത്. എന്നാൽ ഓസ്ട്രേലിയയിൽ അഭയം തേടാൻ സമർപ്പിച്ച അപേക്ഷയിൽ തീരുമാനമാകാൻ ദിവസങ്ങളെടുത്തേക്കും. അഭയത്തിനുള്ള അപേക്ഷ പരിഗണിച്ചുവരികയാണെന്നു ഓസ്ട്രേലിയൻ അധികൃതർ അറിയിച്ചു. യൂ എന്നിന് പുറമേ പെൺകുട്ടിക്കു വേണ്ടി മനുഷ്യാവകാശ പ്രവർത്തകരും രംഗത്തുണ്ട്.

നേരത്തെ , മതം ഉപേക്ഷിച്ച താൻ നാട്ടിലേക്കു തിരികെച്ചെന്നാൽ കൊല്ലപ്പെടുമെന്നു ഭയമുണ്ടെന്നു പറഞ്ഞ് ബാങ്കോക്കിലെ സുവർണഭൂമി വിമാനത്താവളത്തിലെത്തിയ ഖുനൂനിനുവേണ്ടി സമൂഹമാധ്യമങ്ങളിൽ സഹതാപതരംഗമുയർന്നിരുന്നു.