പറക്കുന്നതിനിടെ പൈലറ്റിന് ബോംബ് ഭീഷണി ലഭിച്ചതോടെ സിംഗപ്പൂര്‍ എയര്‍ലൈന്‍സ് വിമാനം സിംഗപ്പൂരിലെ ചാംഗി വിമാനത്താവളത്തില്‍ അടിയന്തരമായി നിലത്തിറക്കി. മുംബൈയില്‍നിന്നും 263 യാത്രക്കാരുമായി പോകുകയായിരുന്ന എസ്‌ക്യൂ 423 വിമാനമാണ് അടിയന്തരമായി നിലത്തിറക്കിയത്.

എന്നാല്‍ പിന്നീട് പരിശോധനയില്‍ ബോംബ് ഭീഷണി വ്യാജമാണെന്ന് തെളിഞ്ഞു. തിങ്കളാഴ്ച രാത്രി 11.30 ന് ആണ് വിമാനം മുംബൈയില്‍നിന്നും പുറപ്പെട്ടത്. പറന്നുയര്‍ന്നതിനു ശേഷമാണ് വിമാനത്തില്‍ ബോംബ് വച്ചിട്ടുണ്ടെന്ന സന്ദേശം എത്തിയത്. ഇതോടെ സിംഗപ്പൂര്‍ വ്യോമസേന വിമാനത്തിനു എസ്‌കോര്‍ട്ട് നല്‍കി. ചൊവ്വാഴ്ച രാവിലെ എട്ടോടെ സുരക്ഷിതമായി ചാംഗി വിമാനത്താവളത്തില്‍ വിമാനം ഇറക്കി. എല്ലാ യാത്രക്കാരെയും സുരക്ഷിതരായി പുറത്തിറക്കി.
വിമാനത്തില്‍ അധികൃതര്‍ സുരക്ഷാ പരിശോധന നടത്തി. സംഭവുമായി ബന്ധപ്പെട്ട് കുട്ടിയുമായി ഒരു യുവതിയെ ചോദ്യം ചെയ്യാന്‍ കസ്റ്റഡിയിലെടുത്തിട്ടുണ്ട്.