മുതലയെ ആരാധിക്കാനും ഒരു ക്ഷേത്രം. ഈജിപ്തില്‍ കൊമംബോ എന്ന സ്ഥലത്തു നൈല്‍നദിക്കരയില്‍ സ്ഥിതിചെയ്യുന്ന ഈ ക്ഷേത്രം കെട്ടുകഥകള്‍കൊണ്ടു മൂടപ്പെട്ടിരിക്കുന്നു. പുരാതനകാലത്ത് ഈജിപ്തിലാണ് മുതലകളുടെ ആക്രമണത്തില്‍നിന്നു രക്ഷനേടാന്‍വേണ്ടി അവര്‍ മുതലയ്ക്ക് അമ്പലം പണിതത്. മുതലയെ പ്രീതിപ്പെടുത്തി ആരാധിച്ചാല്‍ ഇതിന്റെ ആക്രമണത്തില്‍നിന്നു രക്ഷപ്പെടാം എന്ന ചിന്തമൂലമാണ് അമ്പലം പണിതത്. മുതലയ്ക്കും പുനര്‍ജന്മമുണ്ടെന്നു വിശ്വസിച്ച അവര്‍ മുതലകളെയും മമ്മിയാക്കി സൂക്ഷിച്ചിരുന്നു.

ഗ്രീക്ക്-റോമന്‍ അധിനിവേശകാലത്ത് നിര്‍മിച്ച ക്ഷേത്രസമുച്ചയത്തില്‍ കണ്ണാടിയിലെ പ്രതിബിംബംപോലെ ഇടതു-വലതു വശങ്ങളിലായി രണ്ടു ക്ഷേത്രങ്ങളാണുള്ളത്. മുതലദൈവമായ സോബക്കിനും പക്ഷിദൈവമായ ഹോറസിനുമാണ് ഈ ക്ഷേത്രങ്ങള്‍. ഗ്രീക്ക് ഭാഷയില്‍ \'ഓമ്പോസ് എന്ന പേരില്‍ ഒരിക്കല്‍ ഖ്യാതിനേടിയ ഈ പ്രദേശം അറബി ഭാഷയിലിപ്പോള്‍ \'കൊമംബോ എന്നാണറിയപ്പെടുന്നത്.

പൗരാണിക കാലത്തെ ഈജിപ്തുകാരുടെ വിശ്വാസപ്രകാരം എല്ലാ ദുഷ്ടസ്വഭാവങ്ങളുമുള്ള ഒരു ചെകുത്താനാണ് സേത്. ഹോറസ് ദൈവത്തിന്റെ ആജന്മശത്രുവും. അവരുടെ ശത്രുത എണ്‍പതു വര്‍ഷത്തോളം നീളുകയും പലതവണ അവര്‍ യുദ്ധത്തിലേര്‍പ്പെടുകയും ചെയ്തിട്ടുണ്ട്. ചതിയില്‍ സമര്‍ഥനായ സേത് ഒരിക്കല്‍ ഹോറസിന്റെ ഇടതുകണ്ണ് ചൂഴ്‌ന്നെടുത്തു. സേതിന്റെ മുന്‍കാല് മുറിച്ച് വൃഷണവും ചതച്ചാണ് ഹോറസ് പ്രതികാരം വീട്ടിയത്. ഇതു തനിക്കുകിട്ടിയ ഒരു വലിയ ശിക്ഷയായി സേത് കരുതി. ഈ സംഭവത്തിനുശേഷം സേത് സ്വയം ചില മാറ്റങ്ങള്‍ക്കു വിധേയനായി. അതുകൊണ്ട് പിന്നീടൊരു യുദ്ധത്തിനു സേത് തയാറായില്ല.

സര്‍വശക്തിയും ക്ഷയിച്ച സേത്, പിടിച്ചുനില്‍ക്കാനാകാതെ ഹോറസിന്റെ കണ്ണ് തിരിച്ചുകൊടുത്തു. പിന്നീട് ശത്രുപക്ഷത്തുനിന്നു പിന്മാറിയ സേത്, കൂടെയുള്ളവരുമായി മുതലകളായി രൂപം മാറി രക്ഷപ്പെട്ടു. അവരാണ് കൊമംബോയിലെ മുതലകള്‍ എന്നാണ് സങ്കല്പം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha