അബുബക്കര്‍ അല്‍ ബാഗ്ദാദിയുടെ മരണം ഇസ്ലാമിക് സ്റ്റേറ്റ്(ഐഎസ്) ഐഎസ് സ്ഥിരീകരിച്ചു. 'പലവട്ടം കൊല്ലപ്പെട്ട' തങ്ങളുടെ തലവന്റെ മരണം ആദ്യമായാണ് ഐഎസ് സ്ഥിരീകരിക്കുന്നത്. പുതിയ നേതാവായി അബു ഇബ്രാഹിം അല്‍ ഹാഷിമി അല്‍ ഖുറേഷിയെ തെരഞ്ഞെടുത്തതായി ഐഎസ് പുറത്തിറക്കിയ ഓഡിയോയില്‍ പറയുന്നു. ടെലിഗ്രാമിലൂടെയാണ് സന്ദേശം പുറത്തുവിട്ടത്. ഭീകരസംഘടനയുടെ വക്താവ് അബു അല്‍ ഹസന്‍ അല്‍ മുഹാജിറും കൊല്ലപ്പെട്ടതായി ഐഎസ് സ്ഥിരീകരിച്ചു.
ബാഗ്ദാദിക്കായി നടത്തിയ റെയ്ഡിനു ശേഷം യുഎസും സിറിയന്‍ കുര്‍ദിഷ് സൈന്യവും ചേര്‍ന്നു നടത്തിയ ആക്രമണത്തിലാണ് അബു അല്‍ ഹസന്‍ കൊല്ലപ്പെട്ടത്. പുതിയ നേതാവിന്റെ പേര് വ്യാജമാണെന്നാണ് കരുതുന്നത്. സുരക്ഷാ സേനയ്ക്കു ഹാഷിമിയുടെ പേര് അറിയില്ല. പുതിയ നേതാവിന്റെ കൂടുതല്‍ വിവരങ്ങളും ചിത്രങ്ങളും പുറത്തുവിടാനും ഐഎസ് തയാറായില്ല. ഐഎസിലെ പ്രമുഖനായ നേതാവാണെന്ന് മാത്രമാണ് പുറത്തുവിട്ട വിവരം. ഹാഷിമി വെറ്ററന്‍ ജിഹാദി പോരാളിയാണെന്നും അമേരിക്കയ്‌ക്കെതിരെ മുന്‍പ് പോരാടിയിട്ടുണ്ടെന്നും ഐഎസ് പറയുന്നു.