യുഎസ് സ്വദേശിനിയായ ബ്രാറ്റ്‌ലി എന്ന യുവതിയ്ക്ക്, വിവാഹ ബന്ധം വേര്‍പെടുത്തിയതിന് ഭര്‍ത്താവിന് നഷ്ടപരിഹാരത്തുക നല്‍കേണ്ടി വന്നു. ഭര്‍ത്താവ് തന്നെ വഞ്ചിച്ചതിനാണ് അവര്‍ വിവാഹമോചനം ആവശ്യപ്പെട്ടത്. അതുകൊണ്ട് അയാളോടുള്ള രോഷം അടങ്ങിയിട്ടുണ്ടായിരുന്നില്ല. അതുകൊണ്ട് അയാള്‍ക്ക് കേസ് നടത്താന്‍ ചെലവായ തുകയായ 7500 യുഎസ് ഡോളര്‍ (ഏകദേശം അഞ്ച് ലക്ഷത്തി മുപ്പതിനായിരത്തോളം ഇന്ത്യന്‍ രൂപ) യുവതി നാണയത്തുട്ടുകളാക്കി, അതടങ്ങിയ 10 പെട്ടിയാണ് ഇവര്‍ കൈമാറിയത്. 159 കിലോ ഭാരം അവയ്ക്കുണ്ടായിരുന്നുവെന്നും അത് അയാള്‍ തന്നെ വഞ്ചിച്ചതിനുള്ള ശിക്ഷയാണെന്നും യുവതി സമൂഹ മാധ്യമത്തില്‍ കുറിച്ചു.

ബ്രാറ്റ്ലിയുടെ കുറിപ്പിങ്ങനെ

'' ഞാന്‍ വിവാഹം കഴിച്ച പുരുഷന്‍, അയാളുടെ ഹൃദയവിശാലത കൊണ്ട് ഒരിക്കല്‍ എന്റെ ജീവിതത്തോട് വലിയൊരു കാര്യം ചെയ്തു. അയാളുടെ ആത്മാര്‍ഥ സുഹൃത്തിന്റെ ഭാര്യയ്‌ക്കൊപ്പം കിടക്ക പങ്കിട്ടു. ആ സ്ത്രീ, അവള്‍ എന്റെ വിവാഹത്തില്‍ പങ്കെടുത്തിരുന്നു. പ്രണയത്തോടെ ഞാനെന്റെ പുരുഷന്റെ കണ്ണുകളില്‍ നോക്കുന്നതിനും, കൈകള്‍ പിടിക്കുന്നതിനും സാക്ഷിയായ അവള്‍, എന്നെന്നും ഒപ്പമുണ്ടെന്ന് ഞാന്‍ അയാള്‍ക്ക് വാക്കു നല്‍കുന്നത് കണ്ടുകൊണ്ടു നിന്ന ആ സ്ത്രീയാണ് എന്റെ ഭര്‍ത്താവിനൊപ്പം കിടക്ക പങ്കിട്ടത്. ആ വിശ്വാസ വഞ്ചന കലാശിച്ചത് എന്റെ വിവാഹമോചനത്തിലായിരുന്നു. അതിനും പുറമേ എന്തൊക്കെയോ കാരണങ്ങളാല്‍ ഞാന്‍ ഭര്‍ത്താവിന് 7500 യുഎസ് ഡോളര്‍ ( 5,30,831 ഇന്ത്യന്‍ രൂപ) നല്‍കണമെന്ന കോടതി വിധിച്ചു.കോടതി വിധി പാലിച്ചേ പറ്റൂ. അതുകൊണ്ടു തന്നെ ഞാന്‍ അയാള്‍ക്ക് പണം നല്‍കിയേ മതിയാകുമായിരുന്നുള്ളൂ. എങ്ങനെ നല്‍കും എന്ന ചിന്തയ്‌ക്കൊന്നും അവിടെയൊരു പ്രസക്തിയുമില്ല''.

രണ്ടു മക്കളുടെ അമ്മ കൂടിയായ സ്ത്രീ എങ്ങനെയൊക്കെയോ തുക സംഘടിപ്പിച്ച് അവര്‍ ബാങ്കിലെത്തി. ബാങ്കുദ്യോഗസ്ഥരോട് തന്റെ ജീവിതത്തില്‍ അനുഭവിച്ച അപമാനങ്ങളെക്കുറിച്ച് തുറന്നു പറഞ്ഞ അവര്‍ തന്റെ മനസ്സിലെ പദ്ധതിയെപ്പറ്റിയും വെളിപ്പെടുത്തി. അവരുടെ സങ്കടം കേട്ട് മനസ്സലിഞ്ഞ ബാങ്കുദ്യോഗസ്ഥര്‍ അവര്‍ക്കാവശ്യമായ സഹായങ്ങള്‍ നല്‍കാമെന്നേല്‍ക്കുകയായിരുന്നു.

നിരവധി പേര്‍ യുവതിയുടെ പ്രവര്‍ത്തിയെ പ്രശംസിച്ചിട്ടുണ്ട്. നാണയത്തുട്ടുകളുമായി വീട്ടിലേക്ക് പോകുന്ന ഭര്‍ത്താവിന്റെ മുഖഭാവം എങ്ങനെയുണ്ടാകുമെന്നും ചിലര്‍ കമന്റ് ചെയ്തിട്ടുണ്ട്.