സ്വവർഗ രതിയും ഗർഭച്ഛിദ്രവും നിയമവിധേയമാക്കിയതാണ് ഓസ്ട്രേലിയയിൽ രൂക്ഷമായ കാട്ടുതീയ്ക്ക് ഇടയാക്കിയതെന്ന വിവാദ പരാമർശങ്ങളുമായി ഓസ്ട്രേലിയയിലെ പ്രമുഖ റഗ്ബി താരം രംഗത്ത്. സ്വവർഗ പ്രണയത്തെക്കുറിച്ച് വീണ്ടും വിവാദ പരാമർശങ്ങൾ നടത്തി രംഗത്തെത്തിയത് റഗ്ബി താരം ഇസ്രായേൽ ഫോലാവൂവിന്റേതാണ്. സ്വവർഗ വിവാഹങ്ങൾക്കും ഗർഭച്ഛിദ്രത്തിനും ദൈവം നൽകിയ വിധിയാണ് കാട്ടുതീ എന്നായിരുന്നു ഫേലാവൂന്റെ പ്രസ്താവന. ട്രൂത്ത് ഓഫ് ജീസസ് ക്രെസ്റ്റ് ചർച്ച് സിഡ്നിയുടെ സോഷ്യൽ മീഡിയ പേജിൽ പോസ്റ്റ് ചെയ്ത ഒരു വീഡിയോ സന്ദേശത്തിലാണ് ഇത്തരം വിവാദ പരാമർശങ്ങൾ. 'കാട്ടുതീയും വരൾച്ചയും എത്ര വേഗമാണ് വരുന്നതെന്ന് നോക്കു.. ഇത് യാദൃശ്ചികമാണെന്നാണോ കരുതുന്നത്.. ദൈവം നിങ്ങളോട് സംസാരിക്കുകയാണ്.. നിങ്ങൾ പശ്ചാത്തപിക്കു ഓസ്ട്രേലിയ..' എന്നായിരുന്നു വാക്കുകൾ.

വൻ വിവാദങ്ങൾക്ക് വഴിവച്ച ഈ വീഡിയോയ്‌ക്കെതിരെ ഓസ്ട്രേലിയൻ പ്രസിഡന്റ് സ്കോട്ട് മോറിസൻ അടക്കമുള്ളവർ രംഗത്തെത്തിയിട്ടുണ്ട്. സ്വന്തം അഭിപ്രായങ്ങൾ പറയാൻ ഫോലാവൂവിന് അവകാശമുണ്ടെങ്കിലും അത് തീയിൽ വീടുകൾ അടക്കം കത്തിനശിച്ച ആളുകളോട് അനാദരവ് കാട്ടിക്കൊണ്ടാകരുതെന്നായിരുന്നു അദ്ദേഹത്തിന്റെ പ്രതികരണം. ക്രിസ്തീയ വിശ്വാസികളായ ഒട്ടേറെ ഓസ്‌ട്രേലിയക്കാരെ വേദനിപ്പിക്കുന്ന പരാമർശമാണിതെന്നും, അവരുടെ നിലപാട് ചിലപ്പോൾ ഇതായിരിക്കണമെന്നില്ലെന്നും പ്രധാനമന്ത്രി കൂട്ടിച്ചേർത്തു. നേരത്തെ സ്വവർഗ പ്രണയികൾ നരകത്തിലേക്ക് പോകും എന്ന പ്രസ്താവനയുടെ പേരിൽ വിവാദങ്ങളിലിടം നേടിയ ആളാണ് ഫോലാവൂ. അന്നത്തെ പരാമർശത്തിന്റെ പേരിൽ റഗ്ബി യൂണിയനിൽ നിന്ന് പുറത്താക്കപ്പെടുകയും ചെയ്തിരുന്നു. ഇതിന് പിന്നാലെയാണ് വീണ്ടും വിവാദ പരാമർശം നടത്തിയിരിക്കുന്നത്.