സൗന്ദര്യം കൂട്ടാന് ഡോക്യുമെന്ററി
തങ്ങള്ക്ക് കിട്ടിയ സൗന്ദര്യം കുറഞ്ഞുപോയെന്നോര്ത്ത് വേവലാതിപ്പെടുന്നവര് ഇത് വായിക്കുക. സൗന്ദര്യത്തെക്കാള് വലുതാണ് ആത്മവിശ്വാസമെന്ന് കാണിക്കുകയാണ് ലോകത്തിനു മുന്നില് പരിഹാസപാത്രമായ ഈ സ്ത്രീ. ഇത് ലിസി വലസ്കെസിന്. ലോകത്തിലെ ഏറ്റവും വിരൂപിയായ സ്ത്രീയെന്ന പേരില് യൂട്യൂബില് തന്നെ കുറിച്ചുള്ള ഒരു വീഡിയോയും അതിനോടൊപ്പമുള്ള കമന്റുകളും കണ്ട് തന്റെ ജീവിതം തന്നെ തുലഞ്ഞു പോയെന്ന് കരുതിയിടത്തു നിന്നാണ് ലിസി ഒരു പുനര്ജന്മം പോലെ ലോകത്തിനു മുന്നില് ഉശിരോടെ എഴുന്നേറ്റു നിന്നത്.
ഒരു ടെഡ് പ്രസംഗത്തിലൂടെ ഗംഭീരമായ രംഗപ്രവേശം നടത്തിയ ലിസി പിന്നീട് ലോകത്തിനു മുന്നില് താരമാകുന്ന കാഴ്ചയാണ് കണ്ടത്. ജീവിതത്തെ മാറ്റി മറിച്ച രണ്ടു വീഡിയോകള്ക്കു ശേഷം നിരവധി പേര്ക്ക് പ്രചോദനമായ തന്റെ ജീവിതത്തെ കുറിച്ച് പുതിയ ഒരു ഡോക്യുമെന്ററിയുമായാണ് ലിസി ഇപ്പോള് രംഗത്തു വന്നിരിക്കുന്നത്.
എ ബ്രേവ് ഹാര്ട്ട്; ദി ലിസി വലസ്കെസ് സ്റ്റോറി ഇന്ന് ടെക്സാസില് പ്രഥമ പ്രദര്ശനം നടക്കും. സൈബര് പരിഹാസങ്ങള്ക്കും ഭീഷണികള്ക്കുമിരയായ ലിസി ഒരു ഭീഷണി വിരുദ്ധ ആക്ടിവിസ്റ്റായി മാറിയ കഥയാണ് ഡോക്യുമെന്ററിയുടെ ഉള്ളടക്കം. വൈകാരികമായും ശാരീരികമായുമുള്ള ന്യൂനതകളെ മറികടന്ന്് മുന്നേറുകയും ആദ്യമായി ഭീഷണി തടയല് നിയമം കൊണ്ടുവരാന് യുഎസ് സര്ക്കാരിനെ പ്രേരിപ്പിച്ചതു വരേയുമുള്ള ലിസിയുടെ മുന്നേറ്റങ്ങള് ഈ 78 മിനിറ്റ് ഡോക്യുമെന്ററി വിശദീകരിക്കുന്നു. 17ാം വയസ്സില് യൂട്യൂബില് തന്നെ പരിഹസിക്കുന്ന വീഡിയോ ശ്രദ്ധയില്പ്പെട്ട ലിസി പുറം ലോകത്തു നിന്നും പിന്വാങ്ങി കണ്ണീരുമായി മുറിക്കുള്ളില് അഭയം തേടുകയായിരുന്നു. നാല്പ്പത് ലക്ഷത്തോളം പേര് കണ്ട ആ വിഡീയോക്കൊപ്പമുള്ള കമന്റുകളും ലിസിയെ തകര്ത്തു.
എന്നാല് നിരാശയില് നിന്നും കരകയറിയ ലിസി തന്നെ പരിഹസിച്ചവരോട് മധുരപ്രതികാരം ചെയ്യാന് തന്നെ തീരുമാനിച്ചു മുന്നിട്ടിറങ്ങുകയായിരുന്നു. അങ്ങനെയാണ് 2013ല് ടെഡ് ടോക്കില് പ്രഭാഷണം നടത്തുന്നത്. നിരവധി പേരെ പ്രചോദിതരാക്കുകയും പത്തു ലക്ഷത്തിലേറെ പേര് കാണുകയും ചെയ്ത ഈ പ്രഭാഷണം തന്റെ ജീവിതത്തെ തന്നെ മാറ്റിമറിച്ചെന്നാണ് ലിസി വിശേഷിപ്പിച്ചത്. ടെഡ് പ്രഭാഷണം നടത്താന് ലിസിയെ പ്രേരിപ്പിച്ച സാറ ഹിര്ശ് ബോര്ഡോ ആണ് പുതിയ ഡോക്യുമെന്ററി സംവിധാനം ചെയ്തിരിക്കുന്നത്. മൂന്ന് ലക്ഷത്തിലേറെ സബ്സ്െ്രെകബര്മാരുള്ള സ്വന്തം യുട്യൂബ് ചാനലിലൂടെയാണ് ലിസി പുതിയ ഡോക്യുമെന്ററിയെ പരിചയപ്പെടുത്തുന്നത്. ഡോക്യുമെന്ററിയെക്കുറിച്ചുള്ള വീഡിയോയും ലിസി തന്റെ ചാനലില് പോസ്റ്റ് ചെയ്തിട്ടുണ്ട്. ഇനി എനിക്ക് സമാധാനമായി ഉറങ്ങാമെന്ന് ഈ വീഡിയോയില് ലിസി പറയുന്നു.
ജന്മനാ തന്നെ മര്ഫന് സിന്ഡ്രോം, ലിപോഡിസ്ട്രോഫി എന്നീ ആരോഗ്യ പ്രശ്നങ്ങളുള്ള ലിസിയുടെ ശരീരം വളരെ ശോഷിച്ചാണിരിക്കുന്നത്. ശരീരത്തിലെ കൊഴുപ്പിന്റെ വ്യാപനം തടയുന്ന രോഗാവസ്ഥയാണിത്. ശരീര ഭാരവും വളരെ കുറവാണ്. ഈ രോഗാവസ്ഥമൂലമാണ് കാഴ്ചയില് ലിസിയെ ഒരു സുന്ദരിയല്ലാതാക്കുന്നത്. എന്നാല് തുറന്ന മനസ്സിന്റെ സൗന്ദര്യം കൊണ്ട് ലിസി ലോകം കീഴടക്കിയിരിക്കുകയാണിപ്പോള്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
