ഐക്യരാഷ്ട്ര സഭയുടെ ആസ്ഥാന കേന്ദ്രമുള്‍പ്പടെ സ്ഥിതി ചെയ്യുന്ന അമേരിക്കന്‍ സംസ്ഥാനത്തു മരണമടഞ്ഞാല്‍ മൃതദേഹം പോലും മോര്‍ച്ചറിയില്‍ സൂക്ഷിക്കാന്‍ കഴിയാത്ത അവസ്ഥ... മോര്‍ച്ചറിയില്‍ ഇടമില്ല , മൃതദേഹങ്ങള്‍ പാര്‍ക്കുകളില്‍ മറവ് ചെയ്യും
ഏറ്റവും ഗതികെട്ട അവസ്ഥയിലാണ് അമേരിക്കന്‍ ജനത ചെന്നെത്തിയിരിക്കുന്നത് ,പ്രത്ത്യേകിച്ചും ന്യൂയോര്‍ക്കിലെ ജനത. മരണ സംഖ്യ അനുദിനം കുത്തനെ കൂടുന്ന സാഹചര്യത്തില്‍ ,ഐക്യരാഷ്ട്ര സഭയുടെ ആസ്ഥാന കേന്ദ്രമുള്‍പ്പടെ സ്ഥിതി ചെയുന്ന ഈ അമേരിക്കന്‍ സംസ്ഥാനത്തു മരണമടഞ്ഞാല്‍ മൃതദേഹം പോലും മോര്‍ച്ചറിയില്‍ സൂക്ഷിക്കാന്‍ കഴിയാത്ത അസ്ഥയാണ് .പൊതുസ്ഥലങ്ങളായ പാര്‍ക്കുകളില്‍ മൃതദേഹം മറവു ചെയ്യാനുള്ള പുതിയ തീരുമാനമാണ് സര്‍ക്കാര്‍ കൈകൊണ്ടത്.
നിലവില്‍ പതിനായിരത്തിലേറെ മരണമാണ് അമേരിക്കയില്‍ കോവിഡ് രോഗബാധ മൂലം ഉണ്ടായിരിക്കുന്നത് .ഇതില്‍ പകുതിയിലേറെയും ന്യൂയോര്‍ക്കില്‍ നിന്നും മാത്രമുള്ളതാണ് .നിലവില്‍ ഒന്നര ലക്ഷത്തിലധികം രോഗികളാണ് ഇപ്പോള്‍ ന്യൂയോര്‍ക്കിലുള്ളത് .മൊത്തം രോഗബാധിതര്‍ മൂന്നര ലക്ഷം കടന്നിരിക്കുന്ന യു എസ്സില്‍ വാന്‍ സാമ്പത്തിക പ്രതിസന്ധി ഉള്‍പ്പടെ വേട്ടയാടുകയാണ്.
കൊറോണ വൈറസ് ഏറ്റവും വലിയ തിരിച്ചടികള്‍ സൃഷ്ടിച്ച ന്യൂയോര്‍ക്കില്‍ ദാരുണമായ അവസ്ഥകളാണ് കാണാനാകുന്നത്. ഓരോ ദിവസവും മരണസംഖ്യ കൂടുന്നതോടെ മൃതദേഹങ്ങള്‍ സംസ്‌കരിക്കാന്‍ പോലും വേണ്ട സൗകര്യങ്ങളൊരുക്കാന്‍ ബുദ്ധിമുട്ടുകയാണ് അധികൃതര്‍. ഒന്നര ലക്ഷത്തില്‍പ്പരം ആളുകളെയാണ് ന്യൂയോര്‍ക്ക് സിറ്റിയില്‍ കൊറോണ വൈറസ് പിടികൂടിയത്. നാലായിരത്തിലധികം പേര്‍ ഇതിനോടകം മരിച്ചുവെന്ന് 'ജോണ്‍സ് ഹോപ്കിന്‍സ് യൂണിവേഴ്സിറ്റി' റിപ്പോര്‍ട്ട് ചെയ്യുന്നു. ഇതില്‍ മൂവായിരം മരണവും ന്യൂയോര്‍ക്ക് സിറ്റിയില്‍ മാത്രമായിട്ടായിരുന്നുവെന്നും യൂണിവേഴ്സിറ്റി റിപ്പോര്‍ട്ട് ചെയ്യുന്നു.
ലോകരാജ്യങ്ങളില്‍ തന്നെ ഏറ്റവും അപൂര്‍വമായ ആഘാതമാണ് കോവിഡ് മഹാമാരി ഈ സാംസ്ഥാനത്ത് സൃഷ്ട്ടിച്ചിരിക്കുന്നത് .നിലവില്‍ ന്യൂയോക്കിനേക്കാള്‍ വളരെ പിന്നില്‍ നില്‍ക്കുന്ന മറ്റ് അമേരിക്കന്‍ സംസ്ഥാനങ്ങള്‍ക്ക് പോലും ഇത്രമേല്‍ ദുരിതം ഉണ്ടായിട്ടില്ല ഈ സാഹചര്യത്തിലാണ് മൃതദേഹങ്ങള്‍ സംസ്‌കരിക്കുന്നതിന് പുതിയ മാര്‍ഗങ്ങള്‍ തേടാന്‍ അധികൃതര്‍ നിര്‍ബന്ധിതരായിരിക്കുന്നത്. ശ്മശാനങ്ങളെല്ലാം ഇപ്പോള്‍ത്തന്നെ ഇടമില്ലാത്ത തരത്തിലേക്കെത്തിയിട്ടുണ്ട്. ഇതോടെയാണ് പാര്‍ക്കുകള്‍ ഉള്‍പ്പെടെയുള്ള പൊതുസ്ഥലങ്ങള്‍ മൃതദേഹങ്ങള്‍ മറവ് ചെയ്യാനായി തെരഞ്ഞെടുത്തിരിക്കുന്നത്.
എന്നാല്‍ പൊതുജനം ഈ തീരുമാനത്തെ അംഗീകരിക്കുന്നതായി സര്‍ക്കാര്‍ അവകാശവാദവും ഉന്നയിച്ചിരിക്കുകയാണ് 'മരിച്ചവരുടേയും അവരുടെ കുടുംബത്തിന്റേയും അന്തസിനോ അഭിമാനത്തിനോ ക്ഷതം സംഭവിക്കാത്ത തരത്തില്‍, മതപരമായ ആചാരങ്ങള്‍ക്ക് സൗകര്യമൊരുക്കിക്കൊണ്ട് തന്നെ സംസ്‌കാരത്തിനുള്ള എല്ലാവിധത്തിലുമുള്ള ഏര്‍പ്പാടുകള്‍ ചെയ്യും. എങ്ങനെയും ഈ പ്രതിസന്ധിയെ മറികടക്കാനാണ് ഇപ്പോള്‍ ശ്രമിക്കുന്നത്. അതിനാണ് പ്രാധാന്യം നല്‍കുന്നത്. കഴിയാവുന്നിടത്തോളം പേരെ രക്ഷപ്പെടുത്തണം. അതിന് വേണ്ടിയുള്ള പരിശ്രമങ്ങള്‍ തുടരുകയാണ് എന്നാണ് മേയര്‍ ബില്‍ ദെ പ്ലാസിയോ അഭിപ്രായപ്പെട്ടത് .
നേരത്തെ തന്നെ മരണം ന്യൂയോര്‍ക്കില്‍ 2000 കവിഞ്ഞപ്പോള്‍ മോര്‍ച്ചറികള്‍ നിറഞ്ഞു കവിഞ്ഞിരുന്നു .പ്രധാന ആശുപത്രികള്‍ക്ക് പുറമെ പല സ്ഥലങ്ങലും ആശുപത്രികളായി മാറുകയായിരുന്നു. മോര്‍ച്ചറികളില്‍ ഇനിയും മൃതദേഹങ്ങള്‍ സൂക്ഷിക്കാനുള്ള ഇടമില്ലെന്ന് നേരത്തേ ആരോഗ്യവകുപ്പ് അറിയിച്ചിരുന്നു. കൊവിഡ് 10 ബാധിച്ച് മരിച്ചവരുടെ സംസ്‌കാരം നീട്ടിവയ്ക്കുന്നത് സുരക്ഷിതമല്ലെന്നും അത് രാജ്യത്തിന് ആപത്കരമാണെന്നും അവര്‍ മുന്നറിയിപ്പ് നല്‍കിയിരുന്നു. ഇതെത്തുടര്‍ന്നാണ് പുതിയ തീരുമാനവുമായി ഭരണകര്‍ത്താക്കള്‍ രംഗത്തെത്തിയിരിക്കുന്നത്.
https://www.facebook.com/Malayalivartha
