കൊറോണാവ്യാപനത്തിന്റെ പശ്ചാത്തലത്തില്‍ നാട്ടിലേക്കു മടങ്ങാന്‍ ആഗ്രഹിക്കുന്ന പൗരന്‍മാരെ സ്വീകരിക്കാത്ത രാജ്യങ്ങളുമായുള്ള തൊഴില്‍ കരാര്‍ പുനഃപരിശോധിക്കുമെന്നു യുഎഇ. സ്വകാര്യമേഖലയിലെ തൊഴിലാളികളില്‍ താല്‍പര്യമുള്ളവരെ തിരികെ അയയ്ക്കാനുള്ള യുഎഇ നടപടികളോടു സഹകരിക്കാത്ത രാജ്യങ്ങളുമായുള്ള തൊഴില്‍ ധാരണാപത്രങ്ങള്‍ റദ്ദാക്കാന്‍ ആലോചിക്കുന്നുണ്ട്.

തിരികെപ്പോകാന്‍ ആഗ്രഹിക്കുന്ന കോവിഡ് ബാധിതരല്ലാത്ത ഇന്ത്യക്കാരെ നാട്ടിലെത്തിക്കാന്‍ തയാറാണെന്ന് യുഎഇ അറിയിച്ചിട്ടും ഇന്ത്യ പ്രതികരിച്ചിട്ടില്ല. യുഎഇ നടപടികളോടു സഹകരിക്കാത്ത രാജ്യങ്ങളുടെ റിക്രൂട്‌മെന്റ് ക്വോട്ട വെട്ടിക്കുറയ്ക്കുന്നതും പരിഗണനയിലാണെന്നു മാനവ വിഭവശേഷി സ്വദേശിവല്‍ക്കരണ മന്ത്രാലയം അറിയിച്ചു.

സൗദിയില്‍ 2 മലയാളികള്‍ ഉള്‍പ്പെടെ കോവിഡ് മരണം 59 ആയി. ഇന്നലെ മരിച്ചത് 5 വിദേശികള്‍ അടക്കം 7 പേര്‍. പുതുതായി 429 പേര്‍ക്കു കോവിഡ് സ്ഥിരീകരിച്ചതോടെ രോഗികള്‍ 4462 ആയി. ആശുപത്രിവിട്ടവര്‍ 761. രോഗബാധ കൂടിയതോടെ സൗദിയില്‍ കര്‍ഫ്യു അനിശ്ചിത കാലത്തേക്കു നീട്ടി.

കുവൈത്തില്‍ 45 ഇന്ത്യക്കാര്‍ ഉള്‍പ്പെടെ 80 പേര്‍ക്കു കൂടി കോവിഡ്. രോഗബാധിതരായ ഇന്ത്യക്കാര്‍ 679 ആയി. ആകെ രോഗികള്‍ 1234. സുഖപ്പെട്ടവര്‍ 142. മരണം 1

യുഎഇയില്‍ ഇന്നലെ മരിച്ച കോഴിക്കോട് സ്വദേശിയടക്കം മരണം 20. മലയാളികള്‍ 3. രോഗികള്‍: 3736, സുഖപ്പെട്ടവര്‍: 588. സാമ്പത്തിക മന്ത്രാലയം 94 സേവനങ്ങള്‍ക്കുള്ള ഫീസ് 25 മുതല്‍ 98% വരെ വെട്ടിക്കുറച്ചു. കോവിഡ് പശ്ചാത്തലത്തില്‍ ഓണ്‍ലൈനിലൂടെ വിവാഹച്ചടങ്ങ് നടത്താന്‍ അനുമതി.

ഖത്തറില്‍ ഇന്നലെ ഒരാള്‍ കൂടി മരിച്ചതോടെ മരണം ഏഴായി. രോഗികള്‍: 2,979. സുഖപ്പെട്ടവര്‍ 275. ബഹ്റൈനില്‍ കോവിഡ് രോഗികള്‍ 1087. സുഖപ്പെട്ടവര്‍ 557. മരണം 6.

ഒമാനില്‍ ഒരാള്‍ കൂടി മരിച്ചതോടെ കോവിഡ് മരണം 4. തലസ്ഥാനമായ മസ്‌കത്തിലാണ് ഏറ്റവും കൂടുതല്‍ കോവിഡ് ബാധിതര്‍; 490 പേര്‍. മലയാളികളടക്കം ഒട്ടേറെ ഇന്ത്യക്കാര്‍ നിരീക്ഷണത്തില്‍. ആകെ രോഗികള്‍: 599. സുഖപ്പെട്ടവര്‍ 109.