ലോകത്താകെ കോവിഡ് 19 രോഗികളുടെ എണ്ണം 33 ലക്ഷം കടന്നു. 33,00,971 പേര്‍ക്കാണ് നിലവില്‍ കോവിഡ് സ്ഥിരീകരിച്ചത്. ലോകവ്യാപകമായി 2,33,708 പേര്‍ക്കാണ് കോവിഡ് മൂലം ജീവന്‍ നഷ്ടമായത്. കോവിഡ് ബാധിച്ച 10,37,926 പേര്‍ രോഗമുക്തി നേടിയിട്ടുണ്ട്. അമേരിക്കയിലാണ് കൂടുല്‍ കോവിഡ് കേസുകളും മരണവും റിപ്പോര്‍ട്ട് ചെയ്തിരിക്കുന്നത്. 10,92,656 പേര്‍ക്കാണ് അമേരിക്കയില്‍ കോവിഡ് സ്ഥിരീകരിച്ചത്. 63,765 പേരാണ് കോവിഡ് മൂലം മരിച്ചത്. 1,51,489 പേര്‍ രോഗമുക്തി നേടി. 8,74,081 പേര്‍ ഇപ്പോഴും ചികിത്സയിലാണ്. ഇതില്‍ 15,226 പേരുടെ ആരോഗ്യനില ഗുരുതരമാണ്.

അമേരിക്ക കഴിഞ്ഞാല്‍ കൂടുതല്‍ ആളുകള്‍ കോവിഡ് ബാധിച്ചു മരിച്ചിരിക്കുന്നത് ഇറ്റലിയിലാണ്. 27,967 പേരാണ് ഇവിടെ മരിച്ചത്. 2,05,463 പേര്‍ക്കു രോഗം സ്ഥിരീകരിച്ചിരുന്നു. ഫ്രാന്‍സില്‍ 24,376 പേരും കോവിഡ് ബാധിച്ചു മരണത്തിനു കീഴടങ്ങി. ഈ രണ്ടു രാജ്യങ്ങളിലായി പുതുതായി രോഗബാധയുണ്ടാകുന്നവരുടെ എണ്ണത്തിലും മരണത്തിലും കുറവുണ്ട്. സ്‌പെയിനില്‍ മരണം 24,543ആയി. അതേസമയം യൂറോപ്പിലെ രണ്ടാമത്തെ ഉയര്‍ന്ന മരണസംഖ്യയുള്ള രാജ്യമായി ബ്രിട്ടന്‍. 26,771 പേരാണു കോവിഡിന് ഇരയായത്. ജര്‍മനിയിലും മരണസംഖ്യ 6,623 ആയി. ബെല്‍ജിയം (7,594), ഇറാന്‍ (6,028), ബ്രസീല്‍ (5,901), നെതര്‍ലന്‍ഡ് (4,795), കാനഡ (3,180), തുര്‍ക്കി (3,174), റഷ്യ (1,073) എന്നീ രാജ്യങ്ങളിലും മരണസംഖ്യ ഉയരുകയാണ്.

മരണനിരക്കും രോഗവ്യാപനവും കുറഞ്ഞതോടെ ലോക്ക്ഡൗണ്‍ ഇളവുകള്‍ക്ക് ഒരുങ്ങുകയാണു ലോക രാജ്യങ്ങള്‍. എന്നാല്‍ ഇതോടെ വൈറസ് വ്യാപനം കൂടുതല്‍ ശക്തമാവുമെന്നും ആശങ്കയുണ്ട്.