ഡെമോക്രാറ്റിക് പ്രസിഡന്റ് സ്ഥാനാര്‍ഥി ജോ ബൈഡന്റെ ജയം ഔദ്യോഗികമായി പ്രഖ്യാപിച്ച് യു.എസ് കോണ്‍ഗ്രസ്. ജനുവരി 20ന് യു.എസ് പ്രസിഡന്റായി ജോ ബൈഡന്‍ സത്യപ്രതിജ്ഞ ചെയ്ത് അധികാരമേറ്റെടുക്കും. വൈസ് പ്രസിഡന്റ് മൈക്ക് പെന്‍സാണ് നിര്‍ണായക പ്രഖ്യാപനം നടത്തിയത്.

306 ഇലക്ട്രറല്‍ വോട്ടുകളാണ് ജോ ബൈഡന്‍ നേടിയത്. പ്രസിഡന്റായി തെരഞ്ഞെടുക്കാന്‍ 270 അംഗങ്ങളുടെ പിന്തുണയാണ് വേണ്ടത്. ജോര്‍ജിയ, പെന്‍സില്‍വാനിയ, അരിസോണ, നേവാഡ, മിഷിഗണ്‍ എന്നിവിടങ്ങളിലെ ഇലക്ടറല്‍ വോട്ടുകളില്‍ റിപബ്ലിക്കന്‍ പാര്‍ട്ടി അവകാശവാദമുന്നയിച്ചുവെങ്കിലും യു.എസ് കോണ്‍ഗ്രസ് അതെല്ലാം തള്ളികളഞ്ഞു.

കഴിഞ്ഞ ദിവസം യു.എസ് കോണ്‍ഗ്രസ് സമ്മേളനത്തിനിടെ വലിയ പ്രതിഷേധവുമായി ട്രംപ് അനുകൂലികള്‍ രംഗത്തെത്തിയിരുന്നു. കാപ്പിറ്റോള്‍ ബില്‍ഡിങ്ങിലേക്ക് ഇരച്ചു കയറിയ ട്രംപിന്റെ അനുയായികള്‍ വലിയ അക്രമമാണ് അഴിച്ചുവിട്ടത്. ഇതിനെ തുടര്‍ന്ന് യു.എസ് കോണ്‍ഗ്രസ് സമ്മേളനം തടസപ്പെട്ടിരുന്നു.

ഹൗസ് ഓഫ് ചേംബറിലേക്ക് ഇരച്ചു കയറിയ ട്രംപ് അനുയായികളെ നേരിടാന്‍ പോലീസിന് ബലപ്രയോഗം മാത്രമല്ല വെടിവയ്പ് ഉള്‍പ്പെടെ നടത്തേണ്ടി വന്നുവെന്നതും യാഥാര്‍ഥ്യം. സംഭവം നിയന്ത്രണ വിധേയമായെങ്കിലും, ഇന്ത്യന്‍ സമയം രാവിലെ 11നുള്ള റിപ്പോര്‍ട്ട് പ്രകാരം നാലു പേര്‍ മരിച്ചു, 52 പേര്‍ അറസ്റ്റിലായി. നവംബറിലെ തിരഞ്ഞെടുപ്പ് തോല്‍വിക്കു പിന്നാലെ പൊട്ടലും ചീറ്റലുമായി നിന്നിരുന്ന ട്രംപ് അനുയായികള്‍ സ്‌ഫോടനാത്മകമായി പ്രതികരിക്കുന്ന കാഴ്ചയാണ് കാപ്പിറ്റോള്‍ മന്ദിരത്തില്‍ കണ്ടത്. അവിടെയുണ്ടായ വെടിവയ്പും സ്‌ഫോടന വസ്തുക്കള്‍ കണ്ടെത്തിയതും സുരക്ഷാവീഴ്ചയും വരുംനാളുകളിലും വന്‍ ചര്‍ച്ചകള്‍ക്കു വഴിയൊരുക്കുമെന്നതിലും സംശയമില്ല.