പലസ്തീന്‍ തീവ്രവാദികളുടെ റോക്കറ്റ് ആക്രമണത്തില്‍ ഇസ്രയേലില്‍ മരിച്ച മലയാളി നഴ്സിന് ആദരാഞ്ജലി അര്‍പ്പിപ്പ് ഇസ്രായേല്‍ സെലിബ്രിറ്റി ഹനന്യ നഫ്താലി രംഗത്ത് എത്തുകയുണ്ടായി. ഇസ്രായേല്‍ നഗരമായ അഷ്‌കെലോണില്‍ ഗാസയില്‍ നിന്ന് വിക്ഷേപിച്ച റോക്കറ്റ് ആക്രമണത്തില്‍ കൊല്ലപ്പെട്ട സൗമ്യയുടെ മരണം തനിക്ക് വേദന ഉണ്ടാക്കുന്നുവെന്ന് നഫ്താലി ഫേസ്ബുക്കില്‍ കുറിക്കുകയായിരുന്നു.

'എന്റെ ഹൃദയം തകരുന്നു. ഇത് സൗമ്യ സന്തോഷ്. ഇന്ത്യയില്‍ നിന്നുള്ള കെയര്‍ ടേക്കര്‍ ആയിരുന്നു അവര്‍. ഇസ്രായേല്‍ നഗരമായ അഷ്‌കെലോണില്‍ ഗാസയില്‍ നിന്ന് വിക്ഷേപിച്ച റോക്കറ്റ് പതിച്ചാണ് ഇവര്‍ കൊല്ലപ്പെട്ടത്. അവര്‍ക്ക് ഒരു ഭര്‍ത്താവും 9 വയസ്സുള്ള ഒരു കുട്ടിയും ഉണ്ടായിരുന്നു.'- എന്നും ഹനന്യ നഫ്താലി ഫേസ്ബുക്കില്‍ കുറിച്ചു.

ഇടുക്കി കീരിത്തോട് സ്വദേശിയായ നേഴ്സ് കാഞ്ഞിരംതാനം സന്തോഷിന്റെ ഭാര്യ സൗമ്യ സന്തോഷാണ് ഷെൽ ആക്രമണത്തിൽ കൊല്ലപ്പെട്ടത്. ഇസ്രായേലിലെ അഷ്കലോണിൽ കെയർ ടേക്കറായി ജോലി ചെയ്യുകയായിരുന്നു യുവതി. ആക്രമണത്തിൽ മറ്റൊരു ഇസ്രായേൽ യുവതിയും കൊല്ലപ്പെട്ടിട്ടുണ്ടെന്നാണ് വിവരം. സൗമ്യ കൊല്ലപ്പെട്ടതായി ബന്ധുക്കൾക്കാണ് ആദ്യം വിവരം ലഭിച്ചത്. ഇന്നലെ വൈകിട്ട് 5.30ന് കീരിത്തോട്ടിലുള്ള ഭർത്താവുമായി ഫോണിൽ വീഡിയോ കാൾ ചെയ്യുന്നതിനിടെ ഇസ്രായേലിലെ ഗാസ അശ്കലോണിൽ സൗമ്യ താമസിക്കുന്ന വീട്ടിൽ ഷെൽ പതിക്കുകയായിരുന്നു. ഇതിനുപിന്നാലെ ഭർത്താവിന്റെ വെളിപ്പെടുത്തൽ ഏവരെയും കണ്ണീരിലാഴ്ത്തുകയാണ്.

തന്റെ ഭാര്യയെ പുകപടലങ്ങള്‍ വിഴുങ്ങുന്നത് കയ്യിലെ മൊബൈല്‍ സ്ക്രീനില്‍ കണ്ടുനിന്നതിന്റെ ഞെട്ടലിലാണ് സന്തോഷ്. വിഡിയോ കോളില്‍ സംസാരിച്ചു കൊണ്ടിരിക്കെയാണ് പെട്ടെന്ന് വലിയ ശബ്ദത്തോടെ എന്തോ സൗമ്യയുടെ സമീപത്തേക്കു പതിച്ചത്. അതും പിന്നെ കുറെ പുകയും മാത്രമാണ് കാണാനായത് എന്നും അദ്ദേഹം പറയുകയുണ്ടായി. പിന്നീട് ഫോണ്‍ ഓഫായി. തിരികെ വിളിച്ചിട്ട് കിട്ടിയുമില്ലെന്ന് സന്തോഷ് പറയുന്നു.