അവര്‍ ആദ്യം ഒത്തുകൂടിയത് ഫ്രാന്‍സിലെ സെന്റ് നിസിയര്‍ പള്ളിയില്‍, 'ഞങ്ങളുടെ കുട്ടികള്‍ അവരുടെ അമ്മമാര്‍ ജയിലില്‍ പോകാന്‍ ആഗ്രഹിക്കുന്നില്ല'; അങ്ങനെ അന്താരാഷ്ട്ര ലൈംഗിക തൊഴിലാളി ദിനമായി
ഇന്ന് അന്താരാഷ്ട്ര ലൈംഗിക തൊഴിലാളി ദിനം. ലൈംഗിക തൊഴിലാളികളുടെ തൊഴില്‍ സാഹചര്യങ്ങളെ ബഹുമാനിക്കുകയും അംഗീകരിക്കുകയും ചെയ്യുന്ന ദിവസമാണ് ഇന്ന്. ലൈംഗിക തൊഴിലാളികളോട് ആളുകള്‍ പലപ്പോഴും വളരെ മോശമായാണ് പെരുമാറാറുള്ളത്.
മാത്രമല്ല ഇവ‍ര്‍ പല അക്രമങ്ങള്‍ക്കും ഇരയാകാറുമുണ്ട്. അതുകൊണ്ട് തന്നെ ഈ ദിവസം ഇവരെ ബഹുമാനിക്കാന്‍ ആഹ്വാനം ചെയ്യുന്ന ദിവസം കൂടിയാണ്. എന്തു കൊണ്ടാണ് ജൂണ്‍ 2 അന്താരാഷ്ട്ര ലൈംഗിക തൊഴിലാളി ദിനമായി ആഘോഷിക്കുന്നത്.
അന്താരാഷ്ട്ര ലൈംഗിക തൊഴിലാളി ദിനത്തിന്റെ ചരിത്രം ക്രിമിനല്‍വല്‍ക്കരിക്കപ്പെടുന്നതും ചൂഷണം ചെയ്യപ്പെടുന്നതുമായ ജീവിത സാഹചര്യങ്ങളെക്കുറിച്ചുള്ള പ്രതിഷേധം പ്രകടിപ്പിക്കുന്നതിനായി ഏകദേശം 100 ലൈംഗിക തൊഴിലാളികള്‍ 1975 ജൂണ്‍ 2ന് ഫ്രാന്‍സിലെ ലിയോണിലെ സെന്റ് നിസിയര്‍ പള്ളിയില്‍ ഒത്തുകൂടി. 'ഞങ്ങളുടെ കുട്ടികള്‍ അവരുടെ അമ്മമാര്‍ ജയിലില്‍ പോകാന്‍ ആഗ്രഹിക്കുന്നില്ല' എന്നായിരുന്നു ആ പരിപാടിയുടെ ബാനറില്‍ എഴുതിയിരുന്നത്.
ഒപ്പം ലോകമെമ്പാടുമുള്ള അവരുടെ പ്രശ്നങ്ങള്‍ പരിഹരിക്കുന്നതിനായി ഒരു മാധ്യമ പ്രചാരണവും ആരംഭിച്ചു. ഈ നടപടി ദേശീയ അന്തര്‍‌ദ്ദേശീയ മാധ്യമങ്ങളില്‍ ഇടം നേടി. ലൈംഗികത്തൊഴിലാളികള്‍ ഫ്രാന്‍‌സിലെമ്പാടും നടത്തിയ പണിമുടക്കുകളാണ് പിന്നീട് ഈ ദിവസം അന്താരാഷ്ട്ര ലൈംഗിക തൊഴിലാളി ദിനമായി വര്‍ഷം തോറും ആചരിക്കാനുള്ള കാരണം.
പൊലീസിന്റെ ഉപദ്രവം അവസാനിപ്പിക്കുക, ജോലി ചെയ്തിരുന്ന ഹോട്ടലുകള്‍ വീണ്ടും തുറക്കുക, ലൈംഗികത്തൊഴിലാളികളുടെ കൊലപാതകങ്ങളെക്കുറിച്ച്‌ ശരിയായ അന്വേഷണം നടത്തുക തുടങ്ങി നിരവധി ആവശ്യങ്ങളാണ് സെന്റ് നിസിയര്‍ പള്ളിയില്‍ ഒത്തുകൂടിയ ലൈംഗിക തൊഴിലാളികള്‍ ആവശ്യപ്പെട്ടത്. ആ സമയത്ത്, ഫ്രഞ്ച് ലൈംഗികത്തൊഴിലാളികള്‍ നടത്തിയ ഈ പ്രതിഷേധം എട്ട് ദിവസം നീണ്ട പണിമുടക്കായി മാറിയിരുന്നു.
എന്നാല്‍, പ്രതിഷേധക്കാരുടെ പരാതികള്‍ ഉള്‍ക്കൊള്ളാന്‍ പൊലീസ് വിസമ്മതിക്കുകയും കഠിനമായ ശിക്ഷകള്‍ നല്‍കി ഭീഷണിപ്പെടുത്തുകയും ചെയ്തു. എട്ട് ദിവസത്തിന് ശേഷം, പൊലീസ് പ്രതിഷേധക്കാരെ തുരത്തിയോടിച്ചു. പ്രതിഷേധവും പണിമുടക്കും ഒരു നിയമ പരിഷ്കരണത്തിനും കാരണമായില്ല. എന്നാല്‍, ലൈംഗിക തൊഴിലാളികളുടെ ഈ പ്രതിഷേധം യൂറോപ്പിലും യുകെയിലും വലിയ മാറ്റങ്ങള്‍ക്കുള്ള തീപ്പൊരിയായി മാറി. അതിനാല്‍,
എല്ലാ വര്‍ഷവും ജൂണ്‍ 2ന് എന്‍‌എസ്‌ഡബ്ല്യുപി അന്താരാഷ്ട്ര ലൈംഗിക തൊഴിലാളി ദിനമായി ആചരിക്കാന്‍ തുടങ്ങി. നീതിയിലേക്കുള്ള പ്രവേശനം എന്ന നിലയിലാണ് ഈ ദിനത്തെ അനുസ്മരിക്കുന്നത്. മാര്‍ച്ച്‌ മൂന്നിനാണ് അന്താരാഷ്ട്ര ലൈംഗികത്തൊഴിലാളി അവകാശ ദിനമായി ആചരിക്കുന്നത്.
കോവിഡ് മഹാമാരി ലോകമെമ്പാടുമുള്ള ലൈംഗിക തൊഴിലാളികളില്‍ വലിയ ആഘാതമാണ് സൃഷ്ടിച്ചിരിക്കുന്നത്. കോവിഡ് കാരണം ലൈംഗികത്തൊഴിലാളികള്‍ സാമ്പത്തികമായി ഏറെ ബുദ്ധിമുട്ടുകള്‍ നേരിട്ടു കൊണ്ടിരിക്കുന്ന സമയമാണിത്. അതിനാല്‍, ഈ മഹാമാരിയിലും ലൈംഗികത്തൊഴിലാളികളുടെ
ആവശ്യകത അവഗണിക്കരുത് അല്ലെങ്കില്‍ ലൈംഗിക തൊഴിലാളികളെ ഉപേക്ഷിക്കരുതെന്നാണ് വിവിധ സംഘടനകള്‍ക്ക് പറയാനുള്ളത്. ഈ ദുഷ്‌കരമായ സമയങ്ങളില്‍, ആഗോളതലത്തില്‍ ലൈംഗികത്തൊഴിലാളികളെക്കുറിച്ച്‌ ആശങ്കകള്‍ പ്രകടിപ്പിക്കുന്ന പ്രധാന സംഘടനകള്‍ ഗ്ലോബല്‍ നെറ്റ്‌വര്‍ക്ക് ഓഫ് സെക്‌സ് വര്‍ക്ക് പ്രോജക്‌ട്സ് (എന്‍‌എസ്‌ഡബ്ല്യുപി), യു‌എന്‍‌ഐ‌ഡി‌എസ് എന്നിവയാണ്.
https://www.facebook.com/Malayalivartha
