വീണ്ടും യാത്രക്കാരെ വഹിക്കാനൊരുങ്ങി സൂപ്പര് സോണിക് ജെറ്റുകള്; സാധാരണ വിമാനങ്ങളേക്കാള് ഇരട്ടിവേഗം
15 സൂപ്പര് സോണിക് ജെറ്റുകള് വാങ്ങാനുള്ള പദ്ധതി അമേരിക്കയിലെ യുണൈറ്റഡ് എയര്ലൈന്സ് പ്രഖ്യാപിച്ചതോടെ വിമാന യാത്രയുടെ ഭാവി ഇനി കൂടുതല് വേഗത്തോടൊപ്പമാകും. 2029ഓടെ സൂപ്പര് സോണിക് വിമാനങ്ങളില് യാത്രക്കാരെ കൊണ്ടുപോകാനാണ് കമ്പനി ലക്ഷ്യമിടുന്നത്. 2003ല് കോണ്കോര്ഡ് ജെറ്റ് നിര്ത്തലാക്കിയശേഷം ഇത്തരത്തിലുള്ള ആദ്യത്തെ വാണിജ്യ സൂപ്പര് സോണിക് ഫ്ലൈറ്റുകളാണ് യുണൈറ്റഡ് എയര്ലൈന്സ് സ്വന്തമാക്കുന്നത്.
ഡെന്വര് ആസ്ഥാനമായുള്ള വിമാന നിര്മാതാക്കളായ ബൂം സൂപ്പര് സോണിക്കില് നിന്ന് 15 ജെറ്റുകള് യുണൈറ്റഡ് എയര്ലൈന്സ് വാങ്ങും. ഈ വിമാനങ്ങളുടെ പരീക്ഷണഓട്ടം 2026ഓടെ നടത്തും. 2029ല് ഇവ യാത്രക്കാരെ വഹിക്കുമെന്നാണ് പ്രതീക്ഷിക്കുന്നത്. വിമാനത്തിന് ഓവര്ച്വര് എന്നാണ് പേരിട്ടിരിക്കുന്നത്.
നേരത്തെ കോണ്കോര്ഡ് സൂപ്പര് സോണിക് വിമാനങ്ങള് യാത്രക്കാരുമായി സര്വിസ് നടത്തിയിരുന്നെങ്കിലും ശബ്ദ നിയന്ത്രണങ്ങളടക്കം വന്നതോടെ 2003ല് കമ്പനി നിര്ത്തലാക്കുകയായിരുന്നു. എന്നാല്, പുതിയ സാങ്കേതിക വിദ്യയുമായിട്ടാണ് ഓവര്ച്വര് വിമാനങ്ങള് വരുന്നത്. നിലവിലെ വിമാനങ്ങളുടെ ഇരട്ടിവേഗമാണ് ഇതിനുണ്ടാവുക. 3.5 മണിക്കൂറിനുള്ളില് ന്യയോര്ക്ക്, ന്യൂജേഴ്സി എന്നിവിടങ്ങളില് നിന്ന് ലണ്ടനിലേക്ക് പറന്നെത്താന് കഴിയും.
ന്യൂയോര്ക്കില് നിന്ന് ഫ്രാങ്ക്ഫര്ട്ടിലേക്ക് നാല് മണിക്കൂറും സാന് ഫ്രാന്സിസ്കോയില് നിന്ന് ടോക്യയോയിലേക്ക് ആറ് മണിക്കൂറുമാണ് വേണ്ടിവരിക. ഇതോടെ യാത്രാസമയം ഗണ്യമായി കുറക്കാന് സാധിക്കും. ഇത് കൂടാതെ സീറോ കാര്ബണ് എമിഷനായതിനാല് അന്തരീക്ഷം മലിനീകരണത്തിന്റെ പ്രശ്നവുമില്ല.
വാണിജ്യടിസ്ഥാനത്തിലുള്ള സൂപ്പര്സോണിക് വിമാന യാത്രകള് 1970കളില് കോണ്കോര്ഡാണ് അവതരിപ്പിച്ചത്. എന്നാല്, പാരിസ്ഥിതിക നിയന്ത്രണങ്ങള് പാലിക്കാനുള്ള ഉയര്ന്ന ചെലവ് കാരണം 2003ല് ഇവ നിര്ത്തലാക്കി. കൂടാതെ 150ന് താഴെ സീറ്റുള്ള വിമാനത്തില് ഉയര്ന്നനിരക്കാണ് ഈടാക്കിയിരുന്നത്.
ഇത് സാധാരണക്കാര്ക്ക് അപ്രാപ്യമായിരുന്നു. എയര് ഫ്രാന്സും ബ്രിട്ടീഷ് എയര്വേയ്സും മാത്രമാണ് ഈ വിമാനങ്ങള് ഉപയോഗിച്ചത്. 2014ല് സ്ഥാപിതമായ ഡെന്വര് ആസ്ഥാനമായുള്ള ബൂം സൂപ്പര്സോണിക്, അമേരിക്കന് എയര്ഫോഴ്സിന് ഓവര്ച്വറിന്െറ സൈനിക പതിപ്പ് വിതരണം ചെയ്യുന്നുണ്ട്.
https://www.facebook.com/Malayalivartha
