യുഎന്‍ സമാധാന സേനാംഗങ്ങള്‍ക്ക് ഇന്ത്യ നല്‍കിയ രണ്ട് ലക്ഷം ഡോസ് കൊവിഡ് വാക്‌സിന്‍ ഉപയോഗിച്ചുവരുകയാണെന്ന് യുഎന്‍. ഇതിനോടകം നിരവധി യുഎന്‍ സമാധാന സേനാംഗങ്ങള്‍ക്ക് ഇന്ത്യന്‍ നിര്‍മിത വാക്‌സിന്‍ നല്‍കിയിട്ടുണ്ടെന്നും യുഎന്‍ സെക്രട്ടറി ജനറലിന്റെ വക്താവ് സ്റ്റീഫന്‍ ഡുജാറിക് പറഞ്ഞു. മാര്‍ച്ച് 27നാണ് സൗജന്യമായി രണ്ട് ലക്ഷം വാക്‌സിന്‍ ഇന്ത്യ കയറ്റി അയച്ചത്. മാര്‍ച്ച് 31 വരെയുള്ള കണക്കുപ്രകാരം 12 ദൗത്യങ്ങളിലായി ലോകമെമ്പാടും 87,889 സമാധാന സേനാംഗങ്ങളാണ് പ്രവര്‍ത്തിക്കുന്നത്.

അതേസമയം ചൈന വാഗ്ദാനം നല്‍കിയ വാക്‌സിന്‍ സ്വീകരിക്കുന്നതില്‍ യു.എന്നിന് ആശങ്ക. ചൈനീസ്, റഷ്യന്‍, യുഎസ് അധികൃതരുമായി ബന്ധപ്പെടുകയാണെന്നും ചൈനയുടെ വാക്‌സിന്‍ വാഗ്ദാനം സംബന്ധിച്ച മാധ്യമപ്രവര്‍ത്തകരുടെ ചോദ്യത്തോട് യുഎന്‍ വക്താവ് പ്രതികരിച്ചു. വാക്‌സിന്‍ നല്‍കുമെന്ന് പ്രഖ്യാപിച്ച മുന്ന് രാജ്യങ്ങളോടും യുഎന്‍ നന്ദി അറിയിച്ചിട്ടുണ്ട്. ലോകാരോഗ്യ സംഘടന അംഗീകരിക്കാത്ത വാക്‌സിനുകള്‍ ഉപയോഗിക്കാന്‍ യുഎന്നിന് കഴിയില്ലെന്നും അദ്ദേഹം വ്യക്തമാക്കി.

ഇക്കഴിഞ്ഞ ഫെബ്രുവരിയിലാണ് യുഎന്‍ സമാധാന സേനാംഗങ്ങള്‍ക്കായി ഇന്ത്യ രണ്ട് ലക്ഷം ഡോസ് കോവിഷീല്‍ഡ് വാക്‌സിന്‍ നല്‍കുമെന്ന് കേന്ദ്ര വിദേശകാര്യമന്ത്രി എസ് ജയശങ്കര്‍ പ്രഖ്യാപിച്ചത്. ലോകമെമ്പാടും പ്രവര്‍ത്തിക്കുന്ന സമാധാന സേനാംഗങ്ങള്‍ക്ക് രണ്ട് ഡോസ് കുത്തിവെപ്പും സാധ്യമാകാനാണ് ഇത്രയും വാക്‌സിന്‍ നല്‍കുന്നതെന്നും ജയശങ്കര്‍ വ്യക്തമാക്കിയിരുന്നു.