കോവിഡ്​ കേസുകള്‍ കുറയുകയല്ല, വര്‍ധിക്കുകയാണെന്ന മുന്നറിയിപ്പുമായി​ ലോകാരോഗ്യസംഘടനയിലെ ചീഫ്​ സയന്‍റിസ്​റ്റ്​ സൗമ്യ സ്വാമിനാഥന്‍. കോവിഡ്​-19 ന്റെ ഡെല്‍റ്റ വകഭേദം വ്യാപിക്കുന്നതിന്റെ പശ്ചാത്തലത്തില്‍ ലോകത്തിന്റെ ഭൂരിഭാഗം മേഖലകളിലും കോവിഡ്​ കേസുകള്‍ വര്‍ധിക്കുന്നതായാണ്​ കാണുന്നത്​.

ചില രാജ്യങ്ങളില്‍ വാക്​സിനേഷന്‍ യജ്ഞത്തിന്റെ ഭാഗമായി ഗുരുതരമായ കേസുകളും ആശുപത്രിവാസവും കുറയുന്നുണ്ട്​. എന്നാല്‍ ലോകത്തിന്റെ വലിയൊരു ഭാഗം ഓക്​സിജന്‍ ക്ഷാമവും ആശുപത്രികിടക്കകളുടെ ദൗര്‍ലഭ്യവും നേരിടുകയാണ്​. മരണനിരക്ക്​ കൂടുതലാണെന്നും സൗമ്യ സ്വാമിനാഥന്‍ ബ്ലൂം ബെര്‍ഗ്​ ടെലിവിഷന്​ നല്‍കിയ അഭിമുഖത്തില്‍ സൂചിപ്പിച്ചു. ചില പ്രദേശങ്ങളില്‍ കേസുകള്‍ വര്‍ധിക്കുകയാണ്​. ആഫ്രിക്കയിലെ മരണനിരക്ക്​ രണ്ടാഴ്​ചക്കുള്ളില്‍ 30ല്‍ നിന്ന്​ 40 ശതമാനമായി വര്‍ധിച്ചു.

ലോകത്തിന്റെ ചില ഭാഗങ്ങളില്‍ വാക്​സിനേഷന്‍ യജ്ഞം വേഗത്തിലല്ല, പല രാജ്യങ്ങളും നിയന്ത്രണങ്ങളില്‍ ഇളവു നല്‍കി. 24 മണിക്കൂറിനിടെ അഞ്ചുലക്ഷത്തിനടുത്ത്​ പുതിയ കേസുകളാണ്​ റിപ്പോര്‍ട്ട്​ ചെയ്​തത്​. 9300 മരണങ്ങളും. കോവിഡ്​ കേസുകള്‍ കുറയുകയല്ലെന്നതിന്റെ തെളിവാണിതെന്നും അവര്‍ കുട്ടിച്ചേര്‍ത്തു.