വിമാനത്താവളത്തിലേക്ക് താലിബാന്റെ റോക്കറ്റ് ആക്രമണം; കാണ്ഡഹാറില് നിന്നുളള വിമാനങ്ങള് റദ്ദാക്കി
അഫ്ഗാനിസ്ഥാനില് അമേരിക്കന് സേന പിന്മാറിയതോടെ പിടിമുറുക്കിയ താലിബാന് വിവിധ നഗരങ്ങളും പട്ടണങ്ങളും പിടിച്ചടക്കുകയാണ്. അഫ്ഗാനിലെ പ്രധാന നഗരങ്ങളിലൊന്നായ കാണ്ഡഹാറിലും താലിബാന് ശക്തമായ ആക്രമണം അഴിച്ചു വിട്ടു. ശനിയാഴ്ച രാത്രിയില് കാണ്ഡഹാര് വിമാനത്താവളത്തിലേക്ക് അവര് തൊടുത്തത് മൂന്ന് മിസൈലുകളാണ്. ഇവയില് രണ്ടെണ്ണം വീണ് വിമാനത്താവളത്തിലെ റണ്വെ തകര്ന്നു.
'കഴിഞ്ഞ രാത്രിയില് മൂന്ന് റോക്കറ്റുകള് വിമാനത്താവളം ലക്ഷ്യമായി എത്തി. ഇതില് രണ്ടെണ്ണം റണ്വെയിലാണ് വീണത്. അതുകൊണ്ട് ഇവിടെ നിന്നുമുളള വിമാന സര്വീസുകളെല്ലാം റദ്ദാക്കുന്നു.' എയര്പോര്ട്ട് തലവന് മസൗദ് പഷ്തുണ് പറഞ്ഞു. റണ്വെ നന്നാക്കാനുളള ശ്രമം തുടങ്ങിയതായും ഇന്നുതന്നെ പ്രവര്ത്തനം തുടങ്ങാനാണ് ശ്രമമെന്നും അദ്ദേഹം അറിയിച്ചു.
കഴിഞ്ഞ കുറച്ച് ആഴ്ചകളായി താലിബാന് കാണ്ഡഹാറിന്റെ സമീപപ്രദേശങ്ങളില് ശക്തമായ ആക്രമണമാണ് നടത്തുന്നത്. ഏത് സമയത്തും പ്രവിശ്യാ തലസ്ഥാനം അവര് പിടിച്ചെടുക്കാം എന്ന അവസ്ഥയാണ്.
താലിബാന് തീവ്രവാദികളില് നിന്നും നഗരത്തെ രക്ഷിക്കാന് സഹായങ്ങള് ലഭിക്കുന്നതിന് വിമാനത്താവളം ഭംഗിയായി പ്രവര്ത്തിക്കേണ്ടത് അത്യാവശ്യമാണ്. ഇതിനെ പ്രതിരോധിക്കാനാണ് താലിബാന് വിമാനത്താവളത്തില് തന്നെ ആക്രമണം നടത്തിയത്.
രാജ്യത്തെ ജനസാന്ദ്രത കൂടിയ ഗ്രാമങ്ങളിലൂടെയാണ് താലിബാന് തങ്ങളുടെ പിടി അഫ്ഗാനില് മുറുക്കിയത്.എന്നാല് താലിബാന് വിവിധ പ്രവിശ്യകളില് നേടിയ മേല്ക്കൈ അവകാശവാദം അഫ്ഗാന് സര്ക്കാര് നിരന്തരം എതിര്ത്തിരുന്നു.
https://www.facebook.com/Malayalivartha