ലോകശ്രദ്ധ നേടിയ ആനക്കൂട്ടം മടങ്ങുന്നു..... യുനാന്‍ പ്രവിശ്യയില്‍ നിന്ന് ഒന്നരലക്ഷത്തോളം പേരെ ഒഴിപ്പിച്ചു..... ഡ്രോണുകളും വാഹനങ്ങളും ഉപയോഗിച്ച് ആനകളുടെ നീക്കം സൂക്ഷ്മമായി നിരീക്ഷിച്ച് പോലീസ്.  കാട്ടിലേക്കു മടങ്ങുന്ന ചൈനയിലെ 'ദേശാടന' ആനകളുടെ പാതയില്‍നിന്ന് ഒന്നരലക്ഷം പേരെ ഒഴിപ്പിച്ചു. യുനാന്‍ പ്രവിശ്യയില്‍നിന്നാണ് ആളുകളെ താത്കാലിക കേന്ദ്രങ്ങളിലേക്ക് മാറ്റിയത്.

ആനക്കൂട്ടം ജനവാസ കേന്ദ്രങ്ങളിലെത്തിയാല്‍ ഉണ്ടാകാവുന്ന ബുദ്ധിമുട്ടുകള്‍ കണക്കിലെടുത്താണിത്. നേരത്തേയുണ്ടായിരുന്ന വാസസ്ഥലത്തുനിന്നു 200 കിലോമീറ്റര്‍ അകലെയാണ് ഇപ്പോള്‍ ആനക്കൂട്ടമുള്ളത്. അവ യുവാന്‍ജാങ് നദി കടന്നതായും തെക്കന്‍ ഭാഗത്തേക്കുള്ള യാത്ര തുടരുകയാണെന്നും നിരീക്ഷണ സംഘത്തിലെ തലവന്‍ വാന്‍ യോങ് പറഞ്ഞു.

25,000 പോലീസ് ഉദ്യോഗസ്ഥര്‍ ഡ്രോണുകളും വാഹനങ്ങളും ഉപയോഗിച്ച് ആനകളുടെ നീക്കം സൂക്ഷ്മമായി നിരീക്ഷിക്കുന്നുണ്ട്. യുനാന്‍ പ്രവിശ്യയിലെ മ്യാന്‍മാര്‍ അതിര്‍ത്തിയോടുചേര്‍ന്ന സിഷ്വാങ്‌ബെന്ന ദായ് ദേശീയോദ്യാനത്തില്‍നിന്നു 17 മാസം മുമ്പാണ് സംഘം സഞ്ചാരം ആരംഭിച്ചത്.


ആനകളുടെ കൗതുകയാത്ര ലോകശ്രദ്ധ നേടിയിരുന്നു. വിനോദസഞ്ചാര മേഖലയായ കുന്‍മിങ്ങിനു സമീപംവരെ എത്തിയശേഷമാണ് മടക്കം. ഇതിനോടകം അവ 500 കിലോമീറ്റര്‍ ദൂരം സഞ്ചരിച്ചുകഴിഞ്ഞു. ആനകളുടെ പതിവില്ലാത്ത ദേശാടനത്തിന്റെ കാരണം വിദഗ്ധര്‍ക്ക് കണ്ടെത്താനായിട്ടില്ല.