ജപ്പാന്‍ തീരത്ത് ചരക്കു കപ്പല്‍ മണല്‍ത്തിട്ടയില്‍ ഇടിച്ച്‌ രണ്ടായി പിളര്‍ന്നു. പനാമയില്‍ രജിസ്റ്റര്‍ ചെയ്തിട്ടുള്ള ക്രിംസണ്‍ പൊളാരിസ് എന്ന ചരക്കു കപ്പലാണ് അപകടത്തില്‍പ്പെട്ടത്.

ജപ്പാന്റെ വടക്കന്‍ തീരത്തെ ഹച്ചിനോഹെ തുറമുഖത്താണ് സംഭവം. കപ്പലിലുണ്ടായിരുന്ന ചൈനീസ്​, ഫിലിപ്പൈന്‍സ്​ പൗരന്‍മാരായ 21 ജീവനക്കാരെ​ രക്ഷപ്പെടുത്തിയതായി ജപ്പാന്‍ കോസ്റ്റ്ഗാര്‍ഡ് അധികൃതര്‍ അറിയിച്ചു.

കപ്പലില്‍ നിന്നു ചോര്‍ന്ന എണ്ണ, കടലില്‍ 24 കിലോമീറ്റര്‍ ദൂരത്തോളം പരന്നിരുന്നു. ഇതുണ്ടാക്കുന്ന പാരിസ്ഥിതിക ആഘാതത്തിന്‍റെ വ്യാപ്തി വ്യക്തമല്ല. നിലവില്‍ എണ്ണച്ചോര്‍ച്ച നിയന്ത്രണ വിധേയമാക്കിയതായാണ് ജപ്പാന്‍ തീരസേനയുടെ വിശദീകരണം.

മരച്ചീളുകളുമായി തായ്​ലന്‍ഡില്‍ നിന്നാണ് കപ്പല്‍ പുറപ്പെട്ടത്. 39,910 ടണ്ണാണ്​ കപ്പലിന്‍റെ ഭാരം. മണ്‍തിട്ടയില്‍ കുടുങ്ങിയ കപ്പല്‍ പിന്നീട്​ സ്വയം സ്വതന്ത്രമായെങ്കിലും മോശം കാലാവസ്​ഥ കാരണം ബുധനാഴ്ച ഹച്ചിനോഹെ തുറമുഖത്തിന്​ നാലു കിലോമീറ്റര്‍ അകലെ നങ്കൂരമിടുകയായിരുന്നു. ​

തുടര്‍ന്ന് വ്യാഴാഴ്ച രാവിലെയാണ് കപ്പല്‍​ രണ്ടായി പിളര്‍ന്നത്​. കപ്പലിന്‍റെ ഭാഗങ്ങള്‍ ഇനിയും മാറ്റിയിട്ടില്ല. മൂന്ന്​ വീതം പട്രോള്‍ ബോട്ടുകളും വിമാനങ്ങളുമാണ്​ രക്ഷാപ്രവര്‍ത്തനങ്ങള്‍ നടത്തിയത്.