പാക്കിസ്ഥാൻ പ്രധാനമന്ത്രി ഇമ്രാൻ ഖാൻ തന്റെ രാജ്യത്തോട് അമേരിക്കയും ഇംഗ്ലണ്ടും ചെയ്യുന്ന നടപടികളിൽ അതീവ ദുഃഖിതൻ ആണ്. പാകിസ്ഥാനെ അമേരിക്കയും ഇംഗ്ലണ്ടും അവഗണിക്കുന്നേ എന്ന് പറഞ്ഞ് ലോക മാധ്യമങ്ങൾക്ക് മുന്നിൽ വിലപിക്കൽ ആണ് ഇപ്പോൾ അദ്ദേഹത്തിന്റെ പ്രധാന പരിപാടി എന്നാണ് തോന്നുന്നത്. വാഷിംഗ്ടണിനെ ലക്ഷ്യമാക്കി, പാക് പ്രധാനമന്ത്രി അടുത്തിടെ അഭിപ്രായപ്പെട്ടത് ഇങ്ങനെയാണ്, അഫ്ഗാനിസ്ഥാനിൽ 20 വർഷത്തെ പോരാട്ടത്തിന് ശേഷം, അവിടത്തെ എന്തെങ്കിലും അവശേഷിക്കുന്ന "പ്രശ്നങ്ങൾ " തീർക്കാൻ മാത്രമേ പാകിസ്ഥാനെ "ഉപയോഗപ്രദമായി" അമേരിക്ക കാണുന്നുള്ളൂവെന്നും ഏതെങ്കിലും രീതിയിലുള്ള "തന്ത്രപരമായ പങ്കാളിത്തം" രൂപീകരിക്കുമ്പോൾ അമേരിക്ക ഇന്ത്യയെ ആണ് ഇഷ്ടപ്പെടുന്നതെന്നും ആണ് അദ്ദേഹത്തിന്റെ വിലാപം.

ഇനി ഇംഗ്ലണ്ടിന്റെ കാര്യത്തിലേക്ക് വരുകയാണെങ്കിൽ. ഇമ്രാൻ ഖാന്റെ അഭിപ്രായത്തിൽ ഇംഗ്ലണ്ട് പാകിസ്ഥാനോട് അന്യായമാണ് പ്രവർത്തിച്ചു കൊണ്ടിരിക്കുന്നത്. ഈയിടെയാണ് ഇംഗ്ലണ്ട് ഇന്ത്യൻ പൗരന്മാരെ കോവിഡ് പ്രോട്ടോക്കോളിന്റെ കാര്യത്തിൽ റെഡ് ലിസ്റ്റിൽ നിന്നും ആംബർ ലിസ്റ്റിലേക്ക് മാറ്റിയത്. ഇത് അന്യായമാണ് പാകിസ്ഥാനെയും ആംബർ ലിസ്റ്റിലേക്ക് മാറ്റണം എന്നാണ് അദ്ദേഹത്തിന്റെ വാദം. അമേരിക്കയുടെ കാര്യം എടുക്കുകയാണെങ്കിൽ ഇമ്രാൻ ഖാന്റെ വാദങ്ങൾ ഒക്കെ ന്യായമാണെന്ന് തന്നെ പറയേണ്ടി വരും. കാരണം 20 വർഷം അഫ്‌ഗാനിസ്ഥാനിൽ ഒരുമിച്ചു പ്രവർത്തിച്ചിട്ടും താലിബാനുമായുള്ള ചില പ്രശ്നങ്ങൾ പരിഹരിക്കുക എന്നതല്ലാതെ വേറെ ഒന്നിലും അവരെ അമേരിക്ക ഇടപെടുത്താറില്ല. അത് സത്യമാണ്. അതിനു പ്രധാനമായും രണ്ടു കാരണങ്ങൾ ആണുള്ളത്.

ഒന്ന്, ഈ പ്രശ്നങ്ങൾ ഒക്കെ മിക്കവാറും പാകിസ്ഥാനും കൂടി ചേർന്ന് ഉണ്ടാക്കുന്നതായിരിക്കും. അതിന് പിന്നെ നിങ്ങളെ അല്ലാതെ ആരെ ഇടപെടുത്താൻ ആണ്?. രണ്ടാമതായി പറയുകയാണെങ്കിൽ ലോകത്തെ ഏതു ജനാധിപത്യ രാജ്യം ആയാലും യുദ്ധവുമായി ബന്ധപ്പെട്ട കാര്യങ്ങളിൽ അല്ലാതെ വേറെ എന്തിലാണ് ഈ പാകിസ്ഥാനെ ഉൾപെടുത്തേണ്ടത്. തീവ്ര വാദികൾക്ക് എങ്ങനെ പരിശീലനം കൊടുക്കാം എന്നതിലോ. അതും കൂടി ഇമ്രാൻ ഖാൻ പറഞ്ഞു തന്നാൽ നല്ലതായിരിക്കും. ജനുവരിയിൽ വൈറ്റ് ഹൗസിൽ കാലുകുത്തിയതിന് ശേഷം ഇന്നേ വരെ അമേരിക്കൻ പ്രസിഡന്റ് ജോ ബിഡൻ ഇമ്രാൻ ഖാനുമായി സംസാരിച്ചിട്ടില്ല. ഈ തണുത്ത പ്രതികരണം ഇമ്രാനെ വിഷമിപ്പിക്കുകയും അതേ സമയം അദ്ദേഹത്തിന്റെ അവസ്ഥ ദയനീയമാക്കുകയും ചെയ്തു. ഇന്ത്യയുമായി "തന്ത്രപരമായ പങ്കാളിത്തം" നടപ്പിൽ വരുത്താൻ അമേരിക്ക തീരുമാനിച്ചതുമുതൽ, വാഷിംഗ്ടൺ പാക്കിസ്ഥാനോട് വ്യത്യസ്തമായി പെരുമാറുകയാണെന്ന് ഖാൻ പറഞ്ഞു, അഥവാ കരഞ്ഞു എന്ന് പറയുന്നതായിരിക്കും നല്ലത്.

"അമേരിക്കൻ ജനത അവരുടെ തന്ത്രപ്രധാന പങ്കാളി ഇപ്പോൾ ഇന്ത്യയാണെന്ന് തീരുമാനിച്ചിട്ടുണ്ടെന്നും അതുകൊണ്ടാണ് അവർ ഇപ്പോൾ പാകിസ്ഥാനോട് വ്യത്യസ്തമായി പെരുമാറുന്നതെന്നും ഞാൻ കരുതുന്നു. ഖാൻ കൂട്ടിച്ചേർത്തു. എന്തായാലും ഇമ്രാൻ ഖാന്റെയും പാക്കിസ്ഥാന്റെയും അടവുകൾ ഒന്നും ഇനി നടക്കുകയില്ല എന്ന് വ്യക്തമായിരിക്കുകയാണ്. പാകിസ്താൻ താലിബാനെ തിരശീലക്കു പുറകിലൂടെ സഹായിക്കുമ്പോൾ തന്നെ , പാകിസ്ഥാൻ ഭീകരവാദത്തിന്റെ ഇരയാണെന്ന് അവകാശപ്പെട്ട് ലോക സർക്കാരുകളെ തെറ്റിദ്ധരിപ്പിക്കാൻ ശ്രമിക്കുന്നു, അങ്ങനെ ഇസ്ലാമിക ഭീകരതയ്‌ക്കെതിരായ പോരാട്ടത്തിന്റെ പേരിൽ കോടിക്കണക്കിന് ഡോളർ ഫണ്ട് തട്ടിയെടുക്കുന്നു.

എന്നിരുന്നാലും, ഉപഭൂഖണ്ഡത്തിലെ 20-ഓളം വർഷത്തെ അനുഭവത്തിന് ശേഷം അമേരിക്ക ഒടുവിൽ പാക്കിസ്ഥാനെ നേർ വഴിയിലേക്ക് കൊണ്ട് വരികയും താലിബാനെ പിന്തുണയ്ക്കുന്നത് നിർത്താൻ നിർബന്ധിക്കുന്നതും ഒരു നടക്കാത്ത കാര്യം തന്നെയാണെന്ന് മനസിലാക്കിയിട്ടുണ്ട് , അതിനാൽ തന്നെ ബൈഡൻ ഭരണകൂടം ഇമ്രാൻ ഖാനുമായി ആശയവിനിമയം ഏതാണ്ട് മുഴുവനായും ഒഴിവാക്കിയിരിക്കുകയാണ്. അമേരിക്കയുടെ ഇത്തരത്തിലുള്ള കരുണയില്ലാത്തതും വിട്ടു വീഴ്ച ചെയ്യാൻ തയ്യാറാവാത്തതുമായ നയം പാകിസ്താനെ അക്ഷരാർത്ഥത്തിൽ തന്നെ വിഷമിപ്പിച്ചു കൊണ്ടിരിക്കെ ഇതിനിടയിൽ യുണൈറ്റഡ് കിംഗ്ഡത്തിൽ നിന്നുള്ള മറ്റൊരു തിരിച്ചടി പാകിസ്ഥാനിലെ മുഴുവൻ രാഷ്ട്രീയ യന്ത്രങ്ങളെയും ഇളക്കിമറിച്ചിരിക്കുകയാണ്.

പാകിസ്ഥാന്റെ അഭിമാനത്തിന് തന്നെ ക്ഷതമേല്പിച്ച ഒരു റിപ്പോർട്ട് പ്രകാരം, ബ്രിട്ടീഷ് സർക്കാർ തയ്യാറാക്കിയ കോവിഡ് യാത്രാ പട്ടികയിൽ ഇന്ത്യയെ അവർ കുറച്ചു കൂടി ലളിതമായ ആമ്പർ ലിസ്റ്റിലേക്ക് നീക്കിയിരിക്കുകയാണ് , അതേസമയം പാകിസ്താനെ അവർ കടുപ്പമേറിയ റെഡ് ലിസ്റ്റിൽ നിലനിർത്തുകയും ചെയ്തു . വിഭജനം പക്ഷപാതപരമാണെന്ന് അവകാശപ്പെട്ട്, പാകിസ്താനിലെ ആരോഗ്യവിദഗ്ധനായ ഫൈസൽ സുൽത്താൻ യുകെയിലെ ആരോഗ്യ സെക്രട്ടറിക്ക് ഒരു കത്തെഴുതുകയും ഉണ്ടായി, അത് പാകിസ്താനിലെ മനുഷ്യാവകാശ മന്ത്രി ഷിറീൻ മസാരി ട്വിറ്ററിൽ പോസ്റ്റും ചെയ്തു. യുകെയുടെ റെഡ് ലിസ്റ്റ് പ്രകാരം ബ്രിട്ടീഷ് നിവാസികൾക്കും ചില സ്റ്റുഡന്റ് വിസ ഉടമകൾക്കും മാത്രം അവർ സ്വന്തം രാജ്യത്തേക്ക് പ്രവേശനം അനുവദിക്കുകയുളളൂ ,എന്നാൽ അവർക്കും സ്വന്തം ചിലവിൽ 1,750 പൗണ്ട് ചിലവിട്ടു കൊണ്ട് സർക്കാർ നിർബന്ധിത ഹോട്ടലിൽ 10 ദിവസത്തേക്ക് നിർബന്ധിത ക്വാറന്റൈൻ പാലിക്കൽ നിർബന്ധമാണ്.

അതേസമയം, ആമ്പർ ലിസ്റ്റിൽ ഉണ്ടായിരിക്കുക എന്നതിനർത്ഥം ഇന്ത്യയിൽ നിന്നുള്ള യാത്രക്കാരെ സർക്കാർ നടത്തുന്ന ക്വാറന്റൈനിൽ നിന്ന് ഒഴിവാക്കിയിട്ടുണ്ട് എന്നാൽ 10 ദിവസത്തെ സ്വയം ഒറ്റപ്പെടലിന് വിധേയമാകുന്ന വിലാസം നൽകുന്നതിന് നിർബന്ധിത പാസഞ്ചർ ലൊക്കേറ്റർ ഫോം പൂരിപ്പിക്കണം എന്ന് മാത്രമേ ഉള്ളൂ. പാക്കിസ്ഥാൻ എല്ലാ ഭാഗത്തുനിന്നും അപമാനിക്കപ്പെടുകയാണ്, പക്ഷേ അവരുടെ പരമോന്നത നേതാവ്, ഇമ്രാൻ ഖാൻ, രാജ്യത്തെ ഉള്ളിൽ നിന്ന് കെട്ടിപ്പടുക്കുന്നതിനുപകരം, അന്താരാഷ്ട്ര തലത്തിൽ പത്രപ്രവർത്തകർക്ക് മുന്നിൽ കരയുന്നതിന്റെ തിരക്കിലാണ്.