ഒമ്പത് വയസുകാരിയെ കൊന്ന് വെട്ടിനുറുക്കി ഫ്രിഡ്ജില്‍ സൂക്ഷിച്ച അമ്മ പിടിയില്‍. 30കാരിയായ റൂത്ത് ഫ്‌ലോറിയാനോയെയാണ് പൊലീസ് അറസ്റ്റ് ചെയ്തത്. ബ്രസീലിലെ സാവോപോളോയിലെ യുവതിയുടെ വീട്ടില്‍ നിന്നാണ് മൂന്ന് ആഴ്ചയോളം പഴക്കമുള്ള കുട്ടിയുടെ മൃതദേഹം ഫ്രിഡ്ജിനുള്ളില്‍ നിന്ന് പൊലീസ് കണ്ടെത്തിയത്. ഇവരുടെ മറ്റ് രണ്ട് കുട്ടികളെ സംരക്ഷണ കേന്ദ്രത്തിലേയ്ക്ക് മാറ്റി. ഓഗസ്റ്റ് എട്ടിനും ഒമ്പതിനും ഇടയിലാണ് ഇവര്‍ മയക്കുമരുന്ന് ഉപയോഗിച്ച ശേഷം കുട്ടിയെ കൊലപ്പെടുത്തിയതെന്ന് പൊലീസ് പറഞ്ഞു.

കാമുകന്റെ അമ്മയാണ് ഫ്രിജില്‍ ശരീരഭാഗങ്ങള്‍ കണ്ടെത്തിയത്. തുടര്‍ന്നാണ് സംഭവം പുറത്തറിഞ്ഞത്. വിശദമായ ചോദ്യം ചെയ്യലില്‍ പല്ലു തേക്കുന്നതിനിടെ നെഞ്ചില്‍ കുത്തിയാണ് കുട്ടിയെ കൊലപ്പെടുത്തിയതെന്ന് ഫ്‌ലോറിയാനോ പറഞ്ഞു. തെളിവ് നശിപ്പിക്കാന്‍ കുട്ടിയുടെ ചില ശരീരഭാഗങ്ങള്‍ പാകം ചെയ്യുകയും സമീപത്തെ അഴുക്കുചാലില്‍ ഉപേക്ഷിക്കുകയും ചെയ്തതായി ഇവര്‍ പൊലീസിനോട് പറഞ്ഞു.

മകളായ അലാനി സില്‍വയുടെ ശരീരം വെട്ടിനുറുക്കാനുള്ള എളുപ്പമാര്‍ഗം ഫ്‌ലോറിയാനോ ഇന്റര്‍നെറ്റില്‍ തിരഞ്ഞതായി ബ്രസീലിയര്‍ സിവില്‍ പൊലീസ് പറഞ്ഞു. ഭര്‍ത്താവുമായി വേര്‍പിരിഞ്ഞ് താമസിക്കുകയായിരുന്നു ഫ്‌ലോറിയാനോ. മകളെ അംഗീകരിക്കാന്‍ കഴിയാത്തതാണ് കൊലപാതകത്തിലേയ്ക്ക് നയിച്ചതെന്ന് പ്രതി പൊലീസിനോട് പറഞ്ഞതായാണ് റിപ്പോര്‍ട്ട്.

ഡേറ്റിംഗ് ആപ്പിലൂടെ യുവതി പരിചയപ്പെട്ട യുവാവും കൊലപാതക സമയത്ത് വീട്ടിലുണ്ടായിരുന്നതായി അവര്‍ പറഞ്ഞു. അയാളെക്കുറിച്ചുള്ള കൂടുതല്‍ വിവരങ്ങള്‍ ലഭ്യമല്ല. താനും കാമുകനും ലഹരിമരുന്ന് ഉപയോഗിച്ച് കിടന്നുറങ്ങിയെന്നും അടുത്ത ദിവസം എഴുന്നേറ്റപ്പോള്‍ മകള്‍ മരിച്ചു കിടക്കുന്നതാണ് കണ്ടതെന്നുമാണ് ആദ്യം ഫ്‌ലോറിയാനോ മൊഴി നല്‍കിയത്. എന്നാല്‍ മകളുടെ ശരീരം വെട്ടിനുറുക്കി ഫ്രിഡ്ജില്‍ സൂക്ഷിച്ചത് താനാണെന്ന് അവര്‍ സമ്മതിച്ചു.