ഹമാസിന് നേരെ നടത്തിയ കരയാക്രമണത്തില്‍ പരിക്കേറ്റ ഇസ്രായേല്‍ സൈനികര്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ കാണാന്‍ വിസമ്മതിച്ചതായി റിപ്പോര്‍ട്ടുകള്‍ പുറത്ത് വന്നു. ഹദാഷ ആശുപത്രിയിലാണ് സംഭവമെന്ന് ഇസ്രായേലിലെ ചാനല്‍ 13 റിപ്പോര്‍ട്ട് ചെയ്യുന്നു. 'ഞാന്‍ ഹദാഷ ആശുപത്രിയില്‍ ചികിത്സയിലായിരുന്നു. ഈ സമയം മെഡിക്കല്‍ ഉദ്യോഗസ്ഥന്‍ പ്രധാനമന്ത്രിയെ കാണണോ എന്ന് ചോദിച്ചു.

തീര്‍ച്ചയായും ഞാനത് വേണ്ട എന്ന് പറഞ്ഞു' -പേര് വെളിപ്പെടുത്താത്ത സൈനികന്‍ പറഞ്ഞു. 'പരിക്കേറ്റ 18 സൈനികരില്‍ 15 പേരും തങ്ങളുടെ മുറിയിലേക്ക് പ്രധാനമന്ത്രി വരേണ്ട എന്ന നിലപാടാണ് എടുത്തത്. നെതന്യാഹു നയിക്കുന്ന ലിക്കുഡ് പാര്‍ട്ടിയുടെ ശക്തികേന്ദ്രമായ ജറൂസലേമിലാണ് ഞാനുള്ളത്.

ഇവിടെ മാറ്റം പ്രകടമാണ്. ലിക്കുഡ് പാര്‍ട്ടിയുടെ കാലം അവസാനിക്കുകയാണ്' -സൈനികന്‍ വ്യക്തമാക്കി. അതേസമയം, സംഭവം ആശുപത്രി വൃത്തങ്ങള്‍ നിഷേധിച്ചു. 'നെതന്യാഹു പരിക്കേറ്റവരുടെ അടുത്തേക്ക് വന്നു. അവര്‍ വളരെ ആവേശത്തോടെയാണ് അദ്ദേഹത്തെ സ്വീകരിച്ചത്. സമ്പൂര്‍ണ വിജയം നേടാന്‍ ഇസ്രായേല്‍ പ്രതിജ്ഞാബദ്ധമാണെന്ന് അദ്ദേഹം പരിക്കേറ്റ സൈനികരോട് വ്യക്തമാക്കി' -ആശുപത്രി അധികൃതര്‍ അറിയിച്ചു.