മോശം കാലാവസ്ഥയിൽ വിമാനം ലാൻഡ് ചെയ്യാൻ വളരെ ബുദ്ധിമൂട്ടാണ്. അപകട സാധ്യതയുള്ളതിനാൽ ഇത്തരം സന്ദർഭങ്ങളിൽ ആകാശത്ത് വട്ടമിട്ട് പറന്ന് അനുമതി ലഭിച്ച ശേഷം ലാൻഡ് ചെയ്യുകയോ അല്ലെങ്കിൽ മറ്റൊരു വിമാനത്തവളത്തിലേക്ക് വഴി തിരിച്ചുവിടുകയാണ് ചെയ്യുന്നത്. എന്നാൽ എല്ലാവരേയും ഭീതിയുടെ മുൾമുനയിലാക്കി ലാൻഡിങ്ങിനിടെ വിമാനം കൊടുങ്കാറ്റിൽ അടിയുലയുന്ന വീഡിയോ ആണ് പുറത്തുവന്നിരിക്കുന്നത്.

കനത്ത കാറ്റിൽ വിമാനത്തിന്‍റെ ചിറക് റൺവേയിൽ നിലത്തേക്ക് ചെരിയുന്നത് ദൃശ്യങ്ങളിൽ കാണാം. ഹീത്രൂ വിമാനത്താവളത്തിൽ ലാൻഡ് ചെയ്യാൻ ശ്രമിക്കുന്ന വിമാനത്തിന്റെ ദൃശ്യങ്ങളാണ് പുറത്തുവന്നത്.‌ ലൊസാഞ്ചലസിൽ നിന്നെത്തിയ ബോയിങ് 777 വിമാനം ഗെരിറ്റ് കൊടുങ്കാറ്റിൽപ്പെട്ടാണ് ആടിയുലഞ്ഞത്. പത്ത് സെക്കൻഡോളം വിമാനം കാറ്റിൽ ആടിയുലഞ്ഞ ശേഷം പ്രശ്നങ്ങളില്ലാതെ വിമാനം ലാൻഡ് ചെയ്തു.

സംഭവത്തിന്‍റെ വീഡിയോ എക്‌സില്‍ പോസ്റ്റ് ചെയ്തതോടെയാണ് വിമാനത്തിന്റെ അത്ഭുത രക്ഷപ്പെടല്‍ ചര്‍ച്ചയായത്. പ്രതികൂല കാലാവസ്ഥയെ തുടർന്ന് ഹീത്രൂ വിമാനത്താവളത്തിൽ നിരവധി വിമാനങ്ങൾ റദ്ദാക്കി. ഗെരിറ്റ് കൊടുങ്കാറ്റിനെ തുടർന്ന് ബ്രിട്ടന്‍റെ പല ഭാഗങ്ങളിലും ശക്തമായ കാറ്റും കനത്ത മഴയും തുടരുകയാണ്. ഇത് വിമാന സർവീസുകളെയും ട്രെയിൻ ഗതാഗതത്തെയുമെല്ലാം ബാധിച്ചു.