പാലസ്തീന്റെ പുതിയ പ്രധാനമന്ത്രിയായി മുന്‍ ഉപപ്രധാനമന്ത്രിയും ഫലസ്തീന്‍ ഇന്‍വെസ്റ്റ്‌മെന്റ് ഫണ്ട് ചെയര്‍മാനുമായ മുഹമ്മദ് മുസ്തഫയെ നിയമിച്ചു
പാലസ്തീന്റെ പുതിയ പ്രധാനമന്ത്രിയായി മുന്‍ ഉപപ്രധാനമന്ത്രിയും ഫലസ്തീന്‍ ഇന്‍വെസ്റ്റ്‌മെന്റ് ഫണ്ട് ചെയര്‍മാനുമായ മുഹമ്മദ് മുസ്തഫയെ നിയമിച്ചു.
ദീര്‍ഘകാലമായി പ്രസിഡന്റ് മഹ്മൂദ് അബ്ബാസിന്റെ സാമ്പത്തിക കാര്യങ്ങളിലെ ഉപദേശകന്‍ കൂടിയാണ് മുഹമ്മദ് മുസ്തഫ. പാലസ്തീനിലെ ഇസ്രായേല്‍ വംശഹത്യയില്‍ പ്രതിഷേധിച്ചും പട്ടിണി പടരുമ്പോള്‍ ഒന്നും ചെയ്യാനാകാത്തതിന്റെ ധാര്‍മിക ഉത്തരവാദിത്തം ഏറ്റെടുത്തും മുഹമ്മദ് ഇശ്തയ്യ പ്രധാനമന്ത്രി സ്ഥാനം രാജിവെച്ച് മൂന്നാഴ്ചയോടടുക്കുമ്പോഴാണ് പുതിയ നിയമനം. ഇസ്രായേല്‍ അധിനിവേശ വെസ്റ്റ് ബാങ്കില്‍ പരിമിത അധികാരമുള്ള ഫലസ്തീന്‍ അതോറിറ്റിക്ക് വേണ്ടി പുതിയ സര്‍ക്കാര്‍ രൂപവത്കരിക്കാനുള്ള ചുമതലയാണ് 69കാരന്റെ മുന്നിലുള്ളത്.
വാഷിങ്ടണിലെ ജോര്‍ജ് വാഷിങ്ടണ്‍ സര്‍വകലാശാലയില്‍നിന്ന് പഠനം പൂര്‍ത്തിയാക്കിയ മുഹമ്മദ് മുസ്തഫ ഫലസ്തീന്‍ ലിബറേഷന്‍ ഓര്‍ഗനൈസേഷനിലെ സ്വതന്ത്ര എക്‌സിക്യൂട്ടീവ് അംഗമാണ്. 2013 -15 കാലയളവില്‍ സാമ്പത്തിക കാര്യങ്ങള്‍ കൈകാര്യം ചെയ്യുന്നതിനുള്ള ഉപപ്രധാനമന്ത്രിയായി സേവനമനുഷ്ഠിച്ച അദ്ദേഹം, ലോക ബാങ്കിന്റെ ഉന്നത പദവികളില്‍ പ്രവര്‍ത്തിച്ചിട്ടുണ്ട്. 2014ല്‍ ഇസ്രായേല്‍ ആക്രമണത്തെ തുടര്‍ന്ന് തകര്‍ന്ന ഫലസ്തീന്റെ പുനര്‍നിര്‍മാണത്തില്‍ നിര്‍ണായക പങ്കുവഹിച്ചിട്ടുണ്ടായിരുന്നു.
https://www.facebook.com/Malayalivartha
